(006SV)
ချင်းပြည်နယ်၊ တီးတိန်မြို့ပေါ်တွင် ယမန်နေ့က မိုင်းမတော်တဆမှုဖြစ်ပြီး ကားပေါ်ပါလာသည့် ချင်းအမျိုးသားတပ်ဦး CNF/CNA မှ ရဲဘော် ၃ ဦးကျဆုံးသွားသည်ဟု CNF/CNA မှ သတင်းရင်းမြစ်နှင့် တီးတိန်ဒေသခံတစ်ဦးက ပြောသည်။
နိုဝင်ဘာလ ၇ ရက်က ညနေ ၆နာရီခွဲကျော်တွင် တီးတိန်မြို့၊ Lawi Bual ရပ်ကွက်တွင် ချင်းအမျိုးသားတပ်ဦး CNF/CNA မှ ရဲဘော်များ စီးနင်းလာသည့် တိုယိုတာဟိုင်းလတ်ကားတွင် မိုင်းမတော်တဆဖြစ်၍ ပေါက်ကွဲသွားခြင်းဖြစ်ပြီး ကားတစ်စီးလုံး ကြေမွပျက်စီးသွားသကဲ့သို့ ကားပေါ်ပါလာသည့် ရဲဘော်များလည်း ကျဆုံးသွားခြင်းဖြစ်သည်ဟု သတင်းရင်းမြစ်များက ပြောသည်။
“တီးတိန်ဘက်ကို စစ်ဆင်ရေးအတွက် သွားတဲ့အချိန်မှာ ကားထဲမှာ မိုင်းတွေ သယ်သွားရတယ်။ အဲဒီမှာ မိုင်းက မတော်တဆဖြစ်ပြီး ပေါက်ကွဲသွားတဲ့သဘောလို့ သိရတယ်၊ ကားထဲမှာပါတဲ့ ရဲဘော် ၃ ဦးလည်း ကျဆုံးသွားတာပေါ့” ဟု CNF/CNA မှ သတင်းရင်းမြစ်တစ်ဦးက ပြောသည်။
မိုင်းမတော်တဆပေါက်ကွဲမှုကြောင့် ချင်းအမျိုးသားတပ်ဦး CNF/CNA မှ ဒု-ဗိုလ် ဆလိုင်း အဲလစ်မာ (Salai Elishma )၊ ဆလိုင်း ရိုနာလ် (Salai Ronald)၊ ဆလိုင်းဂျိုးဆွ (Salai Joshua) တို့ ကျဆုံးသွားသည်။
ထို့အပြင် ဘေးအနီးက နေအိမ်ငါးလုံးခန့်သည် အမိုးအကာနှင့် မုန်ပြတင်းများ အနည်းငယ် ပျက်စီးသွားပြီး ဆိုင်ကယ်တစ်စီးလည်း ပျက်စီးသွားသည်ဟု သိရသည်။
“မနေ့က ပေါက်ကွဲအသံကြားတာပဲ ရှိတယ်။ အနီးဝန်းကျန်က လူတွေ ပြောတာက ပေါက်ကွဲပြီးတော့ ကားကို မီးလောင်သွားတာပေါ့နော်။ ဒီနေ့ မနက်တွေ့တာက ဦးခေါင်းအရွက်တွေ၊ ဆံပင်ပါတာတွေ တွေ့တယ်။ ဘယ်ဘက်ခြေထောက်စတဲ့ အသား အစအနတွေပဲ တွေ့တယ်။ မြို့ပေါ်မှာကတော့ အခုက ငြိမ်နေတယ် ပုံမှန်ပါပဲ” ဟု တီးတိန်ဒေသခံတစ်ဦးက ပြောသည်။
တီးတိန်မြို့ကို ပြည်သူ့ကာကွယ်ရေးအဖွဲ့ PDF Zoland က ထိန်းချုပ်စိုးမိုးထားပြီး ယမန်နေ့က ပေါက်ကွဲမှုဖြစ်ပွားပြီးနောက် တီးတိန်မြို့ပေါ် ပြည်သူတချို့မှာ စိုးရိမ်နေကြသည်ဟု သိရသည်။
တီးတိန်မြို့သည် ချင်းပြည်နယ်၊ မြောက်ပိုင်းတွင် တည်ရှိပြီး အိန္ဒိယ-မြန်မာအမှတ် ၂ နယ်စပ်ကုန်သွယ်ရေးလမ်းကြောင်းပေါ် တွင် တည်ရှိသည်မြို့ဖြစ်သည်။
