စစ်ကိုင်းတိုင်း ကလေးမြို့တွင် ယနေ့မနက်ပိုင်းက အင်အား ၄၀ ခန့်ရှိသော စစ်ကောင်စီတပ်ဖွဲ့ မိုင်းဆွဲတိုက်ခိုက်ခံရပြီး အရာရှိတစ်ဦးအပါဝင် ၃ ဦးသေဆုံးခဲ့သည်ဟု PDF (Kalay) က ထုတ်ပြန်သည်။
ကလေးမြို့တက္ကသိုလ်ဘက်မှ ဗိုလ်ချုပ်လမ်းအတိုင်း အရှေ့ဘက်ကို ခြေလျှင်ဖြင့်ဆင်းလာသော အင်အား ၄၀ ခန့်ရှိသည့် စစ်ကောင်စီတပ်ဖွဲ့ကို စက်မှုဇုန်တံတားအနီးတွင် PDF (Kalay) ၏ မြို့ပြပျောက်ကျား စစ်ဆင်ရေးတပ်ဖွဲ့က အသင့်တတ်ဆင်ထားသော မိုင်းများဖြင့် တိုက်ခိုက်ခဲ့ရာ စစ်ကောင်စီတပ်ဖွဲ့မှ အရာရှိတစ်ဦးအပါအဝင် ၃ ဦးဆေသုံးခဲ့ပြီး ၁၀ ဦးထက်မနည်း ထိခိုက်ဒရာရရှိခဲ့သည်ဟု ယင်းထုတ်ပြန်ချက်တွင် ဖော်ပြထားသည်။
မိုင်းဆွဲတိုက်ခိုက်ခံရသော စစ်ကောင်စီတပ်ဖွဲ့သည် ကြောက်လန့်တကြား ရမ်းသန်းပစ်ခတ်မှုများပြုလုပ်ခဲ့ပြီး အနီးပတ်ဝန်းကျင်မှ ပန်းရံလုပ်သား ၂ ဦးကို ဖမ်းဆီးခေါ်ဆောင်သွားသည်ဟု သိရသည်။
ယနေ့မနက် မိုင်းဆွဲတိုက်ခိုက်ရာနေရာအနီးတွင် ဖြတ်သန်းသွားလာသော ပြည်သူတစ်ဦး မိုင်းထိမှန်ခဲ့ပြီး ယင်းအတွက် အနူးအညွတ်တောင်းပန်ကြောင်းနှင့် ပြည်သူများအနေဖြင့် လုံခြုံရေးအထူးသတိပြု၍ စစ်ကောင်စီတပ်ဖွဲ့ကို ဝေးဝေးမှ ကြိုတင်ရှောင်ရှားကြပါရန်လည်း PDF (Kalay) ၏ ထုတ်ပြန်ချက်တွင် ဖော်ပြသည်။
