ဂျပန်နိုင်ငံ နီပွန်ဖောင်ဒေးရှင်းဥက္ကဋ္ဌ မစ္စတာဆာဆာကာဝါ၏ကြားဝင်ဆောင်ရွက်မှုကြောင့် စစ်ကောင်စီနှင့် ရက္ခိုင့်တပ်တော် (AA) တို့ အပစ်ရပ်စဲခြင်းဖြစ်သည်ဟု ယနေ့ နိုဝင်ဘာလ ၂၈ ရက် မနက်ပိုင်းကပြုလုပသော သတင်းစာရှင်းလင်းပွဲတွင် AA ပြောရေးဆိုခွင့်ရှိသူ ဦးခိုင်သုခက ပြောဆိုသည်။
ယနေ့ နိုဝင်ဘာလ ၂၈ ရက် နံနက် ၁ဝ နာရီတွင်တွင် ULA/AA ၏ ဆဋ္ဌမအကြိမ်မြောက် သတင်းစာရှင်းလင်းပွဲတွင် လက်ရှိ စစ်ကောင်စီနှင့် ရက္ခိုင့်တပ်တော်အကြား အပစ်ခတ်ရပ်စဲမှုနှင့်ပတ်သက်၍ ဦးခိုင်သုခက ထိုကဲ့သို့ ပြောဆိုသွားခြင်းဖြစ်သည်ဟု ရခိုင်သတင်းဌာန နိရဉ္စရာကဖော်ပြသည်။
“ပွင့်ပွင့်လင်းလင်းပြောရမယ်ဆိုရင် ဂျပန်က နီပွန်ဖောင်ဒေးရှင်းဥက္ကဋ္ဌ မစ္စတာဆာဆာကာဝါရဲ့ ကြားဝင်စေ့စပ်မှုနဲ့ ကျနော်တို့ ဒီကိစ္စ ဖြစ်ပေါ်လာတယ်လို့ ပြောလို့ရပါတယ်” ဟု AA ပြောရေးဆိုခွင့်ရှိသူ ဦးခိုင်သုခက ယင်းသတင်းစာရှင်းလင်းပွဲတွင် ပြောသည်။
ရခိုင်ပြည်နယ်နှင့် ချင်းပြည်နယ် ပလက်ဝမြို့နယ်တို့တွင် ရက္ခိုင့်တပ်တော်နှင့် စစ်ကောင်စီတပ်ဖွဲ့တို့အကြား တကျော့ပြန်တိုက်ပွဲ ပြင်းပြင်းထန်ထန်ဖြစ်ပွားမှုကို နိုဝင်ဘာလ ၂၆ ရက်မှစတင်ကာ နှစ်ဘက်နားလည်မှုဖြင့် လူသားချင်းစာနာမှုဆိုင်ရာ အလွတ်သဘော အပစ်ရပ်စဲလိုက်ခြင်းဖြစ်သည်ဟု သိရသည်။
မစ္စတာဆာဆာကာဝါသည် ယခင် ၂ဝ၂ဝ ပြည့်နှစ်နှင့် ၂ဝ၂၁ ခုနှစ်တုန်းကလည်း စစ်ကောင်စီနှင့် AA တို့ အပစ်ရပ်စဲရန် ကြားဝင်စေ့စပ်ညှိနှိုင်းပေးခဲ့သည့်အတွက် အပစ်ရပ်စဲနိုင်ခဲ့ကြသည်။
အသက် ၈၃ နှစ်အရွယ်ရှိပြီးဖြစ်သည့် မစ္စတာ ဆာဆာကာဝါသည် ဂျပန်နိုင်ငံ၏ မြန်မာနိုင်ငံ အမျိုးသားပြန်လည်သင့်မြတ်ရေးဆိုင်ရာ အထူးကိုယ်စားလှယ်ဖြစ်သလို ဂျပန်ပြည်တွင်းနှင့် ပြည်ပတွင် လူသားချင်းစာနာမှုအထောက်အပံ့များပေးနေသည့် နီပွန်ဖောင်ဒေးရှင်း၏ ဥက္ကဋ္ဌလည်းဖြစ်သည်။
