(006SV)
မကွေးတိုင်း၊ ငဖဲမြို့နယ်၊ နတ်ရေကန်အနီးရှိ နတ်ရေကန်တောင်ခြေ ကာကင်းစခန်းကို ထိုးစစ်ဆင်တိုက်ပွဲတွင် ချင်းကာကွယ်ရေးတပ် – အရှိုက ရဲဘော်တစ်ဦး ကျဆုံးသွားသည်ဟု သိရသည်။
အောက်တိုဘာလ ၂၈ ရက်က နတ်ရေကန်တောင်ခြေ ကာကင်းစခန်းကို ထိုးစစ်ဆင်စဉ် ရှေ့တန်းတစ်နေရာတိုက်ပွဲတွင် CDF – အရှို ရဲဘော် ဆလိုင်းအာရှယ်ပါသည် ကျဆုံးရခြင်းဖြစ်သည်ဟု CDF – အရှိုမှ ပြောရေးဆိုခွင့်ရှိသူ ဆလိုင်းရိုးချင်းက ပြောသည်။
“နတ်ရေကန်အနီး နတ်ရေကန်တောင်ခြေ ကာကင်းစခန်း ထိုးစစ်ဆင် တိုက်ပွဲမှာ ကျတာပါ” ဟု ဆလိုင်းရိုးချင်းက ပြောသည်။
ရဲဘော် ဆလိုင်းအာရှယ်ပါသည် တော်လှန်ရေး ရဲဘော်ကောင်း တစ်ဦးဖြစ်သောကြောင့် ယခုလို ဆုံးရှုံးမှုသည် အစားထိုးမရသော ဆုံးရှုံးမှု ဖြစ်သကဲ့သို့ ပေးအပ်လာသော အမိန့်နှင့် တာဝန်ကို အသက်နှင့် ခန္ဓာစွန့်၍ တာဝန်ထမ်းဆောင်ခဲ့သောကြောင့် ချင်းကာကွယ်ရေးတပ် – အရှိုက များစွာ ဂုဏ်ယူမိပါသည်ဟု ထုတ်ပြန်သည်။
ဆက်လက်ပြီး အပြီးပြတ်သေးသော တော်လှန်ရေးတာဝန်များကို CDF – အရှိုက ဆက်လက်ထမ်းဆောင် သွားမည်ဖြစ်ကြောင်း ကျဆုံးရဲဘော်၏ ဝိညဉ်ရှေ့မှောက်တွင် ကတိစ္စာပြုသည်ဟု ထုတ်ပြန်ထားသည်။
နတ်ရေကန်ဗျူဟာကုန်းရှိ စစ်ကော်မရှင်တပ်များ၏ အနည်းငယ် ကျန်ရှိနေရာတချို့ကို အာရက္ခတပ်တော် ULA/ AA နှင့် ပူးပေါင်းတပ်များက ထိုးစစ်ဆင် တိုက်ခိုက်လျက်ရှိနေသကဲ့သို့ ကစဉ့်ကလျား ထွက်ပြေးနေသော စစ်ကော်မရှင်တပ်ဖွဲ့ဝင်တချို့နှင့် တော်လှန်ရေးတပ်တို့သည် နေရာတချို့တွင် တိုက်ပွဲများ ဆက်လက်ဖြစ်ပွားနေသည်ဟု အောက်တိုဘာလ ၁၇ ရက်မှာ ULA/ AA က ထုတ်ပြန်ထားသည်။
စစ်ကော်မရှင်၏ မတရား စစ်မှုထမ်းရန် စုဆောင်းခြင်းခံရသောသူများအနေဖြင့် မိမိတို့ထံ ဆက်သွယ်၍ အချိန်မရွေး လက်နက်ချ အလင်းဝင်ရောက်နိုင်ပါကြောင်း ULA/AA အပါအဝင် တော်လှန်ရေးတပ်ဖွဲ့များက ထုတ်ပြန်ထားသည်။
