(004SS)
မီဇိုရမ်ပြည်နယ်၊ အိုင်ဇောလ်မြို့တွင် ကျင်းပပြုလုပ်သော ခရိုင်အဆင့် သိပ္ပံနှင့် သင်္ချာအိုလံပစ် (Science & Mathematics Olympiad) စာမေးပွဲတွင် မြန်မာစစ်ဘေးရှောင်ကျေားသား ၂ ဦးတို့ ပထမအဆင့် ဆွတ်ခူးနိုင်ခဲ့ကြောင်း သိရသည်။
၂၀၂၃-၂၀၂၄ ပညာသင်နှစ်အတွက် မတ်လ ၂၀ ရက်နေ့က ကျင်းပသော ယင်းစာမေးပွဲကို အိုင်ဇောလ်ခရိုင်အတွင်းရှိ အလယ်တန်းနှင့် အထက်တန်းကျောင်းများမှ ကိုယ်စားပြု ကျောင်းသူ/ကျောင်းသားများက ၀င်ရောက်ယှဉ်ပြိုင်ခဲ့ကြသည်။
ထိုသို့ယှဉ်ပြိုင်ရာတွင် Solomon ‘High School တွင်ပညာသင်ကြားနေသော ဂန်ဂေါမြို့မှ စစ်ဘေးရှောင် မသူသူဟန်နှင့် Seling ကျေးရွာ Don Bosco Catholic ကျောင်းတွင် တက်ရောက်နေသော မင်းတပ်မြို့နယ်မှ စစ်ဘေးရှောင် ဆလိုင်းပီတာဟုန်းတို့က ၉ တန်းအဆင့် ယှဉ်ပြိုင်မှုတွင် ပထမဆု ဆွတ်ခူးခဲ့ကြခြင်းဖြစ်သည်။
အဆိုပါပြိုင်ပွဲသည် မီဇိုရမ်ပြည်နယ်က ကျောင်းသူ/ကျောင်းသားများအနေဖြင့် သိပ္ပံနှင့် သင်္ချာတွင် ပိုမိုထူးချွန်လာစေရေးအတွက် ရည်ရွယ်ကျင်းပလေ့ရှိသည့် ပြိုင်ပွဲဖြစ်ပြီး ခရိုင်အဆင့် နှင့် ပြည်နယ်အဆင့်ဟူ၍ ၂ မျိုးခွဲခြားထားသည်။
မသူသူဟန် နှင့် ဆလိုင်းပီတာဟုန်းတို့သည် အိုင်ဇောလ်ခရိုင်အဆင့် ၉ တန်းပြိုင်ပွဲတွင် ပထမအဆင့်အသီးသီး ဆွတ်ခူးနိုင်ခဲ့ကြခြင်းဖြစ်သည်။
“သမီးလေး သူသူဟန်ဆိုရင် ဗမာစကားပဲတတ်တာ၊ မီဇိုးလိုဘာမှ မတတ်ဘူး၊ စာသင်တဲ့ခါ ဘာသာစကားမတူတော့ အခက် အခဲတော့အများကြီးပေါ့ ဒါပေမဲ့ သူက ကြိုးစားတယ်၊ သူကြိုးစားရင်းနဲ့ တစ်ခြားကျောင်းသားတွေထက် အမှတ်တွေပိုများ ေလ့ရှိတယ်” ဟု Solomon’ High School မှ ကျောင်းအုပ်ကြီးက ပြောသည်။
မသူသူဟန် နှင့် ဆလိုင်းပီတာဟုန်းတို့သည် မြန်မာနိုင်ငံမှာ စစ်အာဏာသိမ်းမှု ဖြစ်ပွားသည့်နောက်ပိုင်းတွင် မီဇိုရမ်ပြည်နယ် ဘက်သို့ စစ်ဘေးရှောင်လာကြသူများဖြစ်ကြပြီး အစကနဦးပိုင်းတွင် ဘာသာစကားအခက်အခဲရှိခဲ့ကြသော်လည်း ကြိုးကြိုးစားစားဖြင့် လေလာသင်ကြားကြသည့်အတွက် ယခုကဲ့သို့ အခြေအနေသို့ ရောက်ရှိလာခြင်းဖြစ်သည်ဟု သိရသည်။
မီဇိုရမ်ပြည်နယ်တွင် ၎င်းတို့နည်းတူ အစိုးရကျောင်းနှင့် ပုဂ္ဂလိကကျောင်းများတွင် မြန်မာနိုင်ငံက စစ်ဘေးရှောင် ကလေးငယ်များ ထောင်နှင့်ချီ ပညာသင်ကြားလျှက်ရှိကြသည်။
