|| စစ်ကောင်စီဘက်က ၁၀ ဦးခန့် သေဆုံး၊ အများအပြားဒဏ်ရာများရရှိ
(006SV)
မကွေး- ရခိုင်နယ်စပ်၊ ငဖဲမြို့နယ် အမ်း- ပဒါန်းလမ်းပိုင်းတွင် အမ်းမြို့ဘက် ရိက္ခာပို့ပြန်လာသည့် စစ်ကောင်စီယာဉ်တန်းကို တော်လှန်ရေးပူးပေါင်းတပ်ဖွဲ့က ကြားဖြတ်တိုက်ခိုက်ရာ စစ်ကောင်စီဘက်က ၁၀ ဦးခန့်သေဆုံးပြီး အများအပြား ဒဏ်ရာများရရှိခဲ့ကြောင်း အရှိုချင်းကာကွယ်ရေးတပ်၊ သတင်းပြန်ကြားရေးတာဝန်ခံက ပြောသည်။
အောက်တိုဘာလ ၂၈ ရက်က မင်းဘူးခရိုင်၊ ငဖဲမြို့နယ်၊ အမ်း- ပဒါန်း လမ်းပိုင်းတွင် အမ်းမြို့နယ်ဘက်မှ ရိက္ခာပို့ပြီး ပြန်လာသော စစ်ကောင်စီစစ်ကား ၂ ဦး၊ ဆိုင်ကယ် ၂ စီးဖြင့် အင်အား ၄၀ ခန့် ပါဝင်သည့် ယာဉ်တန်းကို အရှိုချင်းကာကွယ်ရေးတပ် – ACDF နှင့် မဟာမိတ် မင်းဘူးခရိုင်တပ်ရင်း – ၂ တို့က ပူးပေါင်းတိုက်ခိုက်ခြင်းဖြစ်သည်။
“ပဒါန်းနဲ့ အမ်းဘက်ကို ရိက္ခာပို့ပြီးတော့ ပြန်လာတယ်။ အဲဒါကို သတင်းရလို့ ကျနော်တို့ မဟာမိတ် ၂ ဖွဲ့က ကင်းပုန်းစောင့်တယ်။ ခြုံခိုတိုက်ခိုက်ခဲ့တာမှာ မျက်မြင်ကိုယ်တွေ့ သေတာတွေလည်းရှိတယ်။ ဒဏ်ရာအများအပြား ရတာတွေလည်းရှိတယ်” ဟု ACDF ပြန်ကြားရေးတာဝန်ခံက ပြောသည်။
သတင်းအတိအကျ ရရှိထားသည့် စစ်ယာဉ်တန်းကို အမ်း- ပဒါန်းကားလမ်းမဘေးရှိ စပ်စီကျေးရွာအနီး ဝက်စာကျင်းလမ်းဆုံတွင် တော်လှန်ရေးပူးပေါင်းတပ်ဖွဲ့က စောင့်ကြိုတိုက်ခိုက်ခဲ့ခြင်းဖြစ်သည်ဟု ACDF က အောက်တိုဘာလ ၃၀ ရက် ယနေ့ရက်စွဲဖြင့် လည်း ထုတ်ပြန်ထားသည်။
တိုက်ပွဲမှာ နာရီဝက်ခန့် ကြာမြှင့်ခဲ့ပြီး စစ်ကောင်စီဘက်က ထိခိုက်သေဆုံးမှုများ များပြားခဲ့သော်လည်း တော်လှန်ရေး မဟာမိတ်တပ်ဖွဲ့ဘက်မှ အထိအခိုက်မရှိ ပြန်လည်ဆုတ်ခွာနိုင်ခဲ့ကြောင်း သိရသည်။
စစ်ကောင်စီယာဉ်တန်းမှ တပ်ဖွဲ့များသည် မည်သည့်တပ်ရင်းမှ ဖြစ်သည်ကို မသိရသေးသော်လည်း လက်နက်အသုံးပြုတိုက်ခိုက်မှုအခြေအနေအရ ကပစတပ်စခန်းများမှဖြစ်နိုင်ကြောင်း ယင်းပြန်ကြားရေးတာဝန်ခံက ပြောသည်။
အမ်း- ပဒါန်လမ်းပိုင်းတွင် အောက်တိုဘာလ ၂၈ ရက်က ယင်းသို့ ကြားဖြတ်တိုက်ခိုက်ခံရပြီးနောက် အမ်းမြို့နယ်သို့ ထောက်ပို့သွားသော စစ်ကောင်စီ ယာဉ် ၁ စီးသည် တိုက်ခိုက်ခံရမည်ကို စိုးရိမ်းသောကြောင့် ကားကို အရှိမ်မြန်မြန်ဖြင့် မောင်းနှင်ရာ အောက်တိုဘာလ ၂၉ ရက် ညပိုင်းက အမ်း- ပဒါန်း တောင်ပေါ်လမ်းတစ်နေရာတွင် ချောက်ထဲကျသွားခဲ့ကြောင်း သိရသည်။
ယင်းဖြစ်စဉ်တွင် စစ်ကောင်စီဘက်က တပ်ဖွဲ့ဝင် ၁၂ ဦး သေဆုံးပြီး ၆ ဦးခန့်သာ အသက်ရှင်ကျန်ရစ်ခဲ့ကြောင်း၊ သေဆုံး အလောင်း များကို စစ်ကောင်စီမှလာရောက်၍ ပြန်လည်သယ်ဆောင်သွားခဲ့ကြောင်း ပြန်ကြားရေးတာဝန်ခံက ပြောသည်။
ရခိုင်ပြည်နယ်၊ အမ်းမြို့ရှိ အနောက်ပိုင်းတိုင်းစစ်ဌာနချုပ် ကို အာရက္ခတပ်တော် AA/ ULA နှင့် မဟာမိတ်ပူးပေါင်းတပ်များက အပြီးသတ် သိမ်းနိုင်ရေး ထိုးစစ်ဆင်နေချိန်တွင် စစ်ကောင်စီသည် မကွေးတိုင်းဘက်၊ ပဒါန်းမှ အမ်းဘက်ကို ထောက်ပို့ရေး လမ်းကြောင်းအဖြစ် အသုံးပြုနေကြောင်း သိရသည်။
အမ်း – ပဒါန်းလမ်းပေါ်တွင် တိုက်ပွဲများ အချိန်မရွေး ထပ်မံဖြစ်ပွားနိုင်သောကြောင့် ဒေသခံပြည်သူများ သတိပြုသွားလာကြရန် တော်လှန်ရေးအင်အားစုများက သတိပေးထားသည်။
