ချင်းပြည်နယ် ပလက်ဝမြို့တွင် အဖမ်းခံရသည့် ချင်းလူငယ် ၅ ဦးကို အာဏာသိမ်းစစ်ကောင်စီက ပုမ်မ ၅၀၅(က)ဖြင့် အမှုဖွင့်ကာ ရခိုင်ပြည်နယ် စစ်တွေမြို့ကို ယမန်နေ့ (ဇွန်လ ၁၈) ရက်က ပို့ဆောင်လိုက်ပြီဟု စုံစမ်းသိရှိရသည်။
ပလက်ဝမြို့တွင် မေလ ၂၈ ရက်နေ့က ဗုံးနှစ်ကြိမ်ပေါက်ကွဲမှုဖြစ်ပွားခဲ့သည့်နောက်ပိုင်း အာဏာသိမ်း စစ်ကောင်စီသည် မြို့ပေါ်ရှိ အရပ်ဘက်အဖွဲ့အစည်းများတွင်အလုပ်လုပ်ကိုင်နေသူများအပါအဝင် လူငယ် ၁၈ ဦးကို ဖမ်းဆီးခဲ့ပြီး ၁၃ ဦးကို ပြန်လွှတ်ပေးခဲ့သော်လည်း ၅ ဦးမှာ ဇွန်လ ၁၇ ရက်နေ့က ပုဒ်မ ၅၀၅ (က) ဖြင့် အမှုဖွင့်ခံခဲ့ရခြင်းဖြစ်ည်။
အဆိုပါ ချင်းလူငယ် (၅) ဦးမှာ ကိုအိုက်မင်း (အဆိုတော်)၊ အိုက်ထွန်းမင်း (ကုမ္ပဏီ)၊ အိုက်ထွန်းမင်း (သစ်တော)၊ ကိုအောင်ထွန်းစိုး (ခ) အာလူး နှင့် အဂ္ဂပေလူမှုဖွံ့ဖြိုးရေးဖောင်ဒေးရှင်းမှ ဒါရိုက်တာ ဦးရာကျော်တို့ဖြစ်ကြပြီး ၎င်းတို့ ၅ ဦးကို ပလက်မြို့ရဲစခန်းမှ ဇွန်လ ၁၇ ရက်နေ့က ခမရ (၅၁၁) တပ်ရင်းမှူး ဒုဗိုလ်မှူးကြီး နေလင်းအောင်က ခလရ (၂၈၉) တပ်ရင်းသို့ ခေါ်ဆောင်သွားခဲ့သည်။
ထို့နောက် ဇွန်လ ၁၈ ရက်နေ့တွင် ရခိုင်ပြည်နယ်စစ်တွေမြို့သို့ ပို့ဆောင်ကာ ရဲစခန်းသို့မအပ်သေးပဲ စစ်တပ်က ထိန်းသိမ်းထားဆဲဟု ၎င်းတို့နှင့်နီးစပ်သည့်သတင်းရပ်ကွက်ထံမှသိရသည်။
“သူတို့ ၅ ဦးကို ၁၇ ရက်နေ့က ၂၈၉ တပ်မှ တစ်ညအိမ်ခိုင်းပြီး နောက်တစ်နေ့ကို စစ်တွေကိုတန်းပို့လိုက်တာ၊ ခုထိ ရဲလက်ထဲတော့မရောက်သေးဘူး စစ်တပ်လက်ထဲမှာပဲရှိနေကြသေးတယ်’’ ဟု ၎င်းတို့နှင့်နီးစပ်သူ တစ်ဦးကပြောသည်။
၎င်းတို့ ၅ ဦးသည် မင်းတပ်မြို့နယ်ရှိ စစ်ဘေးရှောင်ပြည်သူများအား ကူညီထောက်ပံ့ရန်အတွက် အလှူငွေကောက်ခံပြီး ရရှိသောငွေကျပ်(၂၂၄၀၀၀၀) သိန်းကို ပလက်ဝမြို့မြန်မာ့စီးပွားရေးဘဏ်မှတဆင့် မင်းတပ်မြို့ မြန်မာ့စီးပွားရေးဘဏ်သို့ လွှဲအပ်ခဲ့ကြောင်း စစ်ဆေးတွေ့ရှိသည့်အတွက်ကြောင့်ဟုဆိုကာ ပုဒ်မ ၅၀၅(က)ဖြင့် အမှုဖွင့်ခံရခြင်းဖြစ်သည်ဟု ၎င်း တို့နှင့်နီးစပ်သည့်သတင်းရပ်ကွက်ထံမှသိရသည်။
လာမည့် ဇွန်လ ၃၀ ရက်နေ့တွင် အမှုထပ်မံစစ်ဆေးရန် ရုံးပြန်ချိန်းသည်ဟု သိရသည်။
