စစ်ကိုင်းတိုင်း တမူးခရိုင်၊ တမူးမြို့နယ်၊ မြို့သစ်မြို့ရှိ စစ်ကောင်စီတပ်ဖွဲ့၏ အခိုင်အမာတပ်စခန်းကို ပြည်သူ့ကာကွယ်ရေးပူးပေါင်းတပ်ဖွဲ့က ယနေ့မေလ ၁၁ ရက်နေ့တွင် သိမ်းပိုက်လိုက်ပြီး စစ်ကောင်စီလက်အောက်ခံ ရဲ ၂၁ ဦးကိုလည်း အရှင်ဖမ်းဆီးရမိသည်ဟု သိရသည်။
မြို့သစ်မြို့တွင် အခိုင်အမာတပ်စွဲထားသော အမှတ်-၂၂၈ ခြေလျင်တပ်ရင်း (ခလရ-၂၂၈)၊ SNA တပ်မဟာ-၈၉၁ (တပ်ရင်း-၃)၊ ကသည်းတပ်ဖွဲ့၊ ရဲ နှင့် ပျူစောထီး ပူးပေါင်းအင်အား (၂၅၀) ခန့်ကို ပြည်သူ့ကာကွယ်ရေးပူးပေါင်းတပ်ဖွဲ့က မေလ ၇ ရက် နံနက် ၅ နာရီမှစတင်တိုက်ခိုက်ခဲ့ပြီးနောက် မေလ ၁၁ ရက်နေ့ မှာ သိမ်းပိုက်နိုင်ခဲ့ခြင်းဖြစ်သည်ဟု NUG အစိုးရကာကွယ်ရေးဝန်ကြီးဌာန အမှတ်-၁ စစ်ဒေသက ယနေ့ညနေပိုင်းတွင်ထုတ်ပြန်သည်။
တမူးခရိုင်ကွပ်ကဲရေးမှူးက ဦးစီးပြီး တမူးခရိုင် တပ်ရင်း-၂၊ အထူးလှုပ်ရှား တပ်ရင်း-၉၊ ကူကီး အမျိုးသားတပ်မတော် KNA(B)၊ အမျိုးသားလွတ်မြောက်ရေးတပ်တော် (NLA) တို့မှ ပူးပေါင်း တိုက်ခိုက်ခဲ့ကြခြင်း ဖြစ်သည်ဟု သိရသည်။
တမူးမြို့နယ် ပကဖမှ ထောက်ပို့အနေဖြင့် ပါဝင်ခဲ့သည်။
တိုက်ပွဲအတွင်း ရဲ (၂၁) ဦး အလံဖြူပြ လက်နက်ချခဲ့ပြီး သေဆုံးနှင့် ဒဏ်ရာရစာရင်း အတည်မပြုနိုင် သေးကြောင်း အမှတ် – ၁ စစ်ဒေသကထုတ်ပြန်သည်။ ဖမ်းဆီးရမိသူများထဲတွင် စခန်းမှူး ရဲအုပ် ကျော်ကျော်နိုင်၊ ဒု-ရဲအုပ် ကျော်ကျော်လွင်၊ ဒု-ရဲအုပ် မျိုးသန့်တို့ ပါဝင်သည်ဟု သိရသည်။
စစ်ကောင်စီတပ်ဖွဲ့ထံမှ လက်နက်ငယ် (၂၉) လက်၊ ၆၀ မမ (၁၂) လုံး၊ အီနာဂါ (၅) လုံး၊ ရှေ့ထွက်မိုင်း (၁) လုံး၊ Station Jammer (၃) ခု၊ ကျည်အိမ် (၃၄) ခုနှင့် ကျည်အချို့သိမ်းဆည်းရမိသည်ဟု သိရသည်။
ဓာတ်ပုံ – အမှတ် (၁) စစ်ဒေသ
