(06SV)
ချင်းပြည်နယ်၊ မင်းတပ်မြို့တွင်း စစ်ဆေးရေးဂိတ်နှင့် ခလရ (၂၇၄) စစ်စခန်းဂိတ်တို့ကို ယမန်နေ့က သွားရောက်တိုက်ခိုက်ရာ စစ်ကောင်စီက ၂ ဦးသေဆုံးပြီး ထိခိုက်ဒဏ်ရာရသူများလည်းရှိကြောင်း ချင်းကာကွယ်ရေးတပ်-မင်းတပ်က ထုတ်ပြန်သည်။
ဇူလိုင်လ ၁၃ ရက် နံနက် ၆ နာရီမှ ၇ နာရီခွဲအထိ မင်းတပ်မြို့ ခလရ (၂၇၄) တပ်စခန်း၏ ဝင်ပေါက်ဂိတ်ရှိ စစ်ကောင်စီကင်းစခန်းကို သွားရောက်တိုက်ခိုက်ခဲ့ပြီး နံနက် ၁၀ နာရီခွဲခန့်မှ ၁၁ နာရီ ၂၀ မိနစ်အထိ မြို့တွင်း စစ်ဆေးရေးဂိတ်တစ်ခုကို သွားရောက်တိုက်ခိုက်ခဲ့သည်ဟု မင်းတပ် – CDF မှ ပြောရေးဆိုခွင့်ရှိသူ ဆလိုင်းဟာအွမ်က ပြောသည်။
“ကျနော်တို့ မြို့တွင်းကို ဝင်ရောက်စီးနင်းလာပြီး၊ ချဉ်းကပ်လာတယ်ဆိုတာကို တကယ့်တိုက်ပွဲ ဖော်ဆောင်တာမျိုးမဟုတ်ဘဲ သတိပေးတဲ့ အနေအထားမျိုး ရှိသေးတယ်။ သတိပေးတဲ့အနေအထားမှာ ကျနော်တို့က ပိုစိမ့်ဝင်လာတယ်ဆိုတာကို ပြတဲ့ ပုံစံမျိုးပေါ့နော်၊ တကယ်တမ်း ဒီထက်ကြီးမားတဲ့ တိုက်ပွဲဖော်ဆောင်မှုမျိုးလုပ်ဖို့ ပြည်သူတွေရဲ့ အခြေအနေတခုကို စောင့်ကြည့်နေတယ်” ဟု သူက ပြောသည်။
ချင်းကာကွယ်ရေးတပ်-မင်းတပ်သည် မင်းတပ်မြို့အတွင်း နေရာအများစုကို ဝင်ရောက်နေရာယူစိုးမိုးထားပြီး ပိုမိုကြီးမားတဲ့ တိုက်ပွဲများအတွက် အခြေအနေနှင့် အချိန်တစ်ခုကို စောင့်နေသည်ဟု သူက ပြောသည်။
ယမန်နေ့က တိုက်ပွဲမှာ စစ်ကောင်စီဘက်က ထိခိုက်သေဆုံးမှုတွေရှိသော်လည်း ချင်းကာကွယ်ရေးတပ်ဖွဲ့ဘက်က အထိအခိုက်မရှိဘဲ ပြန်လည်ဆုတ်ခွာနိုင်ခဲ့ကြောင်း သိရသည်။
မကွေးတိုင်း၊ ယောနယ်ဘက်က စစ်ကောင်စီစစ်ကြောင်းသည် ချင်းပြည်နယ်၊ မင်းတပ်ဘက်ကို စစ်ကြောင်းထိုးလာနိုင်သောကြောင့် မင်းတပ်-ကံကြီး-ဆော လမ်းနှင့် မင်းတပ်-ကျောက်ထု လမ်းများကို အများပြည်သူ သွားလာခွင့်ပိတ်ထားကြောင်း မင်းတပ်-CDF က ထုတ်ပြန်ထားသည်။
ဇူလိုင် ၈ ရက်က မင်းတပ်မြို့နယ်၊ မရှိန်းလှော်အုပ်စု၊ ဝုမ်းခုန်ကျေးရွာရှိ ပြည်သူများနှင့် စစ်ဘေးရှာင်ပြည်သူများနေထိုင်ရာကို စစ်ကောင်စီက တိုက်လေယာဉ်ဖြင့် ပေါင် ၅၀၀ ဗုံးသီး ၂ လုံး၊ အတွဲလိုက် ဗုံးသီး ၄ လုံး၊ ရော့ကတ်၊ ပွိုင့်ဖိုက်ကျည်များနှင့် ပစ်ခတ်တိုက်ခိုက်ရာ ကလေးငယ် တစ်ဦးနှင့် နို့တိုက်မိခင်တစ်ဦးအပါအဝင် အရပ်သားပြည်သူ ၃ ဦး သေဆုံးပြီး တစ်ဦး ပြင်ထန်းစွာ ဒဏ်ရာရရှိခဲ့ကြောင်း သိရသည်။