တွန်းဇံမြို့နယ်၊ လုံတပ်ကျေးရွာကို စစ်ကောင်စီဗုံးကြဲ၊ ဘာသာရေးအဆောက်အဦးအပါအဝင် နေအိမ် ၇ လုံးပျက်စီး

(006SV)

ချင်းပြည်နယ်မြောက်ပိုင်း တွန်းဇံမြို့နယ်၊ လုံတပ်ကျေးရွာကို စစ်ကောင်စီက ဗုံးကြဲတိုက်ခိုက်မှုကြောင့် ဘာသာရေး အဆောက်အဦး အပါအဝင် နေအိမ် (၇) လုံးပျက်စီးပြီး ကျေးရွာ ၅ ရွာမှ ဒေသခံထောင်ချီ စစ်ဘေး ရှောင်နေရကြောင်း သတင်းရရှိသည်။

မေလ ၁၁ ရက် ည ၉ နာရီခန့်က တွန်းဇံမြို့နယ်၊ လုံတပ်ကျေးရွာ (Lungtak)ကို စစ်ကောင်စီက လေကြောင်း တိုက်ခိုက်မှု (၂) ကြိမ်ခန့် ပြုလုပ်ခဲ့ရာ ခရစ်ယာန်ဘုရားကျောင်း (၂) ကျောင်းနှင့် အရပ်သားနေအိမ် (၅) လုံးထိခိုက်ပျက်စီးခဲ့ကြောင်း ချင်းလူ့ အခွင့်အရေးအဖွဲ့မှ ပြောရေးဆိုခွင့်ရှိသူ ဆလိုင်းမာန်ဟရဲလျန်က ပြောသည်။

“လေကြောင်း တိုက်ခိုက်မှုက အနည်းဆုံး ၂ကြိမ် လို့ သိရတယ်။ ပြည်သူလူထုတွေရဲ့ ဒဏ်ရာ ရရှိမှုနဲ့ သေဆုံးမှုကတေ့ာ မသိရသေးဘူး။ အဲဒီရွာက ပြည်သူလူထုတွေက စစ်ဘေးရှောင်နေကြပြီးလို့ သိရတယ်။ လုံတပ်ရွာဘေးအနားက တချို့ရွာ တွေလည်း စစ်ဘေးရှောင်နေကြပြီ” ဟု ဆလိုင်းမာန်ဟရဲလျန်က ပြောသည်။

တွန်းဇံမြို့နယ်တွင် CNA ဦးဆောင်သော ချင်းကာကွယ်ရေးပူးပေါင်းတပ်များနှင့် ZRA – EC တပ်ဖွဲ့တို့ တိုက်ပွဲများဖြစ်ပွားနေသည်ဟု သတင်းများထွက်ပေါ်နေသည့်အချိန်တွင် ယခုကဲ့သို့ စစ်ကောင်စီက တွန်းဇံမြို့နယ်တွင် လေကြောင်းတိုက်ခိုက်မှု ပြုလုပ်လာခြင်းဖြစ်သည်။

“တွန်းဇံမြို့နယ်တချို့ရွာတွေနဲ့ လုံတပ်ရွာအပါအဝင် တိုက်ပွဲဖြစ်နေတယ်လို့ သိရတယ်။ ချင်းအမျိုးသားတပ်ဦး ဦးဆောင်တဲ့အဖွဲ့နဲ့ တခြားလက်နက်ကိုင်အစုအဖွဲ့တွေလို့ ကြားရတယ်။ ZRA လား ၊ စစ်ကောင်စီလား မသိသေးဘူး။ စစ်ကောင်စီနဲ့ ဖြစ်မယ်လို့ ယူဆတယ်။ တိုက်ပွဲကြောင့် ဗုံးကြဲမှုတွေ ဖြစ်တယ်ဆိုတော့ စစ်ကောင်စီနဲ့ ဖြစ်တယ်လို့ပဲ မြင်ကြတယ်” ဟု ဆလိုင်းမာန်ဟရဲလျန်က ပြောသည်။

လက်ရှိတွင် လုံတပ်ကျေးရွာနှင့် ၎င်းအနီးဝန်းကျင်ကျေးရွာ (၅) ရွာခန့်မှ ဒေသခံပြည်သူ တစ်ထောင်ကျော်သည် စစ်ဘေးရှောင်နေရကြောင်း သိရသည်။

တွန်းဇံမြို့နယ် အဝင်/အထွက်များကို စစ်ကောင်စီတပ်က ပိတ်ဆို့ထားသကဲ့သလို့ ကျီခါးမြို့ဝန်းကျင်တွင်လည်း ပိတ်ဆို့ကန့်သတ်မှုများ ပြုလုပ်ထားကြောင်း သိရသည်။

မေလဆန်းပိုင်းမှစတင်၍ တွန်းဇံမြို့ပေါ် ရဲစခန်းအနီးဝန်းကျင်က ဒေသခံများသည် မြို့ပေါ် တိုက်ပွဲ သတင်းများကြောင့် နီးစပ်ရာဒေသများသို့ စစ်ဘေးရှောင်သွားပြီဖြစ်ကြောင်း သိရသည်။

တွန်းဇံမြို့နယ်တွင် အများပြည်သူ မှီတင်နေထိုင်ရာ မြို့ရွာများအတွင်း တိုက်ပွဲဖော်ဆောင်ခြင်း မပြုလုပ်ဘဲ ရှောင်ရှားပေးရန်‌ မေလ ၃ ရက်က တွန်းဇံမြို့၊ ခရစ်ယာန်ဂိုဏ်းပေါင်စုံ မိတ်သဟာယအဖွဲ့နှင့် မြို့မိမြို့ဖများက ပန်ကြားလွှာ ထုတ်ပြန်သည်။

တွန်းဇံမြို့နယ်အတွင်းက ပြည်သူလူထုသည် အသက်အိုးအိမ် ထိခိုက်ပျက်စီးမှုနှင့် ဆုံးရှုံးနစ်နာမှုများထဲသို့ ဆင်းသက် ကျရောက် မည်ကို အထူးစိုးရိမ်မကင်းဖြစ်နေရသည် ၎င်းတို့က ထုတ်ပြန်ထားသည်။

တွန်းဇံမြို့နယ်တွင် စစ်ကောင်စီတပ်အပါအဝင် ZRA (EC)၊ PDF- Zoland၊ CDF – တွန်းဇံနှင့် PDF ခေါ် Thahdo Defense Force စသည့် လက်နက်ကိုင်တပ်ဖွဲ့များ အခြေပြုလှုပ်ရှားနေကြကြောင်း သိရသည်။