ချင်းပြည်နယ်အတွင်း တိုက်ပွဲများပြင်းထန်လာသည့်အတွက် ယခုရက်ပိုင်းအတွင်း မီဇိုရမ်ပြည်နယ်ကို ထွက်ပြေး တိမ်းရှောင်လာသူ စစ်ဘေးဒုက္ခသည် တိုးလာသည့်အတွက် မီဇိုရမ်ပြည်နယ်ဝန်ကြီးချုပ် Pu Zoramthanga နှင့် Young Mizo Association (YMA) ခေါင်းဆောင်များ ဇွန်လ ၁၅ ရက်နေ့က တွေ့ဆုံးပြီး မြန်မာစစ်ဘေးရှောင်အရေး ဆွေးနွေးခဲ့ကြသည်။
အဆိုပါတွေ့ဆုံပွဲတွင် မီဇိုရမ်ပြည်နယ်ဝန်ကြီးချုပ် Pu Zoramthanga က “စစ်ဘေးရှောင်များကို ကူညီစောင့်ရှောက် ရာတွင် NGO များ၏ လုပ်ဆောင်မှုများကို အထူးလေးစားကြောင်း၊ အစိုးရအနေဖြင့်လည်း စစ်ဘေးရှောင်များအတွက် ယာထားပြီးသားဖြစ်သောဘဏ္ဍာငွေလည်း ကျလာ
ခါနီးစပ်ပြီး အစိုးရအနေဖြင့် စစ်ဘေးရှောင်များကို အတတ်နိုင်ဆုံးကူညီဆောင်ရွက်သွားမယ်” ဟု ပြောသည်။
စစ်ဘေးရှောင်များ၏ နေရာထိုင်ခင်း၊ စားနပ်ရိက္ခာများကိုလည်း အိန္ဒိယ ဗဟိုအစိုးရထံတောင်ဆိုထားပြီဖြစ်ကြောင်း ဝန်ကြီးချုပ်က ဆက်ပြောပါသည်။
ပြီးခဲ့သည့်ရက်ပိုင်းအတွင်း ချင်းဒေသကာကွယ်ရေးအဖွဲ့ CDF နှင့် အာဏာသိမ်းစစ်ကောင်စီတို့ ချင်းပြည်နယ် ထန်တလန်မြို့နယ်တွင် တိုက်ပွဲဖြစ်ပြီးနောက် မီဇိုရမ်ပြည်နယ်တွင်တိမ်းရှောင်ဖို့ ထွက်ပြေးလာကြရင်း နယ်စပ်ဒေသ တွင် သောင်တင်နေသော စစ်ဘေးဒုက္ခသည် ၇၁ ဦးကို Vaphai ကျေးရွာလူထုများက ဇွန်လ ၁၄ ရက်နေ့ညတွင် သွားပြီး ကယ်တင်ခေါ်ထုတ်ခဲ့ကြကြောင်း ဒေသသတင်း Zonet တွင် ဖော်ပြသည်။
အဆိုပါ စစ်ဘေးရှောင် ၇၁ ဦးတို့ကို ကိုဗစ်-၁၉ ရောဂါဘေးမှကာကွယ်သည့်အနေဖြင့် Vaphai ကျေးရွာလူထုများနဲ့ အတူမထားဘဲ Thlangthlak mual နေရာတွင်ရှိသော Zokhua အိမ်အသီးသီးတို့တွင် ထားရှိကြပြီး၊ တိုက်ပွဲကြားမှထွက်ပြေးလာကြသူများဖြစ်သည့်အတွက် ဘာပစ္စည်းတစ်ခုမှ သယ်ဆောင်လာနိုင်ခြင်း မရှိသောကြောင့် စစ်ဘေးရှောင်များ နေထိုင်စားသောက်ရေးအတွက် Vaphai ကျေးရွာလူထုများက စီစဉ်ပေးခဲ့ကြကြောင်း သိရသည်။
