ချင်းပြည်နယ် မင်းတပ်မြို့နယ် ခွီးရိန်ကျေးရွာမှာ စစ်ကောင်စီတပ်နဲ့ ချင်းကာကွယ်ရေးတပ်ဖွဲ့(CDF-Mindat) တို့ ယမန်နေ့ (ဒီဇင်ဘာလ ၂၂) ရက် မွန်းလွဲပိုင်း ၂ နာရီခွဲခန့်က တိုက်ပွဲထပ်မံဖြစ်ပွားပြီး စစ်ကောင်စီဖက်က ၃ ဦးသေဆုံးကာ ထိခိုက်ဒဏ်ရာရရှိသူများလည်းရှိတယ်လို့သိရပါတယ်။
“ဟိုတနေ့က ဝမ္မသူးရွာမှာဖြစ်တယ် ဝမ္မသူးရဲ့အပေါ်နားလေးမှာ ခွီးရိန်ရွာဆိုတာရှိတယ် အဲဒီခွီးရိန်ရွာမှာ မနေ့က ၂ နာရီခွဲ ၃ နာရီဝန်းကျင်လောက်မှာဖြစ်တာ၊ စကစတွေက ရွာထဲဝင်လာတော့ ရွာထဲကဘုန်းကြီးကျောင်းရှေ့ဘက်ကိုတက်လာတာ ကျနော်တို့အဖွဲ့ကစောင့်နေတာပေါ့နော် အဲဒီမှာတိုက်ပွဲဖြစ်ကြတယ်’’ ဟု CDF-Mindat ပြောရေးဆိုခွင့်ရှိသူဆလိုင်းယောမန် ကပြောပါတယ်။
တစ်နာရီကျော်ကြာဖြစ်ပွားတဲ့အဲဒီတိုက်ပွဲမှာ စစ်ကောင်စီဘက်က ၃ ဦးသေဆုံးပြီး အနည်းဆုံး ၅ ဦးခန့်ဒဏ်ရာရရှိခဲ့ကြ တယ်လို့ ဆလိုင်းယောမန်ကပြောပါတယ်။
စစ်ကောင်စီတပ်ဖွဲ့ဝင်တွေဟာ စစ်ကြောင်း ၂ ကြောင်းနဲ့ မင်းတပ်မြို့နယ်ထဲကို ထိုးစစ်ဆင်လာပြီးနောက် ဒီဇင်ဘာလ ၁၉ ရက်နေ့ကစလို့ ရှစ်မွှေး၊ လာပန်း၊ ဝမ္မသူး၊ လှိရုံးကျေးရွာဘက်မှာ CDF-Mindat နဲ့ နေ့စဉ်ဆက်တိုက် တိုက်ပွဲဖြစ်ပွားနေခဲ့တာဖြစ်ပါတယ်။
စစ်ကောင်စီ စစ်ကြောင်း ၂ ကြောင်းဟာ ယမန်နေ့က ခွီးရိန်ကျေးရွာမှာ လာပေါင်းသွားပြီဟုယူဆရပြီး အင်အား ၁၅၀ ကျော်ခန့်ရှိမယ်လို့သိရပါတယ်။
