(003PT)
ဦး မန်မွန်းပြောင်ကို CDF-Tonzang တပ်ရင်း ၂ အဖွဲ့က သြဂုတ်လ ၁၈ ရက်နေ့တွင် ဖမ်းဆီးခဲ့ပြီးနောက် သတ်ဖြတ်ခဲ့သည့် ဖြစ်စဥ်နှင့်ပက်သက်ပြီး အမေရိကန်ပြည်ထောင်စုအခြေစိုက် ဇိုချင်းမျိုးနွယ်စု United Zo Organization (USA) က ကန့် ကွတ်ရှုတ်ချလိုက်သည်။
စစ်ကိုင်းတိုင်း၊ ခမ်းပတ်မြို့ အမှတ် (၁) ရပ်ကွက်တွင်နေထိုင်သူ အသက် ၃၈ နှစ်အရွယ် ဦးမန်မွန်းပြောင်သည် တော်လှန်ရေးနှောက်ယှက်မှု၊ ငွေကြေးလိမ်လည်မှုနင့် သတင်းပေးဒလန် ဆောက်ရွက်မှုတွေ တွေ့ရှိရသည်ဟု စွပ်စွဲချက်ဖြင့် CDF-Tonzang တပ်ရင်း (၂) က ပြီးခဲ့သည့် သြဂုတ်လ ၂၂ ရက်နေ့တွင် သုတ်သင်ရှင်းလင်းခဲ့ခြင်းဖြစ်သည်။
သားသမီး ၅ ဦး၏ ဖခင်ဖြစ်သူ အသက် ၃၈ နှစ်အရွယ်ဦး မန်မွန်းပြောင်သည် ကလေးမြို့ တက္ကသိုလ်တွင် သမိုင်းဘာသာဖြင့် ဝိဇ္ဇာဘွဲ့ရရှိသူဖြစ်သည့်အပြင် လက်ရှိ နေထိုင်ရာ ခမ်းပတ်မြို့ အမှတ် (၁) ရပ်ကွက်ဥက္ကဌ အဖြစ်လည်းကောင်း၊ ချင်းလူငယ် အဖွဲ့စည်း Zo Youth Organization အဖွဲ့၏ ဥက္ကဌရာထူး တာဝန်ထမ်းဆောင်နေသူဖြစ်ပြီး ချင်းလူမျိုးအတွက် ကျရာတာဝန်များကို ကြိုးစားအားထုတ် ဆောင်ရွက်နေသူတစ်ဦးဖြစ်သည်ဟု ဩဂုတ်လ ၂၉ ရက်နေ့ကထုတ်ပြန်သော United Zo Organization (USA) ၏ ထုတ်ပြန်ချက်တွင် ဖော်ပြသည်။
![](https://khonumthung.org/wp-content/uploads/2023/09/United-Zo-Organization-USA.jpeg)
CDF-Tonzang တပ်ရင်း ၂ အနေဖြင့် ဦးမန်မွန်းပြောင်းအား အပြစ်မရှိအပြစ်ရှာကာ အပြစ်ကျူးလွန်ကြောင်း မတရားခံဝန် ကတိထိုးခိုင်းပြီးနောက် သတ်ဖြတ်ခဲ့ခြင်းဖြစ်ပြီး ရုပ်လောင်းကိုလည်း ယနေ့ထိ ပြန်မပေးသည့်အတွက် အလောင်းကို သဂြိုလ်ခွင့်မရရှိခဲ့သည်မှာ ဇိုချင်းထုံးတမ်းဓလေ့ကို အလေးမထားသည့်အပြင် မထီမဲ့ပြုခြင်းသာဖြစ်သည်ဟု UZO (USA) က ဆိုသည်။
NUG အစိုးရ၏ ထုတ်ပြန်ထားသည့် လက်နက်ကိုင်အဖွဲ့စည်းများ၏ ကျင့်ဝတ်နှင့် စည်းမျဥ်းဥပဒေများကို လိုက်ခြင်းမရှိဘဲ ဦးမန်မွန်းပြောင်အား သတ်ဖြတ်မှုမှာ ခွင့်လွတ်နိုင်သည့်ကိစ္စမဟုတ်သည့်အပြင် အမှန်တရား နှင့် တရားမျှတမှုရရှိ သည်အထိ ဖြေရှင်းသွားမည်ဟု United Zo Organization (USA) က ထုတ်ပြန်ထားသည်။
ဦးမန်မွန်းပြောင် သတ်ဖြတ်ခံရသည့်ကိစ္စနှင့်ပတ်သက်၍ CDF-Tonzang တပ်ဖွဲ့ဗဟိုဌာနချုပ်ကလည်း ဩဂုတ်လ ၂၇ ရက် နေ့က ကြေညာချက်ထုတ်ပြန်ကာ CDF-Tonzang တပ်ရင်း (၃)၊ တပ်ခွဲ (၃) ၏ တပ်ခွဲမှူးဖြစ်သော ဦးမန်မွမ်းပြောင်ကို အပြစ်မရှိ၊ အပြစ်ရှာပြီး အချင်းချင်း ရက်ရက်စက်စက် သတ်ဖြတ်လိုက်ခြင်းကြောင့် CDF – တွန်းဇံ တပ်ရင်း (၂) တစ်ခုလုံးကို အဖွဲ့၀◌င်အဖြစ်မှ တရားဝင် ထုတ်ပယ်လိုက်သည်ဟု ဖော်ပြထားသည်။