(02HH)
စစ်ကောင်စီတပ်ဖွဲနှင့် ချင်းကာကွယ်ရေးတပ်ဖွဲ့တို့အကြား တိုက်ပွဲအပြင်းအထန်ဖြစ်ပွားမှုကြောင့် ဟားခါးမြို့ပေါ်သို့ စစ်ဘေးတိမ်းရှောင်လာသူ ပိုမိုများပြားလာနေပြီး ၎င်းတို့အတွက် စားနပ်ရိက္ခာ အထောက်အပံ့ များလိုအပ်လျက်ရှိကြောင်း ဟားခါးမြို့နယ် စစ်ဘေးရှောင်စောင့်ရှောက်ရေးအဖွဲ့ဝင်တစ်ဦးက ပြောသည်။
“တချို့က ရွာလုံးကျွတ်တောင်လာရှောင်ကြတာ လက်ရှိ မြို့ပေါ်မှာ လူဦးရေ ၂၁၇၁ ရှိတယ်။ ဟားခါးမြို့နယ် ရွာတွေမှာ IDP (Camp) ရှိတယ် စစ်ဘေးရှောင် တွေရှိ တယ် အဲ့တာတွေ ပေါင်း လိုက်ရင် ဟားခါးမြို့နယ်မှာ တော့ လူဦးရေ (၉) ထောင်ကျော် လောက်ရှိတယ်။ IDP (Camp) လုပ်ထားတဲ့ တချို့ရွာတွေဆိုရင် စစ်ကြောင်း ရှိတော့ IDP (Camp) လည်းထပ်ရှောင်ရတာပေါ့၊ လုံခြုံတဲ့ရွာတွေမှာ ထပ်ရှောင်တယ် ပြီးတော့ တောထဲမှာ လည်းပဲ ရှောင်တဲ့သူတွေလည်းပဲရှိတယ်။” ဟု ဟားခါးမြို့နယ် စစ်ဘေးရှောင် စောင့်ရှောက်ရေးအဖွဲ့ဝင်ကေပြာသည်။
ဟားခါးမြို့နယ်အတွင်းရှိ ကလေး-ဟားခါး ကားလမ်းမပေါ်နှင့် ဟားခါး-ဂန့်ဂေါကြား ကားလမ်းမတစ်လျှောက်တွင် စစ်ကောင်စီတပ်ဖွဲ့နှင့် ချင်းကာကွယ်ရေးတပ်ဖွဲ့များ တိုက်ပွဲဖြစ်ပွားလာသည်မှာ တစ်လခန့်ကြာမြင့်လာပြီဖြစ်ပြီး ကားလမ်းဘေးတစ်လျှောက်တွင် နေထိုင်ကြသော ကျေးရွာများသည် ရွာလုံးကျွတ် စစ်ဘေးတိမ်းရှောင်နေကြရသည်။
ဟားခါးမြို့နယ်အတွင်း စစ်ဘေးတိမ်းရှောင်လာကြသည့် ကျေးရွာများမှာ ဟားခါးနှင့် ဖလမ်းအကြားတွင်ရှိသော ချွန်ကျုံး၊ ရမ်ထလို၊ ဒေါ့ထက်ရွာ၊ တလန်းဇာရ်ရွာအပါအဝင် ဟားခါး- ဂန့်ဂေါကြား ကျေးရွာတို့မှ ထောင်နှင့်ချီသောပြည်သူများ ဖြစ်ကြသည်။
လက်ရှိ ဟားခါးမြို့ပေါ်တွင် စစ်ဘေးရှောင်သည့် အိမ်ခြေ ၅၈၇ အိမ်၊ လူဦးရေ ၂၁၇၁ ဦး၊ ဟားခါးမြို့နယ်တွင်ရှိသော IDP (Camp) နှင့် ကျေးရွာတို့တွင် စစ်ဘေးရှောင်လူဦးရေ (၉၀၀၀) ကျော် စစ်ဘေးရှောင်နေကြရဆဲဖြစ်သည်ဟု ဟားခါးမြို့နယ် စစ်ဘေးရှောင်စောင့်ရှောက်ရေးအဖွဲ့စာရင်းအရ သိရသည်။
၎င်း စစ်ဘေးရှောင်ပြည်သူများသည် ဟားခါးမြို့တွင် အိမ်ငှါးနေခြင်း၊ ဆွေးမျိုး၊ ဘာသာရေးအဆောက်အအုံ တို့တွင် နေထိုင်ကြကာ ဘာသာရေးအဖွဲ့အစည်းနှင့် ရပ်ကွက်နေပြည်သူများ၏ ပေးလှူထောက်ပံ့မှုများဖြင့် နေထိုင်စားသောက် နေကြရဆဲဖြစ်သည်ဟု သိရသည်။
ကလေး-ဟားခါးလမ်းနှင့် ဂန့်ဂေါ-ဟားခါးလမ်းတို့တွင် စစ်ကောင်စီတပ်ဖွဲ့နှင့် ချင်းကာကွယ်ရေးတပ်ဖွဲ့များ တိုက်ပွဲဖြစ်ပွားမှုကြောင့် လမ်းပန်းဆက်သွယ်ရေးပြတ်တောက်ကာ ကုန်တင်ကားများအဝင်အထွက်မရှိ သောကြောင့် ဟားခါးမြို့ပေါ်တွင် ဆန်အပါအဝင် အခြေခံစားသောက်ကုန်များပြတ်လပ်မှုရှိသည့်အပြင် တချိူ့မှာလည်း အဆမတန်ဈေးမြင့်တက်နေသောကြောင့် ပိုမိုအခက်ကြုံစေသည်ဟု သိရသည်။
“စားဝတ်နေရေးအတွက်က တော်တော်လေး အခက်ခဲရှိတာပေါ့သူတို့က ၃ ရက်လောက်ပဲရှောင်ရမယ်ဆိုပြီးထင်တာ တကယ့်တကယ်ကျတော့ ၂ ပတ်ကနေ ၃ ပတ်အထိကြာပြီ အခုက လမ်းပန်းဆက်သွယ်ရေး အခြေအ နေမကောင်းတော့ ဆန်တွေလည်း ပြတ်လပ်မှုရှိတယ်။ အခုလောလောဆယ် လိုအပ်တာက အစားအစာ၊ နေစရာ အခက်အခဲရှိတယ်။ ဟားခါးမြို့ပေါ်မှာဆိုရင် တအိမ်မှာ ၅ အိမ်ထောင်စုအဲ့လိုမျိုးနေကြရတယ်။” ဟု ဟားခါးမြို့နယ်စစ်ဘေးရှောင် စောင့်ရှောက်ရေးအဖွဲ့ဝင်က ပြောသည်။
လက်ရှိတွင် ဟားခါးမြို့နယ်စစ်ဘေးရှောင်စောင့်ရှောက်ရေးအဖွဲ့များက အနယ်နယ်အရပ်ရပ်မှ စစ်ဘေးရှောင်ပြည်သူများ၏ အခြေခံလိုအပ်ရာများရရှိနိုင်ရန် အတတ်နိုင်ဆုံးကူညီနိုင်ရန် ဆောင်ရွက်နေသည်ဟု သိရသည်။
