(01RB)
မိုခါဆိုင်ကလုန်းမုန်တိုင်းကြောင့် ချင်းပြည်နယ်မှာ လူနေအိမ် ၁၇၀၀ ကျော် ပျက်စီးခဲ့တယ်လို့ ကြားကာလချင်းအမျိုးသား အတိုင်ပင်ခံကောင်စီ (ICNCC) က မေလ ၁၇ ရက်နေ့စွဲနဲ့ ထုတ်ပြန်ပါတယ်။
အလွန်အားကောင်းသော မိုခါဆိုင်ကလုန်းမုန်တိုင်းဟာ မေလ ၁၄ ရက်နေ့က ရခိုင်ကမ်းရိုးတန်းကို စစ်တွေမြို့အနီးက ဖြတ်ကျော်ဝင်ရောက်ခဲ့ကာ ချင်းပြည်နယ်ဘက်ကိုလည်း တစ်နာရီ မိုင် (၅၀) ကနေ (၇၀) အထိ တိုက်ခိုက်ဝင်ရောက်ခဲ့တာဖြစ်ပါတယ်။
မိုခါဆိုင်ကလုံးမုန်တိုင်းကြောင့် ချင်းပြည်နယ် ၉ မြို့နယ်စလုံးအနက် မတူပီ၊ ပလက်၀နဲ့ မင်းတပ်မြို့နယ်တို့မှာ ထိခိုက်ပျက်စီးမှုအများဆုံးခဲ့ရှိပြီး ချင်းပြည်နယ်တဝန်းလုံးမှာ လူနေအိမ်ခြေ ၁၇၇၄ အိမ်ပျက်စီးခဲ့သည်ဟု ICNCC ကဆိုပါတယ်။
ICNCC ရဲ့မှတ်တမ်းအရ မတူပီမြို့နယ်မှာ အိမ်ခြေ ၈၈၇၊ မင်းတပ်မြို့နယ်မှာ ၃၆၄၊ ပလက်ဝမြို့နယ်မှာ ၂၂၀၊ ကန်ပက်လက်မြို့နယ်မှာ ၁၁၂ ၊ ဟားခါးမြို့နယ်မှာ ၈၅၊ ဖလမ်းမြို့နယ်မှာ ၇၄ ၊ ထန်တလန်မြို့နယ်မှာ ၂၇၊ တီးတိန်မြို့နယ်မှာ ၅ အိမ် နဲ့ တွန်းဇံမြို့နယ်မှာတော့ အပျက်အစီးမရှိဘူးလို့ သိရပါတယ်။
ဒါ့အပြင် မတူပီမြို့နယ်မှာ ဘာသာရေးအဆောက်အဦး ၇ ခု၊ ကျန်းမာရေးအဆောက်အဦး ၄ ခု၊ စာသင်ကျောင်း ၁ ဆောင်၊ မင်းတပ်မြို့နယ်မှာ ဘာသာရေးအဆောက်အဦး ၇ ခု၊ စာသင်ကျောင်း ၁၈ ဆောင်၊ စပါးကျီ ၁၇ ခု၊ ကန်ပက်လက်မြို့နယ်မှာ ဘာသာရေးအဆောက်အဦး ၃ ခု၊ စာသင်ကျောင်း ၅ ခု၊ စပါးကျီ ၂ ခု၊ ဖလမ်းမြို့နယ်မှာ ဘာသာရေးအဆောက်အဦး ၉ ခု၊ စာသင်ကျောင်း ၅ ခုနဲ့ ဟားခါးမြို့နယ်မှာ ဘာသာရေးအဆောက်အဦး ၁ ခု ပျက်စီးခဲ့တယ်လို့ သိရပါတယ်။
ယခုစာရင်းဟာ မေလ ၁၇ ရက်နေ့အထိ ရရှိထားသောစာရင်းဖြစ်ပြီး ဆက်သွယ်ရေးအခက်အခဲများကြောင့် အချိန်နဲ့အမျှ အပြောင်းအလဲရှိနိုင်တယ်လို့ ICNCC ကဆိုပါတယ်။
မိုခါဆိုင်ကလုန်းမုန်တိုင်းဘေးသင့်မြို့နယ်တွေအတွက် ပျက်စီးသွားသော လူနေအိမ်နဲ့ အခြားအဆောက်အဦးတွေပြန်လည်ပြုပြင်ဖို့ အိမ်မိုးသွပ်ပြား၊ အိမ်ရိုက်သံ၊ မိုးကာနဲ့ တာလပတ်တွေ၊ စပါးကျီပျက်စီးသွားတဲ့ဒေသတွေအတွက် ဆန်ရိက္ခာ၊ အခြေခံစားသောက်ကုန် နဲ့ အခြေခံအိမ်သုံးဆေးဝါးတွေလည်း အရေးပေါ်လိုအပ်ချက်ရှိနေတယ်လို့ ICNCC က ထုတ်ပြန်ထားပါတယ်။
ယခုလက်ရှိ ချင်းပြည်နယ်မှာ အင်တာနက်လိုင်း၊ ဖုန်းဆက်သွယ်ရေးလိုင်းတွေပါ ပြတ်တောက်နေတာကြောင့် ပြည်နယ်အတွင်းရှိ မုန်တိုင်းကြောင့် ထိခိုက်ပျက်စီးမှု အသေးစိတ်သတင်းအချက်အလက်ရရှိဖို့ ခက်ခဲနေတယ်လို့လည်း ICNCC က ဆိုပါတယ်။
