စစ်ကောင်စီရုံးစိုက်ရာ ဟားခါးမြို့တွင်း စစ်ဆင်ရေး ၁၅၀ ဖော်ဆောင်ခဲ့ဟုဆို
(006SV)
ဖက်ဒရယ်ပြည်ထောင်စု တည်ဆောက်ရေးနှင့် ကိုယ်ပိုင်ဌာန်းခွင့်ရရှိရေးအတွက် CDF – ဟားခါး၏ စစ်အာဏာရှင်တော်လှန်ရေး ၄ နှစ်အတွင်း ရဲဘော် ၅၀ ဦးကျော် ကျဆုံးခဲ့ပြီး ရဲဘော် ၁၈၀ ကျော် ထိခိုက်ဒဏ်ရာများ ရရှိသည်ဟု သိရသည်။
စစ်အာဏာသိမ်းအပြီး ၂၀၂၁ မတ်လ ၂၁ ရက်တွင် CDF ဟားခါးကို စတင်ဖွဲ့စည်းခဲ့ပြီး နွေဦးတော်လှန်ရေးတွင် ပါဝင်လာခဲ့ရာ စစ်ကောင်စီနှင့် တိုက်ပွဲပေါင်း ၃၂၆ ကြိမ် ဖြစ်ပွားခဲ့သည်ဟု CDF – ဟားခါးက ယနေ့ မတ်လ ၂၁ ရက် တော်လှန်ရေး ၄ နှစ်ပြည့် ထုတ်ပြန်လိုက်သည်။
တိုက်ပွဲများတွင် နိုင်ငံနှင့် လူမျိုးအတွက် CDF – ဟားခါး ရဲဘော် ၅၂ ဦး ကျဆုံးခဲ့ရပြီး ၁၈၃ ဦး ထိခိုက်ဒဏ်ရာများ ရရှိခဲ့သည်ဟု သိရသည်။
စစ်ကောင်စီ ပြည်နယ်အစိုးရ ရုံးစိုက်ရာ ဟားခါးမြို့တွင်း စစ်ဆင်ရေးကို အကြိမ်ပေါင်း ၁၅၀ တိုက်ပွဲဖော်ဆောင်နိုင်ခဲ့ပြီး ဟားခါးမြို့နယ်အတွင်း စစ်ကောင်စီ ထိုးစစ်ဆင်လာမှုအနေဖြင့် ၁၉ ကြိမ် ရှိခဲ့ရာ ၁၇ ကြိမ်မှာ ထိတွေ့တိုက်ပွဲများ ဖြစ်ပွား ခဲ့သည်ဟု သိရသည်။
အခြားသော မြို့နယ်များတွင် စစ်ကောင်စီ၏ စခန်းနှင့် မြို့သိမ်းစစ်ဆင်ရေးများတွင်လည်း တော်လှန်ရေးအင်အားစုများနှင့်အတူ ၁၂ ကြိမ် ပါဝင်တိုက်ခိုက်ခဲ့ပြီး စစ်ကောင်စီ စစ်ကြောင်း တိုက်ခိုက်ပစ်ခတ်မှုတွင် ၈ ကြိမ် ပါဝင်ဆင်နွှဲခဲ့သည်ဟု သိရသည်။
တော်လှန်ရေး ၄ နှစ်တာမှာ ဟားခါးမြို့နယ်အတွင်း စစ်ကောင်စီ၏ သတ်ဖြတ်မှုကြောင့် အရပ်သားပြည်သူ ၂၃ ဦး သေဆုံးခဲ့ပြီး နေအိမ်ပေါင်း ၂၆၀ မှာ မီးရှို့ဖျက်စီးခံရသည်ဟု CDF – ဟားခါးက ထုတ်ပြန်သည်။
ဟားခါးမြို့နယ်ထဲမှာ အရပ်သားပြည်သူ ထောင်ကျော်သည်လည်း စစ်ကောင်စီ ၏ မတရား ဖမ်းဆီး နှိပ်စက်ခြင်းကို ခံခဲ့ရသည်ဟု သိရသည်။
CDF – ဟားခါးသည် တိုင်းပြည်နှင့် လူမျိုးလွတ်မြောက်ရေးအတွက် တော်လှန်ရေး ပြီးဆုံးသည့်တိုင်အောင် ပြည်သူလူထု၊ အခြားတော်လှန်ရေးအင်အားစုများနှင့် လက်တွဲကာ ဆက်လက်တိုက်ပွဲဝင်သွားမည်ဟု တော်လှန်ရေး ၄ နှစ်ပြည့်တွင် ထုတ်ပြန်သည်။
ပြည်တွင်းပြည်ပ ပြည်သူအားလုံးအနေဖြင့် တော်လှန်ရေးတွင် ဆက်လက်ပူးပေါင်းပါဝင်ကြရန် CDF ဟားခါးက တိုက်တွန်းနှိုးဆော်ထားသည်။
CDF – ဟားခါးသည် စစ်ကောင်စီ ရုံးစိုက်ရာ ဟားခါးမြို့ကို သိမ်းနိုင်ရေးအတွက် ရုန်းတောင်စစ်ဆင်ရေးဟူ၍ အမည်ပေးထားပြီး အဆင့် ၃ ဆင့် သတ်မှတ်ကာ စစ်ရေးဖော်ဆောင်နေသည်ဟု CDF – ဟားခါးဥက္ကဌက ၂၀၂၄ ခုနှစ်က ဖြေကြားထားသည်။
ဟားခါးမြို့နယ်၏ ၇၀ ရာခိုင်နှုန်းထက်မနည်းကို ချင်းတော်လှန်ရေးအင်အားစုများက ထိန်းချုပ်ထားပြီး ကျန်ရှိနေသေးသော ၃၀ ရာခိုင်နှုန်းဝန်းကျင်ကို အပြီးသတ်ထိန်းချုပ်နိုင်ရေးအတွက် ရုန်းတောင်စစ်ဆင်ရေးကို ဖော်ဆောင်လျက်ရှိသည်ဟု သိရသည်။
