(004SS)
ချင်းပြည်နယ်မြောက်ပိုင်း၊ တီးတိန်မြို့မှာ စစ်ကော်မရှင်က ရဟတ်ယာဉ်ဖြင့် လေးရက်ဆက်တိုက် စစ်အင်အားများ ဖြည့်တင်းခဲ့သည်ဟု PDF- Zoland ထံမှ သိရသည်။
အောက်တိုဘာ ၂၆ ရက်နေ့မှ ၂၉ ရက်နေ့အထိ တီးတိန်မြို့ပေါ်ရှိ ခလရ (၂၆၉) တပ်ရင်းသို့ စစ်ဘက်သုံး ရဟတ်ယာဉ် စုစုပေါင်း ၂၆ ကြိမ်အထိ ဆင်းသက်ခဲ့ပြီး စစ်အင်အားအများအပြားပို့ဆောင်ခဲ့သည်ဟု သိရသည်။
ယမန်နေ့အောက်တိုဘာ ၂၉ တစ်ရက်တည်းတွင်ပင် ရဟတ်ယာဉ် ၉ ကြိမ်အထိ ဆင်းသက်ခဲ့ရာ တပ်သားအင်အား၊ လက်နက်ခဲယမ်းနှင့် စစ်သုံးပစ္စည်းများ ပို့ဆောင်ခဲ့သည်ဟု သိရသည်။
ထို့အပြင် အောက်တိုဘာ ၂၉ ရက်နေ့တွင် တီးတိန်မြို့မှ တီးတိန်-ကလေးလမ်းမပေါ်ရှိ ဆဲဇန် (Sezang) ကျေးရွာဘက်သို့ စစ်မျက်နှာသစ် ဖွင့်လှစ်ကာ စစ်ကြောင်းထိုး ဝင်ရောက်လာကြောင်းလည်း ဒေသခံတော်လှန်ရေးတပ်ဖွဲ့ဖြစ်သော PDF-Zoland က အတည်ပြုထုတ်ပြန်သည်။
ထို့ကြောင့် ဒေသခံ ပြည်သူများနှင့် ခရီးသွားများအနေဖြင့် လုံခြုံရေးအရ အသက်အန္တရာယ် မကြုံစေရေး သတိရှိစွာ သွားလာကြရန်နှင့် ဖြစ်နိုင်ပါက ခရီးသွားလာခြင်း လုံးဝရှောင်ရှားရန် PDF-Zoland က အလေးအနက် တိုက်တွန်းထားသည်။
လက်ရှိတွင်လည်း တီးတိန်မြို့နယ်၊ စီးယင်ဒေသ၊ သိုင်းငင်းကျေးရွာကို စစ်ကော်မရှင်တပ်က အင်အားရာချီဖြင့် ကလေးနှင့် တီးတိန်ကနေ နှစ်ဖက် ညှပ်ပြီး စစ်ကြောင်းထိုးလာသောကြောင့် မွာလ်ပီးကျေးရွာအနီးတွင် ယမန်နေ့က ချင်းကာကွယ်ရေးတပ်ဖွဲ့များနှင့် တိုက်ပွဲစတင်ဖြစ်ပွားနေကြောင်း သိရသည်။
