စစ်ကော်မရှင်တပ်က အင်အားဖြည့်တင်းပြီး ချင်းပြည်ကို ထိုးစစ်ဆင်ရန်ပြင်ဆင်နေ

(006SV)

ကလေးမြို့ ဒေသကွပ်ကဲမှု စစ်ဌာနချုပ်ကို အခြေပြု၍ စစ်ရေးလှုပ်ရှားနေသော စစ်ကော်မရှင်တပ်သည် ရွေကောက်ပွဲ ဒုတိယပိုင်းအဖြစ် ကျင်းပမည့် ထန်တလန်၊ ဖလမ်းနှင့် တွန်းဇန်မြို့တို့ကို ဦးတည်ကာ ချင်းပြည်ဘက်ကို ထိုးစစ်ဆင်ရန် လုပ်ဆောင်လာနေသည်ဟု သိရသည်။

လက်ရှိတွင် စစ်ကော်မရှင်တပ်များသည် ကလေးမြို့ တောင်ပိုင်းနှင့် မြောက်ပိုင်းတွင် အင်အားအများအပြားဖြင့် စစ်ဆင်ရေးများ လုပ်ဆောင်လျက်ရှိရာမှ ချင်းပြည်နယ်ကို ဦးတည်ကာ စစ်ရေးပြင်ဆင်မှု လုပ်ဆောင်လာနေသည်ဟု ချင်းအင်အားစုများနှင့် စစ်ရေးလေ့လာသုံးသပ်သူများက ပြောသည်။

“အဓိကက ချင်းပြည်ထဲကို ပြန်ပြီးတော့ တိုက်ခိုက်နိုင်ဖို့၊ ပြီးရင် ရွေးကောက်ပွဲ လုပ်မယ်ဆိုတဲ့ မြို့ ၃ မြို့လည်း ရှိတယ်၊ ထန်တလန်အပါအဝင်ပေါ့နော်။ အဲဒါတွေကို သူတို့ ပြန်ပြီးတော့ တိုက်စစ်ဆင်မယ့် အနေအထားရှိတယ်။ အဲဒီ ၃ မြို့နယ်က စစ်ရေးအရ အတော်လေး အလေးထားရမယ်။ ချင်းပြည်နယ်ကို ကလေးဘက်က တစ်ကြောင်း၊ မကွေးတိုင်း ထီးလင်းနဲ့ ဂန့်ဂေါဘက်ကနေလည်း ပြန်ကိုင်ဖို့တွေ ရှိနေတယ်။ အဓိကက အဲဒီရွေးကောက်ပွဲ ၃ မြို့နယ်ကို အဓိကထားပြီး စစ်ကြောင်းထိုးမယ့် အနေအထားလို့ သုံးသပ်ရပါတယ်” ဟု စစ်ရေးလေ့လာသုံးသပ်သူ CDM ဗိုလ်ကြီး ဇင်ယော်က ပြောသည်။

ကလေးမြို့ ဒေသကွပ်ကဲမှု စစ်ဌာနချုပ်ကို တပ်မ ၉၉ နှင့် တပ်မ ၃၃ ၏ နောက်ချန်အင်အားများကို ဖြည့်တင်းထားပြီး ကလေး – တမူးလမ်းပိုင်းကို တဝက်၊ ကလေးတောင်ပိုင်း နှင့် ချင်းပြည်နယ်ဘက်ကို စစ်အင်အားတဝက်လွှတ်ကာ စစ်ကြောင်းထိုးနေသည်ဟု သိရသည်။

ကလေးမြို့နှင့် ချင်းမြောက်ပိုင်းအစပ် CDF – CDM Siyin ထိန်းချုပ်ဒေသကို စစ်ကော်မရှင်တပ်က အင်အား အလုံးအရင်းဖြင့် ထပ်မံဖြည့်၍ စစ်ကြောင်းထိုးမှုကြောင့် ကလေး -တီးတိန် ဆိုင်ကယ်လမ်းများကို ခေတ္တပိတ်ကြောင်း CDF – CDM Siyin က ယမန့်နေ့က အရေးပေါ်ကြေညာသည်။

တီးတိန်မြို့အခြေစိုက် ခလရ ၂၆၉ တပ်စခန်းကိုလည်း ကလေးမြို့မှတစ်ဆင့် ရဟတ်ယဉ်ဖြင့် အောက်တိုဘာလ ၂၆ ရက်နှင့် ၂၇ ရက်တို့တွင် ၂ ရက်ဆက် တပ်ဖွဲ့ဝင်အင်အားနှင့် လက်နက်ခဲယမ်းများ ဖြည့်တင်းသည်ဟု ချင်းတော်လှန်ရေးအင်အားစုများက ပြောသည်။

ရဟတ်ယာဉ်တစ်စင်းလျှင် စစ်သား ၂၀ ဦးဝန်းကျင် ပါလာနိုင်တာကြောင့် လက်ရှိ တီးတိန်သို့ ချပေးသည့် အင်အားသည် တစ်ရာဝန်းကျင်ရှိနိုင်ကြောင်း တွန်းဇန်မြို့ပအဖအဖွဲ့မှ ပြောရေးဆိုခွင့်ရှိသူက ပြောသည်။

စစ်ရေးလေ့လာသုံးသပ်သူ CDM ဗိုလ်ကြီး ဇင်ယော်နှင့် ချင်းအင်အားစုတချို့က တီးတိန်ကို လုံခြုံရေးအရ အင်အားတိုးမြှင့်ကာ တွန်းဇန်မြို့ကို ZRA တပ်ဖွဲ့က တိုက်ခိုက်ရန် စစ်ရေးပြင်ဆင်နေမှုများကိုလည်း တွေ့နေရသည်ဟု ပြောသည်။

“တီးတိန်ကိုလည်းအင်အားဖြည့်တင်းမှုတွေ လုပ်တယ်။ အင်အားကတော့ လူသစ် ၃၀ လောက်ပဲ တွေ့ရတယ်။ ဒါပေမယ့် တီးတိန် ဟိုဘက် တွန်းဇန်ကို တိုက်မှာက စစ်တပ်က လက်နက်တပ်ဆင်ပေးထားတဲ့ ZRA အဖွဲ့က တိုက်မှာဆိုတော့ ဒီ ၃၀ က တီးတိန်မြို့ လုံခြုံရေးကို အင်အားဖြည့်တဲ့အနေအထားမျိုးလို့ပဲ ပြောရမှာဖြစ်ပါတယ်” ဟု CDM ဗိုလ်ကြီးဇင်ယော်က ပြောသည်။

ကလေးမြို့ တောင်ပိုင်းကို စစ်ကြောင်းထိုးနေသော စစ်ကော်မရှင်တပ်ဖွဲ့သည် အောက်တိုဘာလ ၂၇ ရက်က ကျွန်းချောင်းရွာကို ဝင်ရောက်၍ နေအိမ်တချို့ကို မီးရှို့ဖျက်စီးခဲ့ပြီး ယနေ့ အောက်တိုဘာလ ၂၈ ရက်တွင် ထောက်ကြံ့ရွာကို ရောက်ရှိကာ နေအိမ် တချို့ကို မီးရှို့ဖျက်စီးနေသည်ဟု ဒေသခံများက ပြောသည်။

အောက်တိုဘာလ ၂၆ ရက်က စစ်ကား (၂၁) စီးဖြင့် လက်နက်ခဲယမ်း၊ ရိက္ခာများနှင့် စစ်အင်အားများကို ကလေးနည်းပညာ တက္ကသိုလ်ဝန်းထဲ ဖြည့်တင်းမှုအပြင် သံပြားကာ (၃) စီးအပါအဝင် ကားကြီး (၁၀) စီးဖြင့် ၁၂၂ မမ ဟောင်ဝှစ်ဇာ လက်နက်ကြီး၊၊ ၁၂၀ မမ၊ ၁၀၅ မမ လက်နက်ကြီးများနှင့် ဆက်စပ်ကျည်သေတ္တာများ ဖြည့်တင်းသည်ဟု သိရသည်။

ချင်းပြည်နယ်အတွင်း ဒီဇင်ဘာလ ၂၈ ရက်မှာ စစ်တပ်၏ ရွေးကောက်ပွဲပထမပိုင်းကို ဟားခါး၊ တီးတိန်တွင် ကျင်းပမှာဖြစ်ပြီး ဒုတိယပိုင်းကို ထန်တလန်၊ တွန်းဇန်၊ ဖလမ်းမြို့မှာ ကျင်းပမည်ဖြစ်ကြောင်း၊ ကျန်မြို့နယ်များတွင် ရွေးကောက်ပွဲ ကျင်းပနိုင်မည်မဟုတ်ကြောင်း ရွေးကောက်ပွဲ ကော်မရှင်က ထုတ်ပြန်ခဲ့သည်။