ချင်းပြည်နယ်တောင်ပိုင်း၊ ပလက်ဝမြို့တွင် စစ်ကောင်စီမှ ပလက်ဝ-ကျောက်တော် ရေလမ်းကြောင်းအသုံးပြုမှုကို ပိတ်ထားဆဲဖြစ်ပြီး ကုန်စည်စီးဆင်းမှု ရပ်တန့်နေသည့်အတွက် ပလက်ဝမြို့ပေါ်တွင် ဆန်များပြတ်လပ်သည့်အပြင် ကုန်ဈေးနှုန်းများ အဆမတန်မြင့်တက်လာခြင်းကြောင့် ပြည်သူများ နေထိုင်းစားသောက်ရေးအပိုင်းတွင် ပိုမိုခက်ခဲလာသည်ဟု သိရသည်။
ပလက်ဝမြို့က အိမ်ရှင်မတစ်ဦးက “ဆန်ကလည်း ဈေးထဲမှာကို မရောင်းဘူး ကြာပြီ ဒီလမ်းပိတ်ကတည်းက တလလောက်ရှိပြီ။ ဆန်ကပြတ်ကျတယ် ဈေးကြီးကြီးပေးပြီး ဝယ်ဖို့တောင်မှ မရှိဘူး၊ ဒီပလက်ဝဖက်ကို အဝင်မရှိတာ အဓိက ဆန်တွေ၊ ဆေး၊ ဆေးပစ္စည်းတွေဆို ၂ ဆတောင် တက်တာ၊ နောက်ပြီး ခုန မျှစ်ရောင်းတဲ့အစ်မတယောက်ဆို ဒီညနေစာ မရှိတော့ဘူးလို့ပြောတယ် လက်လုပ်လက်စားသမားတွေ ပိုပြီးအခက်အခဲဖြစ်တယ်” ဟု ပြောသည်။
ရခိုင်ပြည်နယ် ကျောက်တော်နှင့် ပလက်ဝမြို့ဆက်သွယ်သည့် ရေလမ်းကြောင်းကို စစ်ကောင်စီတပ်ဖက်မှ လုံးဝပိတ်ထားခဲ့သည်မှာ တလခန့်ကြာမြင့်ပြီဖြစ်ပြီး မည်သည့်ကုန်ပစ္စည်များကိုမှ သယ်ယူတင်သွင်းခွင့်မပြုခဲ့ခြင်းကြောင့် ပလက်ဝမြို့နယ်အတွင်းက ပြည်သူများ စားနပ်ရိက္ခာ ပြတ်လပ်လာခြင်းဖြစ်သည်။
ထို့အပြင် ပလက်ဝမြို့ပေါ်တွင် စက်သုံးဆီများ ပြတ်လပ်လာပြီး ပလက်ဝမြို့တစ်မြို့ ပုံမှန်လျှပ်စစ်မီးဖြန့်ဝေပေးနေသော EPC က အောက်တိုဘာ ၁၂ ရက်နေ့ညစတင်ကာ မီးပေးဝေမှု ရပ်နားထားရသည်ဟု မြို့ခံတစ်ဦးက ပြောသည်။
ပလက်ဝမြို့ခံတစ်ဦးက “EPC ကပေးတဲ့မီးက မနေ့ကတည်းကပြတ်ပြီ ပေးဖို့ဆီကမရှိတော့တဲ့သဘောပါ့ ဖယောင်းတိုင် ဈေးကကြီးတော့မယ့်ပုံပဲ” ဟုပြောသည်။
ပလက်ဝမြို့ပေါ်တွင် EPC မှ လျှပ်စစ်မီးဖြန့်ဝေပေးမှုတွင် ရွာမရပ်ကွက်၊ မြို့မရပ်ကွက်နှင့် ရိပ်ခါရပ်ကွက်အသီးသီးတွင် တရက်ခြားဖြင့် ၄ နာရီခန့်ဖြန့်ဝေခဲ့ကာ ယခုကဲ့သို့ မီးဆက်မပေးနိုင်တော့သည့်အတွက် မီးစက်၊ ဆိုလာပြားမရှိသော ပြည်သူများအတွက် ခက်ခဲမှုများကြုံနေရကြောင်း သိရသည်။
၎င်းအပြင် ပလက်ဝမြို့ပေါ်တွင် ပြည်သူများသည် အနည်းငယ်စုဆာင်းထားသည့် ဆန်တို့ကို အပြန်အလှန် ဝေမျှစားသုံးနေကြရသည်အထိ ဖြစ်လာသည့်အပြင် လက်ရှိဆန်ဈေးနှုန်းမှာလည်း ဆန်ရှည်တအိတ်လျှင် ကျပ် ၈ သောင်းကျော်၊ ပေါ်ဆန်းမွှေးဆန်တအိတ်တွင် ကျပ် တစ်သိန်းကျော်နှင့် ကြက်သွန်နီ၊ ငါးခြောက်၊ငပိ၊ စားသုံးဆီတို့မှာလည်း ဈေးနှုန်းမြင့်တက်ကာ ဝယ်ယူရန်လည်းခက်ခဲနေကြောင်း သိရသည်။
ဆန်ပြတ်လပ်မှုကြုံတွေ့နေရသည့် ပလက်ဝမြို့တွင် ယမန်နေ့က စစ်ကောင်စီတပ်ဖွဲ့၊ ထွေအုပ်နှင့် စည်ပင်သာယာရေးတို့ပူးပေါင်းကာ ပေါ်ဆန်းမွှေးဆန် နို့ဆီဗူး ၁၆ ဗူးတွင် ငွေ (၆၇၀၀) ကျပ်ဖြင့် ရောင်းချပေးခဲ့သည်ဟုသိရပြီး ဒုတိယအကြိမ် ဆန်ရောင်းချပေးခြင်းဖြစ်ကြောင်း သိရသည်။
ပလက်ဝမြို့အပြင် ဆမီးမြို့တွင်လည်း ဆန်ပြတ်လပ်နေသည်မှာ ၂ လ နီးပါးရှိနေပြီး မြို့ခံများသည် ကျေးရွာဖက်မှဝင်လာသည့် ဆန်များကို အဓိက ဝယ်ယူစားသုံးနေကြကာ ဆန်တအိတ်လျှင် ခြောက်သောင်းကျပ်ဖြင့် ဝယ်ယူနေကြရကြောင်း သိရသည်။
