ချင်းပြည်နယ် ဖလမ်းမြို့မှာ အခြေစိုက်တပ်စွဲထားသော ခလရ ၂၆၈ တပ်ကုန်းမှ လက်နက်ကြီး ရမ်းသမ်းပစ်ခတ်မှုကြောင့် တောင်ယာထဲအလုပ်လုပ်နေသော အသက် ၅၇ နှစ်အရွယ် အမျိုးသားတစ်ဦး သေဆုံးခဲ့သည်ဟု သိရသည်။
ယနေ့ အောက်တိုဘာလ ၉ ရက်နေ့ မွန်းလွဲပိုင်း ၂ နာရီခန့်တွင် စစ်ကောင်စီတပ်ဖွဲ့က ၂၆၈ တပ်ကုန်းကနေ လက်နက်ကြီး ၄ ကြိမ်ခန့်ပစ်ခတ်ခဲ့ပြီး ဖလမ်းမြို့မှ ၆ မိုင်ခန့်ဝေးသော Relsing ကျေးရွာ ဘောလုံးကွင်းအနီး ကျရောက်ပေါက်ကွဲကာ တောင်ယာထဲအလုပ်လုပ်နေသော အသက် ၅၇ နှစ်အရွယ် Pu Biak Kip Ceu ထိမှန် သေဆုံးခဲ့သည်ဟု ဖလမ်းမြို့ခံတစ်ဦးကပြောသည်။
စစ်ကောင်စီတပ်ဖွဲ့၏ လက်နက်ကြီးကျည်သည် Relsing ကျေးရွာကျောင်းဝင်းထဲက အဆောက်အဦးတစ်ခုကိုလည်းထိမှန်ခဲ့ပြီး အခြားထိခိုက်ပျက်စီးမှုအခြေအနေကိုတော့ မသိရသေးပေ။
ယနေ့မွန်းလွဲပိုင်း ၁ နာရီလောက်ကလည်း ဖလမ်းမြို့အထွက် ဖလမ်း-ဟားခါးလမ်းမပေါ်က Lungpi, Lungrang ကျေးရွာဘက်နှင့် Surbung လေယာဉ်ကွင်းဘက်ကို စစ်ကောင်စီက တိုက်လေယာဉ်ဖြင့် ဗုံးကြဲတိုက်ခိုက်ခဲ့သည်ဟုသိရပြီး အသေးစိတ်အခြေအနေကိုတော့ မသိရသေးပေ။
