ချင်းပြည်နယ် ဖလမ်းမြို့နယ်တွင် ဇန်နဝါရီလ ၁ ရက်နေ့မှ ၃၁ ရက်နေ့အအထိ တစ်လအတွင်း စစ်ကောင်စီတပ်ဖွဲ့နှင့် ချင်းအမျိုးသားကာကွယ်ရေးတပ်ဖွဲ့ (CNDF) တို့တိုက်ပွဲ ၁၂ ကြိမ်ဖြစ်ပွားပြီး စစ်ကောင်စီဘက်က ၈၀ ကျော်သေဆုံးသည်ဟု ဖေဖော်ဝါရီလ ၃ ရက်နေ့က CNDF က ထုတ်ပြန်သည်။
စစ်ကောင်စီတပ်သည် ဇန်နဝါရီ လဆန်းပိုင်းကစ၍ ဖလမ်းမြို့နယ်ထဲကို စစ်အင်အား ၃၀၀ ခန့်နှင့် ထိုးစစ်ဆင်တိုက်ခိုက်လာခဲ့ရာမှ CNDF တပ်ဖွဲ့က ပြန်လည်ခုခံတိုက်ခိုက်ခဲ့ကြရာတွင် တိုက်ပွဲဖြစ်ပွားမှု အနည်းဆုံး ၁၂ ကြိမ်ဖြစ်ပွားကာ စစ်ကောင်စီဘက်က သေဆုံးသူ ၈၁ ဦးထိရှိခဲ့ပြီး ဒဏ်ရာရရှိသူအနည်းဆုံး ၆၀ ကျော်ရှိခဲ့သည်ဟု ၎င်းတို့ထုတ်ပြန်ချက်တွင် ဖော်ပြထားသည်။
အဆိုပါတိုက်ပွဲဖြစ်ပွားကြသည့် အနီးအနား (၈) နေရာခန့်တွင် စစ်ကောင်စီတပ်က အလောင်းများ ပုံထားသည်ကိုတွေ့ရပြီး CNDF မှ (၆၀) မမ၊ (၄၀) မမ နှင့် ကျည်အများအပြား သိမ်းဆည်းခဲ့သည်ဟု ဆိုသည်။
စစ်ကောင်စီတပ်နှင့်ဖြစ်ပွားသည့် တိုက်ပွဲအတွင်း CNDF ဘက်မှ ရဲဘော်တစ်ဦးကျဆုံးခဲ့ပြီး မိုင်းရှင်းလင်းစဉ် ဒဏ်ရာရသူတဦးအပါအဝင် တိုက်ပွဲအတွင်း ဒဏ်ရာရသူ စုစုပေါင်း (၈) ဦးအထိရှိခဲ့သည်ဟု CNDF က ထုတ်ပြန်ထားသည်။
