(004SS)
စစ်ကိုင်းတိုင်း ကလေးမြို့နယ်၊ မွန်းလိုင်ရပ်ကွက်နေ အသက် ၁၀ နှစ်အရွယ် ချင်းအမျိုးသမီးငယ်၂ ဦးသည် ကားမဲလ် ဆုတောင်းတောင် သွားရာလမ်းရှိ ဆည်ကြီးချောင်း (ခ) ကွဲချောင်းကို ဖြတ်ကူးစဉ် ရေနစ်ပြီး သေဆုံးခဲ့ကြောင်း ဒေသခံများထံမှ သိရသည်။
သေဆုံးသွားသူများမှာ အသက် ၁၀ နှစ်ဝန်းကျင်ရှိ Lia Cing San Nuam နှင့် Lia Nuam Lam Cing တို့ဖြစ်ကြသည်။
ဖြစ်စဉ်မှာ စက်တင်ဘာလ ၆ ရက်နေ့မနက်ပိုင်း ၇ နာရီဝန်းကျင်တွင် သေဆုံးသွားသူ ၂ ဦးသည် ၎င်းတို့၏ သူငယ်ချင်းတစ်ဦးနှင့်အတူ မွန်လိုင်ရပ်ကွက်မှ ကားမဲလ်ဆုတောင်းတောင် တက်ရန်သွားရောက်ခဲ့ကြရာ ဆင်ရွာအကျော်ရှိ ချောင်းကို ဖြတ်ကူးရစဉ်တွင် ရေစီးနှင့်အတူ မျောပါသွားခဲ့ကြခြင်းဖြစ်သည်။
ကျန်တစ်ဦးမှာ ရေစီးသန်သည့်အတွက် ချောင်းကိုမဖြတ်ကူးရဲဘဲ နေအိမ်သို့ပြန်လာပြီးနောက် အဖြစ်အပျက်အား ပြောပြခဲ့ရာ ဆွေမျိုးများနှင့် ရပ်ကွက်သူ/သားများက လူစုခွဲကာ ရှာဖွေကယ်ဆယ်ရေးလုပ်ငန်းများ စတင်ဆောင်ရွက်ခဲ့ကြသည်။
“သူတို့ သူငယ်ချင်းသုံးယောက် ကားမဲလ်တောင်တက်ဖို့ သွားတာပါ၊ နှစ်ယောက်က ချောင်းဖြတ်ကူးတဲ့ချိန်မှာ ရေနစ်သွားတာပေါ့နော်။ ကျနော်အဒေါ်ရဲ့သမီး နူးနူးကိုကျတော့ ဆေးရုံကို ပို့လိုက်သေးတယ်။ သူကတော့ဆေးရုံရောက်ပြီးမှ ဆုံးသွားတာပေါ့နော်။ နောက် သူ့ရဲ့သူငယ်ချင်းတစ်ယောက်ကကျတော့ ကျောက်တုံးတွေကြားမှာ တွေ့ရှိရတာပေါ့၊ သူကတော့ချောင်းမှာတင် ဆုံးသွားပြီပေါ့နော်။ အဆိုးထဲကနေ ကျေးဇူးတော်ကြောင့် အလောင်းကို ပြန်တွေ့တယ်ဆိုတော့ ကောင်းကောင်းမွန်မွန် သဂြိုလ်ခွင့်ရတာကိုပဲ ကျေးဇူးတင်ရမှာပေါ့နော်” ဟု Lia Cing San Nuam (ခ) နူးနူး၏ ဝမ်းကွဲအကိုဖြစ်သူက ပြောသည်။
သေဆုံးသွားသူ ၂ ဦး၏ ရုပ်အလောင်းကို တာဟန်း-ပြည်တော်သာလမ်းမပေါ်ရှိ ဆည်ကြီးချောင်းကူးတံတား အောက်ဘက်နှင့် တံတားအထက်ဘက်ရှိ ကျောက်တုံးများကြားတွင် တွေ့ရှိခဲ့ခြင်းဟု သိရသည်။
Lia Cing San Nuam ၏ ရုပ်အလောင်းကို ယနေ့ စက်တင်ဘာလ ၇ ရက်နေ့ ညနေ ၂ နာရီတွင် သင်္ဂြိုဟ်မည်ဖြစ်ပြီး Lia Nuam Lam Cing ၏ ရုပ်အလောင်းကိုမူ စက်တင်ဘာလ ၈ ရက်နေ့ မနက်ပိုင်း ၉ နာရီတွင် ခရစ်ယာန်ထုံးစံအတိုင်း မြေမြုပ်သင်္ဂြိုဟ်မည်ဟု သိရသည်။
