(006SV)
ချင်းပြည်နယ်၊ တီးတိန်မြို့နယ်၊ စီးယင်ဒေသ၊ သိုင်းငင်းကျေးရွာကို စစ်ကော် မရှင်တပ်က အင်အားရာချီဖြင့် နှစ်ဖက်ညှပ်ပြီး စစ်ကြောင်းထိုးလာသောကြောင့် ချင်းကာကွယ်ရေးတပ်ဖွဲ့နှင့် တိုက်ပွဲ ဖြစ်ပွားနေကြောင်း သိရသည်။
ကလေး-တီးတန် လမ်းမပေါ်မှာ တည်ရှိသည့် သိုင်းငင်းသို့ မွှာလ်ပီးဘက်မှ အင်အား ၂၀၀ ဝန်းကျင်နှင့် တီးတိန်မှ သိုင်းငယ်သို့ အင်အား ၂၀၀ ဝန်းကျင်တို့ဖြင့် စစ်ကော်မရှင်တပ်က စစ်ကြောင်းထိုးလာခြင်းဖြစ်ပြီး မွှာလ်ပီးဘက်တွင် ယနေ့ အောက်တိုဘာလ ၂၉ ရက် နေ့လည် ၂ နာရီခွဲမှစတင်၍ တိုက်ပွဲဖြစ်ပွားနေသည်ဟု CDF CDM – စီးယင်မှ ပြောရေးဆိုခွင့်ရှိသူက ပြောသည်။
“အခု က စစ်ကြောင်း နှစ်ကြောင်းနဲ့ သိုင်းငင်းကို ထိုးလာပါတယ်။ စစ်ကြောင်း ၁ ခုက မွာလ်ပီး မှသိုင်းငင်း၊ နောက်စစ်ကြောင်း တစ်ခုက တီးတိန် မှ သိုင်းငင်းပါ၊ မွာလ်ပီးဘက်မှ ထိတွေ့မှုတော့ ၂:၃၀ ဝန်းကျင်ကနေ စဖြစ်နေပါပြီ” ဟု CDF CDM – စီးယင်မှ ပြောရေးဆိုခွင့်ရှိသူက ပြောသည်။
ယနေ့မှာ စစ်ကော်မရှင်တပ်က စစ်ကြောင်းမထိုးမီ ယမန်နေ့ အောက်တိုဘာလ ၂၈ ရက် ည ၁၁ နာရီခွဲခန့်တွင် သိုင်းငင်းကို ပေါင် ၅၀၀ ဗုံး၊ ၂ လုံးဖြင့် လေကြောင်းတိုက်ခိုက်ရာ ဒေသခံအမျိုးသမီး ၁ ဦး ထိခိုက်ဒဏ်ရာရပြီး အဆောက်အအုံတချို့ ပျက်စီးမှု ရှိသည်ဟု သိရသည်။
“နှစ်လုံးချတယ်၊၊ အရပ်သားပြည်သူ အမျိုးသမီးတဦး ထိထားပါတယ်။ ဒဏ်ရာကတော့ မစိုးရိမ်ရပါဘူး” ဟု CDF CDM – စီယင်မှ ပြောရေးဆိုခွင့်ရှိသူက ပြောသည်။
အောက်တိုဘာလ ၂၇ ရက်က CDF-CDM Siyin ထိန်းချုပ်ဒေသကို စစ်ကော်မရှင်တပ်ဖွဲ့များ အင်အားအလုံးအရင်း ထပ်မံဖြည့်တင်းပြီး စစ်ကြောင်းထိုးလာသောကြောင့် ကလေး-တီးတိန်ကြား ဆိုင်ကယ်လမ်းများ အဆိုပါရက်မှစတင်၍ ခေတ္တပိတ် ထားလိုက်ကြောင်း CDF-CDM SIYIN က ကြေညာထားသည်။
ကလေးမြို့အနောက်ဘက် မိုင် ၂၀ ခန့်အကွာ သိုင်းငင်းရွာသည် ချင်းပြည်နယ်၊ တီးတိန်နှင့် ဖလမ်းသို့ သွားသော ကလေး-တီးတိန်- ဖလမ်း လမ်းဆုံတွင် တည်ရှိပြီး လမ်းပန်းဆက်သွယ်ရေးအရ အချက်အချာကျသည့်နေရာဖြစ်သည်။
