(006SV)
ချင်းပြည်နယ်မြောက်ပိုင်း တွန်းဇံမြို့တွင် CNA ဦးဆောင်သည့် ချင်းတပ်ပေါင်းစု နှင့် စစ်ကောင်စီတပ်တို့ကြား ယမန်နေ့ကစ၍ နေ့ရော၊ ညပါ တိုက်ပွဲများ အပြင်းအထန်ဖြစ်ပွားခဲ့ကြောင်း သတင်းရရှိသည်။
မေလ ၁၆ ရက် မနက် ၉ နာရီမှ စတင်၍ မေလ ၁၇ မနက် ၄ နာရီအထိ တွန်းဇံမြို့က စစ်ကောင်စီ တပ်ဖွဲ့ဝင်များ ရှိရာနေရာများကို ချင်းပူးပေါင်းတပ်ဖွဲ့များက ဒရုန်းအပါအဝင် ပစ်ခတ်တိုက်ခိုက်သံများ ကြားနေရကြောင်း တွန်းဇံမြို့ ဒေသခံများက ပြောသည်။
“ညကဆိုရင် ၅ မိနစ်၊ ၁၀ မိနစ်ခြား တစ်ခါ ပစ်တာ၊၊ မနေ့ကတည်းကနေ ဆက်တိုက်ပဲ ပစ်နေကြတာ။ မနက် ၄ နာရီမှာနောက်ဆုံး ကြားတယ်။ ပြီးတော့ ဒီမနက် ၈ နာရီကျော်ကျော်လောက်မှာ ပစ်ခတ်တာ ကြားတယ်။ အဲဒီနောက်ပိုင်းတော့ ငြိမ်းသွားပြီ” ဟု တွန်းဇံမြို့ခံတစ်ဦးက ပြောသည်။
ယနေ့ မေလ ၁၇ ရက် ၈ နာရီခန့်ကလည်း စစ်ကောင်စီတပ်ဖွဲ့ဝင်များ ရှိနေသည့် အထွေထွေအုပ်ချုပ်ရေး ဦးစီးဌာနရုံးကို ချင်းပူးပေါင်းတပ်ဖွဲ့က ဒရုန်းဖြင့် တိုက်ခိုက်ခဲ့ကြောင်း ဒေသခံက ပြောသည်။
တွန်းဇံမြို့ စစ်ကောင်စီ ခလရ – ၂၆၉ တပ်စခန်း နှင့် စစ်ကောင်စီတပ်ဖွဲ့များခြေကုပ်ယူထားသော အထွေထွေအုပ်ချုပ်ရေး ဦးစီးဌာနရုံး၊ မီးသတ်ရုံးနှင့် အခြားရုံးတစ်ခုတို့ကို ချင်းပူးပေါင်းတပ်များက ဦးတည်တိုက်ခိုက်ခဲ့ကြောင်း၊ တွန်းဇံမြို့နှင့် ၃ မိုင်ခန့်အကွာက လမ်းမပေါ်တွင်လည်း နှစ်ဖက်ထိတွေ့တိုက်ပွဲများ ဖြစ်ပွားခဲ့ကြောင်း ဒေသခံများက ပြောသည်။
ချင်းပူးပေါင်းတပ်များနှင့် စစ်ကောင်စီတို့၏ တွန်းဇံမြို့က တိုက်ပွဲများတွင် စစ်ကောင်စီတပ်ဖွဲ့ဝင်များနှင့်အတူ ဇိုမီးတော်လှန်ရေးတပ် (ZRA – EC) တပ်ဖွဲ့က ပူးပေါင်းတိုက်ခိုက်နေကြောင်း ဒေသခံများက ပြောသည်။
သို့ရာတွင် ခိုနူမ်းသုန်အနေဖြင့် သီးခြားအတည်ပြုနိုင်ခြင်း မရှိသေးပါ။
တွန်းဇံမြို့၊ ခလရ – ၂၆၉ တပ်စခန်းကို ချင်းပြည်အစိုးရ၊ ကာကွယ်ရေးဝန်ကြီးဌာန လက်အောက်ရှိ ချင်းကာကွယ်ရေး ပူးပေါင်း တပ်က ယမန်နေ့ မေလ ၁၆ ရက်က စတင်တိုက်ခိုက်ပြီးဖြစ်ကြောင်း ချင်းအမျိုးသားတပ်ဦး CNF / CNA ပြောရေးဆိုခွင့်ရှိသူ ဆလိုင်းထက်နီက ပြောသည်။
ယမန်နေ့က တိုက်ပွဲတွင် စစ်ကောင်စီက ဂျက်ဖိုက်တာဖြင့် ၃ ကြိမ် လာရောက်ပစ်ကူပေး၍ တိုက်ခိုက်နေပြီး ချင်းပူးပေါင်းတပ်ဖွဲ့က အထိအခိုက် မရှိကြောင်း၊ ZRA – EC ဖွဲ့နှင့် တိုက်ခိုက်နေခြင်းမဟုတ်ကြောင်း ဆလိုင်းထက်နီက ဖြေကြားထားသည်။
တိုက်ပွဲအတွင်း နှစ်ဖက်ပစ်ခတ်မှုများကြောင့် တွန်းဇံမြို့ နေအိမ်တချို့ ထိခိုက်ပျက်စီးခဲ့ကြောင်း သိရသည်။
တွန်းဇံမြို့ပေါ်ရှိ စစ်စခန်း၊ အထွေထွေအုပ်ချုပ်ရေးဦးစီးဌာနရုံး၊ မီးသတ်ရုံးအပါအဝင် စစ်ကောင်စီတပ်ဖွဲ့ဝင်များ ရှိနေသည့် ရုံးအဆောက်အဦးနှင့်နီးသော ဒေသခံပြည်သူများ စစ်ဘေးရှောင်နေကြပြီး မြို့လူဦးရေ၏ ၂၀ ရာခိုင်နှုန်းခန့်သည် တောတောင်များ၊ ကျေးရွာများသို့ စစ်ဘေးရှောင်နေကြကြောင်း သိရသည်။
