(003PT)
ကလေးမြို့နှင့် ချင်းပြည်နယ်မြောက်ပိုင်းကို ဆက်သွယ်သော ကလေး-သိုင်းငင်းလမ်း ပိတ်ထားမှုကြောင့် ဖလမ်းမြို့နယ် ဗားလုံးကျေးရွာအနီးတွင် ကုန်တင်ကားနှင့် ခရီးသည်တင်ကား အစီး ၁၀၀ ခန့် ၂ ပတ်ကျော်ကြာ ပိတ်မိသောင်တင်နေပြီဟု သိရသည်။
ကလေးမြို့မှ ချင်းပြည်နယ်မြောက်ပိုင်း တီးတိန်-ဖလမ်း-ဟားခါးဘက်သို့ဆက်သွယ်သော ကားလမ်းမကြီးကို လုံခြုံရေး အခြေအနေကြောင့် နို၀င်ဘာလ ၂၇ ရက်နေ့ကစ၍ CDF CDM-Siyin တပ်ဖွဲ့က ဖြတ်သန်းသွားလာခွင့်ပိတ်ထားခြင်းဖြစ်ပြီး ဖလမ်း-ဟားခါးဘက်မှ ကလေးမြို့သို့ ဆင်းလာသော ကုန်တင်ကားနှင့် ခရီးသည်တင်ကားအစီး ၁၀၀ ခန့်မှာ ဖလမ်းမြို့နယ် ဗားလုံ၊ နယူးစွမ်ပီးရွာနှင့် တီးတိန်မြို့နယ် ဇောင်ကုန်ကျေးရွာတို့တွင် ပိတ်မိနေသည်ဟု ဒေသခံတစ်ဦးကပြောသည်။
ချင်းတောင်မှ ကလေးမြို့ဘက်သို့ဆင်းမည့် အဆိုပါယာဉ်တန်း ပိတ်မိနေသည်မှာ ၂ ပတ်ကျော်လာပြီဖြစ်၍ ကားသမားများ အစားအသောက်ပိုင်းမှာ အခက်ကြုံနေကြရပြီး ကျေးရွာဒေသခံများက ကျွေးမွေးနေကြရသည်ဟု သိရသည်။
“ကျွန်တော်တို့ ကျေးရွာက လူထုက ကျွေးမွေးတယ်။ ဝတ်တွေသတ်ပြီးပေးတယ်၊ ကြက်ဥတွေပေးတယ် ပြီးတော့ ဆန်တွေလည်းပေးတယ်” ဟု ဗားလုံကျေးရွာခံတစ်ဦးက ပြောသည်။
ကားလမ်းပိတ်ဆို့မှုကြောင့် သောင်တင်နေကြသော ခရီးသွားပြည်သူများမှာ ၎င်းတို့၏ မိသားစု၀င်များက ဆိုင်ကယ်ဖြင့် လာရောက်ခေါ်ယူကာ အိမ်ပြန်လှည့်ခဲ့ကြရသည်ဟု သိရသည်။
ခရီးသည်တင်ကားနှင့် ကိုယ်ပိုင်အိမ်စီးကားများမှာ ဖလမ်းမြို့ဘက်သို့ပြန်လှည့်ကာ ေ၀ဘူလလမ်းမှတဆင့် ကလေးမြို့သို့ ပြန်လှည့်ကြသော်လည်း နတ်ချောင်းကျေးရွာအနီးတွင် စစ်ကောင်စီတပ်က လမ်းပိတ်ထားခြင်းကြောင့် အခက်ကြုံနေကြရသည်ဟု သိရသည်။
“တစ်ချို့ ခြောက်ဘီးကားတွေက ဝေဘူလမြို့ဖက်ကနေ ပတ်ပြီးသွားကြတယ် အစတော့ နတ်ချောင်းဘက်ကနေ ဝင်လို့ရတယ်၊ ဒါပေမဲ့ အခုတော့ ဝင်လို့မရကြတော့ဘူးလို့ပြောတယ်။ အခုက သုံးပတ်မြောက် ပိတ်မိနေကြတာ” ဟု ဗားလုံးဒေသခံကပြောသည်။
ကလေး-သိုင်းငင်းကားလမ်းကို ဒီဇင်ဘာလ ၉ ရက်နေ့က ဖြတ်သန်းသွားလာခွင့်ပြုလိုက်ပြီဟု CDF CDM Siyin က ထုတ်ပြန်ခဲ့သော်လည်း စစ်ကောင်စီတပ်ဖွဲ့များ ပြည်သူအယောင်ဆောင်ကာ အခွင့်အရေးရယူလိုသည့် အရိပ်အရောင်များရှိလာသည့်အတွက် ဒီဇင်ဘာလ ၁၀ ရက်နေ့တွင် ပြန်လည်ပိတ်ပင်ခဲ့ကြသည်။
ယခုကဲ့သို့ ကားလမ်းပိတ်ထားမှုကြောင့် ချင်းပြည်နယ် မြောက်ပိုင်းဒေသတွင် အခြေခံစားကုန်ပစ္စည်းနှင့် လောင်စာဆီများ ပြတ်လပ်လုနီးပါးရှိလာနေပြီဟု သိရသည်။
