(004SS)
ချင်းပြည်နယ်တောင်ပိုင်း၊ မတူပီ-မင်းတပ်လမ်းမပေါ်ရှိ မိုင်တိုင် (၉၁) လမ်းပိုင်းကို ပြုပြင်နေပြီး ထိုသို့ပြုပြင်နေစဉ်ကာလအတွင်း ဖြတ်သန်းသွားလာခြင်းမပြုလုပ်ရန် မတူပီ တော်လှန်ရေးအဖွဲ့ချုပ် (MRO)/ CDF-Matupi က ယနေ့တွင် ထုတ်ပြန်သည်။
ထိုလမ်းပိုင်းတွင် လမ်းအကျယ်၏ ၅ ပေဝန်းကျင်ကနေ ကတ္တရာများပါအက်ကွဲပြီး ခန့်မှန်းခြေ ၃ ပေ မှ ၁၀ ပေ ဝန်းကျင်သည် မြေကျွံနေကြောင်း ၎င်းတို့ ထုတ်ပြန်သော ဓါတ်ပုံများအရ သိရသည်။
ပျက်စီးယိုယွင်းနေသည့် အပိုင်းတွင် မြေထိန်းနံရံဆောက်ကာ MRO/CDF-Matupi က ပြုပြင်လျက်ရှိနေကြောင်း ဓါတ်ပုံများနှင့်တကွ ဖော်ပြထားသည်။
ထိုသို့ လမ်းပြုပြင်နေစဉ် ဖြတ်သန်းသွားလာနေသော ယာဉ်ကြီးများ၏ အလေးချိန်နှင့် တုန်ခါမှုကြောင့် ကားလမ်းပြုပြင်ရာတွင် အခက်များ ကြုံတွေ့နေရကြောင်း သိရသည်။
ထို့ကြောင့် မတူပီ-မင်းတပ် လမ်းမပေါ် ဖြတ်သန်းမည့် ယာဉ်များအားလုံးအနေဖြင့် လမ်းပြုပြင်မည့်ကာလ မေလ ၂၂ ရက်နေ့မှ ဇွန်လ ၅ ရက်နေ့ (၂ ပါတ်) အတွင်း လုံးဝ (လုံးဝ) သွားလာခြင်းမပြုကြရန် အသိပေးချက် ထုတ်ပြန်ထားသည်။
မတူပီ-မင်းတပ် လမ်းမပေါ်ရှိ မိုင်တိုင် (၉၁) လမ်းပိုင်းသည် မတူပီလူထု၏ ကုန်စည်စီးဆင်းရာ အဓိကလမ်းမဖြစ်သည်။
