မီဇိုရမ်ပြည်နယ်က မြန်မာစစ်ဘေးရှောင်စခန်းတချို့မှာ ဆန်နှင့် ရိက္ခာများ ပေးအပ်လှူဒါန်း

(05MK)

မီဇိုရမ်ပြည်နယ်အတွင်းရှိ မြန်မာစစ်ဘေးရှောင်စခန်းတချို့မှာ ဆန်နှင့် ရိက္ခာများကို Network for Unity Association Mizoram (NUA) အဖွဲ့က အရေးပေါ် ကူညီထောက်ပံ့ပေးအပ်ခဲ့ကြသည်ဟု သိရသည်။

မီဇိုရမ်ပြည်နယ် အိုင်ဇောလ်၊ မာမစ် နှင့် ကော်လစစ်ခရိုင် ၃ ခုတွင်နေထိုင်ကြသော မြန်မာစစ်ဘေးရှောင်စခန်း ၆ ခုတွင် ဩဂုတ်လ ၂၁ ရက်နေ့က ဆန်၊ ဆီ နှင့် ခေါက်ဆွဲခြောက်ထုတ်များကို NUA အဖွဲ့က သွားရောက်ထောက်ပံ့ခဲ့ကြခြင်းဖြစ်သည်။

မြန်မာစစ်ဘေးရှောင်များအား ကူညီထောက်ပံ့မှုပေးနိုင်ရန် အမေရိကန်ပြည်ထောင်စုအခြေစိုက် Project Chin Hill မှ ရူပီး တစ်သိန်း၊ အိုင်ဇောလ်မြို့တွင်နေထိုင်သော Pu Tanpuia က စားသုံးဆီ (အဖာ ၃၀) နှင့် Pu Tluanga က ခေါက်ဆွဲခြောက် (၃၅၀) ထုတ်တို့ ပေးအပ်လှူဒါန်းခဲ့ကြသည်ဟု NUA က ထုတ်ပြန်သည်။

ယခုကဲ့သို့ စစ်ဘေးရှောင်များအား ကူညီထောက်ပံ့ နိုင်ရန် ကူညီဆောင်ရွက်ပေးသော ချင်းအဆိုတော် Rebecca Fanai အပေါ်မှာလည်း ကျေးဇူးတင်ရှိကြောင်း ဖော်ပြထားသည်။

မီဇိုရမ်ပြည်နယ်တွင် စစ်ဘေးရှောင်နေကြသော မြန်မာနိုင်ငံက စစ်ဘေးရှောင်ပြည်သူများသည် အချိန်ကြာလာသည်နှင့်အမျှ ကူညီထောက်ပံ့သူ နည်းသထက်နည်းပါးလာပြီး ယခုလက်ရှိမှာလည်း အရေးပေါ်ကူညီထောက်ပံ့မှုလိုအပ်သော စစ်ဘေး ရှောင်စခန်း အများအပြားရှိနေသေးကြောင်း NUA က ဆိုသည်။

ထို့ကြောင့် ပြည်တွင်း/ပြည်ပအလှူရှင်များနှင့် ချင်းပြည်သူများအနေဖြင့် စစ်ဘေးရှောင်များအား ကူညီထောက်ပံ့ရေးတွင် ဆက်လက်အားစိုက်ပေးကြရန်လည်း NUA က တောင်းဆိုထားသည်။

Network for Unity Association Mizoram (NUA) အဖွဲ့သည် မီဇိုရမ်ပြည်နယ်အတွင်းရှိ စစ်ဘေးရှောင်ကူညီရေး အသင်းအဖွဲ့များ၊ တက်ကြွလှုပ်ရှားသူများ၊ အရပ်ဖက်အဖွဲ့အစည်းများမှ စုပေါင်းဖွဲ့စည်းထားသည့်အဖွဲ့အစည်းဖြစ်သည်။