(005MK)
မီဇိုရမ်ပြည်နယ် အိုင်ဇောလ်ခရိုင် Sihhmui ကျေးရွာတွင် စစ်ဘေးရှောင်ချင်းအမျိုးသမီးတစ်ဦး တနင်္ဂနွေနေ့က ဆိုင်ကယ်တိုက်ခံရ၍ သေဆုံးခဲ့သည်ဟု သိရသည်။
ချင်းပြည်နယ် မတူပီမြို့နယ် တင်လောင်းကျေးရွာမှ Sihhmui ကျေးရွာသို့ စစ်ဘေးရှောင်လာသော အသက် ၅၅ နှစ် အရွယ် ဒေါ်စန်အဲသည် စက်တင်ဘာ ၇ ရက် ည ၉ နာရီခွဲဝန်းကျင်တွင် ဘုရားကျောင်းမှအပြန် ဆိုင်ကယ်တိုက်ခံရခြင်းဖြစ်သည်ဟု The Matupi Times သတင်းဌာနကဖော်ပြသည်။
ဒေါ်စန်အဲသည် ဘုရားကျောင်းဆင်းပြီးနောက် နေအိမ်ရှေ့တွင် ရပ်နေစဉ်မှာ ဒေသခံအမျိုးသား ၂ ဦးစီးလာသော ဆိုင်ကယ်ဖြင့် အတိုက်ခံရကာ ထိုနေရာမှာပင် ပွဲချင်းပြီးသေဆုံးသွားခဲ့ခြင်းဖြစ်သည်ဟု သိရသည်။
ဆိုင်ကယ်ဖြင့် တိုက်သွားသည့် အမျိုးသား ၂ ဦးကိုလည်း တာဝန်ရှိသူများက ဖမ်းဆီးထိမ်းသိန်းထားပြီဟု သိရသည်။
ဒေါ်စန်အဲသည် မြန်မာနိုင်ငံမှာ စစ်အာဏာသိမ်းမှုဖြစ်ပွားပြီးနောက် ၂၀၂၁ ခုနှစ်ကတည်းက မီဇိုရမ်ပြည်နယ်ဘက်သို့ စစ်ဘေးရှောင်လာသူဖြစ်ပြီး Sihhmui ကျေးရွာမှာ သား ၃ ယောက်နှင့်အတူ နေထိုင်ကြသည်ဟု သိရသည်။
