ချင်းပြည်နယ်တောင်ပိုင်း ပလက်ဝမြို့နယ်တွင် ပြီးခဲ့သည့်ဇွန်လအတွင်းမှာ ဒေသခံ ချင်းလူမျိုး ၁၅ ဦးထက်မနည်းကို ရက္ခိုင့်တပ်တော် (AA) က ဖမ်းဆီးထိန်းသိမ်းထားသည်ဟု ကြားကာလ ခူမီး (ချင်း) မျိုးနွယ်စုများရေးရာ ပေါင်းစပ်ညှိနှိုင်းရေးကောင်စီ (IKACC) က ဇူလိုင်လ ၇ ရက်နေ့က ထုတ်ပြန်သည်။
ပလက်ဝမြို့နယ် ကုလားတန်မြစ်အနောက်ဘက် ရက္ခိုင့်တပ်တော် (AA) တပ်ဖွဲ့များ လှုပ်ရှားရာနယ်မြေအတွင်းရှိ ကျေးရွာ ၅ ရွာခန့်က ဒေသခံအရပ်သားပြည်သူ ၁၅ ဦးထက်မနည်းကို AA က ဇွန်လအတွင်း ဖမ်းဆီးခဲ့ခြင်းဖြစ်ပြီး ယနေ့ချိန်ထိ ပြန်လွှတ်ပေးခြင်းမရှိသေးကြောင်း IKACC က တာဝန်ရှိသူတစ်ဦးက ပြောသည်။
“ကျနော်တို့မြေပြင်သတင်းအရ AA ကနေ ဖမ်းတာ ၁၅ ဦးလောက်ရှိတယ်လို့သိရတယ်၊ သူတို့ (AA) ကို အနှောက်အယှက်ပေးလို့ ဖမ်းခံရတာလားဆိုတာတော့ တိတိကျကျမသိရဘူး ဒါပေမယ့် ကျနော်တို့ နားလည်ထားတာကတော့ အခုအဖမ်းခံရတဲ့သူတွေဟာ သာမန်အရပ်သားပြည်သူတွေဖြစ်တယ်လို့ သိရတယ်” ဟု IKACC ကတာဝန်ရှိသူတစ်ဦးက ပြောသည်။
အဆိုပါ အဖမ်းခံရသူများသည် သာမန် ရပ်သူရပ်သားအရပ်သားများသာဖြစ်ပြီး ရက္ခိုင့်တပ်တော်က ခေါ်ယူထိန်းသိမ်းစစ်ဆေးမှု ပြုလုပ်ရသည်အထိ ဆောင်ရွက်ရန် လိုအပ်သူများမဟုတ်ကြောင်း IKACC က ဆိုပါသည်။
ပလက်ဝမြို့နယ်အတွင်းရှိ ချင်းလူမျိူးအပါအဝင် ဒေသခံပြည်သူများအား ရက္ခိုင့်တပ်တော် (AA) က ခေါ်ယူထိန်းသိမ်းမှု ပြုလုပ်ခြင်းသည် ဒေသတွင်း အပြန်အလှန်ယုံကြည်မှုတည်ဆောက်ရာ၌ မလိုလားအပ်သော နားလည်မှုလွှဲမှာခြင်းမျိုး ထပ်မံပေါ်ပေါက်လာနိုင်သဖြင့် ခေါ်ယူထိန်းသိမ်းထားသည့် ပြည်သူများအား အမြန်ဆုံးပြန်လွှတ်ပေးရန် IKACC က တောင်းဆိုထားသည်။
“သူတို့ (AA) ကလည်း တော်လှန်ရေးလုပ်တယ်ဆိုတော့ အဖမ်းဆီးတွေရှိတယ်ဆိုပေမယ့် စစ်ဆေးမေးမြန်းပြီးမှ လိုအပ်တဲ့ သိချင်တဲ့ဟာ မေးမြန်းပြီးရင်တော့ ပြန်လည်လွှတ်ပေးဖို့ကောင်းပါတယ်၊ အဲလိုမျိုးမဟုတ်ဘဲနဲ့ ရေရှည်မှာဆိုရင်တော့ တိုင်းရင်းသား တမျိုးနဲ့တမျိုးကြားမှာ တော်လှန်ရေးကာလမှာ စိတ်ဝမ်းကွဲစရာဖြစ်လာမှာကို စိုးရိမ်ပါတယ်၊ အချင်းချင်း အပြန်အလှန်လေးစားမှုနဲ့ သူတို့မြေပြင်မှာ စစ်ရေးအရဆိုတဲ့ဟာရှိကောင်းရှိမယ် ဒါပေမယ့် မေးမြန်းစစ်ဆေးပြီးရင်တော့ အထိခိုက်မရှိ ပြန်လည်လွှတ်ပေးတယ်ဆိုရင် ကောင်းပါတယ် သို့တည်းမဟုတ် အဲလိုမျိုး ခဏခဏလုပ်မယ်ဆိုရင် ရေရှည်မှာ တိုင်းရင်းသားတစ်ခုနဲ့တစ်ခုကြားမှာ အပြန်အလှန် နားလည်မှုလွဲမှာ သဘောထားကွဲမှာကို မဖြစ်ချင်ဘူး” ဟု IKACC မှ တာဝန်ရှိသူကပြောသည်။
ယခုကိစ္စနှင့်ပတ်သက်၍ ရက္ခိုင့်တပ်တော် (AA) ပြေရေးဆိုခွင့်ရှိသူ ဦးခိုင်သုခကို ဖုန်းဖြင့်ဆက်မေးမြန်းရန် ကြိုစားခဲ့သော်လည်း ဆက်သွယ်၍မရခဲ့ပေ။
ပလက်ဝမြို့နယ်တွင် ပြီးခဲ့သည့်မေလ ၂၆ ရက်နေ့က စစ်ကောင်စီတပ်နှင့် AA တပ်ဖွဲ့အကြား တိုက်ပွဲဖြစ်ပွားခဲ့ပြီးနောက် စစ်ရေးအခြေအနေ တင်းမာလျှက်ရှိကာ စစ်ကောင်စီဘက်ကလည်း ဒေသခံပြည်သူများအား ဖမ်းဆီးထိန်းသိမ်းမှုများရှိနေသည်ဟု သိရသည်။
