ချင်းပြည်နယ်တောင်ပိုင်း၊ မတူပီမြို့နယ် မတူပီ-ပလက်ဝ လမ်းမပေါ်တွင် စစ်ကောင်စီတပ်ဖွဲ့ကို CDF-Matupi တပ်ဖွဲ့က ကြားဖြတ်တိုက်ခိုက်ခဲ့ရာတွင် စစ်ကောင်စီတပ်သား ၁၂ ဦးသေဆုံးခဲ့ပြီး အများအပြား ဒဏ်ရာရရှိခဲ့သည်ဟု သိရသည်။
မတူပီမြို့အခြေစိုက် စစ်ကောင်စီတပ်ရင်း ခလရ (၃၀၄) မှ ကား (၃) စီးအပါအဝင် တပ်အင်အား (၈၀) ခန့်သည် မတ်လ ၂၀ ရက်နေ့က မတူပီ- ပလက်ဝလမ်းပေါ်ရှိ ထယ်ဘွေးစခန်းသို့ တပ်အင်အားနှင့် စားနပ်ရိက္ခာများ ဖြည့်ရန် သွားနေစဉ် CDF-Matupi တပ်ဖွဲ့က ကြားဖြတ်တိုက်ခိုက်ခဲ့ခြင်းဖြစ်သည်ဟု CDF-Matupi တပ်ဖွဲ့ ပြောရေးဆိုခွင့်ရှိသူ ကို အာရွန် ပြောသည်။
“စုစုပေါင်းတိုက်ပွဲက ၄ ကြိမ်ဖြစ်တယ်။ အဲ့ထဲမှာ ၁၂ ယောက်လောက် စကစဘက်က ကျတယ်။ ကျွန်တော်တို့ဘက် ရဲဘော်တွေကတော့ ထိခိုက်ဒဏ်ရာရတာမရှိဘူး၊ တိုက်ပွဲက ဆက်လက်ပြင်းထန်လာနိုင်သေးတယ်။ ထယ်ဘွေးစခန်း မရောက်မချင်းပေါ့။” ဟု CDF-Matupi တပ်ဖွဲ့ ပြောရေးဆိုခွင့်ရှိသူ ကိုအာရွန်က ပြောသည်။
စစ်ကောင်စီတပ်ဖွဲ့နှင့် CDF-Matupi တပ်ဖွဲ့တို့သည် မတ်လ ၂၀ ရက်နေ့ နံနက်ပိုင်း ၁၀ နာရီတွင် မတူပီ-ပလက်ဝလမ်း ခြောက်မိုင်၌တကြိမ်၊ ညနေ ၁ နာရီတွင် ခုနှစ်မိုင်နှင့် ရှစ်မိုင်ကြားမှာ တကြိမ် ထိတွေ့မှုဖြစ်ပွားခဲ့ရာ ယင်းနေ့တိုက်ပွဲအတွင်း စစ်ကောင်စီတပ်သား ၃ ဦး သေဆုံးခဲ့သည်ဟု သိရသည်။
ဆက်လက်ပြီး မတ်လ ၂၁ ရက်နေ့ မနက်ပိုင်းတွင်လည်း မတူပီ-ပလက်ဝလမ်းကြား ကိုးမိုင်နှင့် တွီရှစ်ရွာအဝင်တွင် တိုက်ပွဲနှစ်ကြိမ် ထပ်မံဖြစ်ပွားရာ စစ်ကောင်စီတပ်သား ၉ ဦး သေဆုံးကာ အများအပြား ဒဏ်ရာရှိခဲ့သည်ဟု CDF-Matupi က ထုတ်ပြန်သည်။
မတူပီ-ဟားခါးလမ်းတွင် တပ်ချထားသည့် ဗျူဟာတပ်စခန်းမှ လက်နက်ကြီးများ ရမ်းသမ်းပစ်ခတ်ခဲ့သောကြောင့် ဝလီပီကျေးရွာတွင် လက်နက်ကြီးများ ကျရောက်ပေါက်ကွဲကာ ပြည်သူများ အထိအခိုက်မရှိကြောင်း သိရသည်။
