မီဇိုရမ်တွင် မြန်မာစစ်ဘေးရှောင် ၃၄၀၀၀ ကျော်ရှိနေ

(005MK)

မြန်မာနိုင်ငံမှာ စစ်အာဏာသိမ်းမှုဖြစ်ပွားသည့် ၂၀၂၁ ခုနှစ်နောက်ပိုင်းကစ၍ စစ်ရေးအခြေအနေကြောင့် မီဇိုရမ်ပြည်သို့ ထွက်ပြေးခိုလုံလာသူ မြန်မာစစ်ဘေးရှောင် ၃၄၀၀၀ ကျော်ရှိသည်ဟု မီဇိုရမ်အစိုးရ၏ စာရင်းအရသိရသည်။

မီဇိုရမ်ပြည်ထဲရေးဝန်ကြီးဌာန၏ နောက်ဆုံးသတ်မှတ်ထားသော စာရင်းအရ ယခုလက်ရှိ မီဇိုရမ်ပြည်နယ်တွင် မြန်မာ စစ်ဘေးရှောင် ၃၄၃၄၆ ဦးရှိပြီး ယင်းအနက် ကလေးငယ် ၁၃၀၀၀ ကျော်ရှိသည်ဟု သိရသည်။

မေလ ၄ ရက်နေ့အထိ ကောက်ယူထားသောစာရင်းအရ မီဇိုရမ်ပြည်နယ်အတွင်းရှိ ခရိုင်အသီးသီးတွင် စစ်ဘေးရှောင် စခန်း (Relief Camp) ၁၄၉ ခုရှိပြီး စစ်ဘေးရှောင် ၁၆၄၄၅ ဦးမှာ ယင်းစစ်ရှောင်စခန်းများတွင်နေထိုင်ကြသည်ဟု ဆိုသည်။

စစ်ဘေးရှောင်အများစုဖြစ်သည့် လူဦးရေ ၁၇၉၀၁ ဦးမှာ စစ်ရှောင်စခန်းများတွင် နေထိုင်ခြင်းမရှိဘဲ စခန်းပြင်ပတွင် နေထိုင်ကြသည်ဟု သိရသည်။

မြန်မာနိုင်ငံကစစ်ဘေးရှောင်များသည် မီဇိုရမ်ပြည်နယ်သို့ အချိန်အတိုင်းအတာတခုထိ အလုံးအရင်းဖြင့် ဝင်ရောက်လာခြင်းမရှိခဲ့သော်လည်း ပြီးခဲ့သည့်ရက်ပိုင်းအတွင်း အလုံးအရင်းဖြင့်ဝင်လာရောက်လာမှု ၃ ကြိမ် ခန့်ရှိခဲ့သည့်အတွက် စစ်ဘေးရှောင်ဦးရေမှာလည်း တိုးလာခြင်းဖြစ်သည်ဟု သိရသည်။

မီဇိုရမ်ပြည်နယ် ကျန်ဖိုင်းခရိုင်ထဲတွင် မြန်မာစစ်ဘေးရှောင်အများဆုံးနေထိုင်ကြပြီး ၁၄၄၉၉ ဦးရှိသည်ဟုသိရသည်။

ရှာဟာခရိုင်ထဲတွင် ၆၀၄၄ ဦး၊ လောင်တလိုင်ခရိုင်ထဲတွင် ၅၉၂၂ နှင့် အိုင်ဇောလ်ခရိုင်ထဲတွင် ၂၂၉၁ ဦးရှိသည်ဟု သိရသည်။

အလားတူ ခေါဇောလ်ခရိုင်ထဲတွင် မြန်မာစစ်ဘေးရှောင် ၁၃၄ ဦး၊ ကော်လစစ်ခရိုင်ထဲတွင် ၁၃၉ ဦးနှင့် ဆိုင်းသွလ်းခရိုင်ထဲတွင် ၂၁၁ တို့ရှိကြသည်ဟု သိရသည်။