(006SV)
ချင်းပြည်တောင်ပိုင်း မင်းတပ်မြို့နယ်ကို ၂ နှစ်တာကာလအတွင်း စစ်ကောင်စီက လေကြောင်းတိုက်ခိုက်မှု အကြိမ်များစွာ ပြုလုပ်ခဲ့ရာ ဒေသခံပြည်သူ ၂၀ ကျော်သေဆုံးပြီး ၇၀ ကျော် ထိခိုက်ဒဏ်ရာများ ရရှိခဲ့ကြောင်း ချင်းလူ့အခွင့်အရေးအဖွဲ့ထံမှ သိရသည်။
၂၀၂၂ ဇူလိုင်လမှ ၂၀၂၄ ဇူလိုင်လအထိ မင်းတပ်မြို့နယ်အတွင်း စစ်ကောင်စီက လေကြောင်းတိုက်ခိုက်မှုပေါင်း ၉၈ ကြိမ် ပြုလုပ်ခဲ့ရာ ဒေသခံပြည်သူ ၂၂ ဦးသေဆုံးပြီး ၇၄ ဦး ထိခိုက်ဒဏ်ရာများ ရရှိခဲ့ကြောင်း ချင်းလူ့အခွင့်အရေးအဖွဲ့က ယမန်နေ့က သတင်းထုတ်ပြန်သည်။
လေကြောင်းတိုက်ခိုက်မှုကြောင့် ဆေးရုံ ၁ ရုံး၊ စာသင်ကျောင်း ၇ ကျောင်း၊ ဗုဒ္ဓဘာသာ ဘုန်ကြီးကျောင်း ၂ ကျောင်းနှင့် ခရစ်ယာန်ဘုရားကျောင်း ၄ ကျောင်းအပါအဝင် နေအိမ်နှင့် အဆောက်အအုံပေါင်း ၁၃၇ လုံး ထိခိုက်မှု၊ ပျက်စီးဆုံးရှုံးမှုများရှိခဲ့ကြောင်း သိရသည်။
နိုင်ငံတကာနှင့် ပြည်တွင်းဥပဒေများအရ ကာကွယ်စောင့်ရှောက်ရမည့် ယင်းကဲ့သို့ အရပ်သား အဆောက်အအုံများကို ပစ်မှတ်ထားတိုက်ခိုက်မှုများသည် စစ်ရာဇဝတ်မှု ကျူးလွန်သော သက်သေအထောက်အထားများ ဖြစ်ပြီး စစ်ကောင်စီအနေဖြင့် တာဝန်ခံရမည်ဖြစ်ကြောင်း ချင်းလူ့အခွင့်အရေးအဖွဲ့က ထုတ်ပြန်သည်။
စစ်ကောင်စီသည် မင်းတပ်မြို့နယ်အတွင်း လေကြောင်းတိုက်ခိုက်မှုများကို ပေါင် ၅၀၀ ဗုံး၊ မီးလောင်ဗုံများအပါအဝင် ပြင်းထန် သော ဗုံးအမျိုးအစားများဖြင့် မကြာခဏ တိုက်ခိုက်ပြီး ချင်းပြည်နယ်အတွင်း လေကြောင်းတိုက်ခိုက်ခံရမှု အများဆုံး ကျူးလွန်းခံရသော မြို့နယ်ဖြစ်ကြောင်း ဒေသခံတချို့က ပြောသည်။
၂၀၂၄ ခုနှစ် ဧပြီလနှင့် မေလ ၂ ရက်အတွင်း မင်းတပ်မြို့နယ်အတွင်း စစ်ကောင်စီက လေကြောင်းတိုက်ခိုက်မှု ၃၆ ကြိမ်နှင့် လက်နက်ကြီး ပစ်ခတ်မှု ၂ကြိမ် ပြုလုပ်ခဲ့ရာ ရဲဘော် ၂ ဦး၊ အရပ်သား ၂ ဦး သေဆုံးပြီး ၃၁ ဦးထိခိုက်ဒဏ်ရာများ ရရှိခဲ့ကြောင်း CDF – မင်းတပ်က မေလက သတင်းထုတ်ပြန်သည်။
