မကွေးတိုင်း၊ ဆောမြို့နယ်၊ တောမကျေးရွာကို ယနေ့ မေလ ၁၄ ရက်မွန်းလွဲပိုင်း ၃ နာရီခန့်တွင် စစ်ကောင်စီက ဂျက်ဖိုက်တာဖြင့် ဗုံးကြဲတိုက်ခိုက်ခဲ့ပြီး လသားအရွယ်ကလေးငယ်တစ်ဦးအပါအဝင် အရပ်သားပြည်သူ ၇ ဦးသေဆုံးကာ ၉ ဦးပြင်းထန်ဒဏ်ရာရရှိခဲ့ကြောင်း သိရသည်။
စစ်ကောင်စီသည် ယနေ့မွန်းလွဲပိုင်း ၃ နာရီခန့်တွင် မြေပြင်တိုက်ပွဲဖြစ်ပွားခြင်းမရှိဘဲ တောမကျေးရွာကို ဗုံးကြဲတိုက် ခိုက်ခဲ့ခြင်းဖြစ်ပြီး နေအိမ် ၁၀ လုံးခန့်ပျက်စီးသွားခဲ့သည်ဟု ယောအလင်းတန်းကဖော်ပြသည်။
လေကြောင်းတိုက်ခိုက်မှုကြောင့် လသားအရွယ်နှင့် ၅ နှစ်သားအရွယ်ကလေးငယ် ၂ ဦးနှင့် အမျိုးသမီး ၄ ဦးအပါအဝင် စုစုပေါင်း ၇ ဦးသေဆုံးကာ ၉ ဦးပြင်းထန်ဒဏ်ရာရရှိခဲ့သည်ဟု ဆိုသည်။
ယခုလေကြောင်းတိုက်ခိုက်မှုသည် ဆောမြို့နယ်ထဲ တပတ်အတွင်း ဒုတိယအကြိမ်မြောက် လေကြောင်းတိုက်ခိုက်ခံ ရခြင်းဖြစ်ပြီး ပြီးခဲ့သည့် မေလ ၉ရက်နေ့ မနက် ၁၁ နာရီခန့်က ဆောမြို့နယ် အကြည်ပန်းပလွန်းရွာ ဘုန်းကြီးကျောင်း လေကြောင်းတိုက်ခိုက်ခံရမှုကြောင့် ပြည်သူ ၁၆ ဦး သေဆုံးကာ ၂၅ ဦး ထိခိုက်ဒဏ်ရာရရှိခဲ့ကြသည်။
ဓာတ်ပုံ – ယောအလင်းတန်း
