(004SS)
အိန္ဒိယနိုင်ငံ၊ နယူးဒေလီမြို့ရှိ နိုင်ငံခြားသားမှတ်ပုံတင်ရုံး (FRRO) မှ မြန်မာဒုက္ခသည်များ တတိယနိုင်ငံသို့ ထွက်ခွာခွင့် (Exit Permit) ရရှိရန်အတွက် ငွေကြေးရူပီး ၅ သိန်း တောင်းခံသည့် ကိစ္စနှင့် ပတ်သက်၍ ခိုင်လုံသော စာရွက်စာတမ်း သက်သေ အထောက်အထားများရှိပါက ဒေလီတရားရုံး (Delhi High Court) သို့ တင်ပြပေးမည်ဟု ရှေ့နေကြီး Dr. Ashok Agarwal က ပြောကြားခဲ့ကြောင်း ချင်းဒုက္ခသည်များကော်မတီ (CRC- New Dehli) ထံမှ သိရသည်။
ချင်းဒုက္ခသည်များကော်မတီမှ OB ခေါင်းဆောင်များသည် မတ်လ ၁၂ ရက် နေ့လယ် ၁ နာရီတွင် Delhi High Court သို့ ရှေ့နေကြီး Dr. Ashok Agarwal နှင့် သွားရောက်တွေ့ဆုံစဉ် ထိုသို့ ပြောကြားခဲ့ခြင်း ဖြစ်သည်။
တွေ့ဆုံမှုတွင် CRC ခေါင်းဆောင်များက Exit Permit အတွက် ငွေကြေးအမြောက်အမြား တောင်းခံနေရသည့် အခြေအနေ ကို တင်ပြခဲ့ရာ၊ ရှေ့နေကြီးက အဆိုပါကိစ္စကို တရားဥပဒေကြောင်းအရ ဖြေရှင်းနိုင်ရန်အတွက် FRRO ရုံးမှ တောင်းခံသည့် စာရွက်စာတမ်း သို့မဟုတ် ခိုင်လုံသော သက်သေရှိပါက တရားရုံးသို့ တရားဝင်တင်ပြပေးမည်ဟု အာမခံခဲ့ကြောင်း သိရ သည်။
ထို့အပြင် CRC အနေဖြင့် မြန်မာဒုက္ခသည်များ၏ လုံခြုံရေး (Protection) ပိုမိုအားကောင်းလာစေရန်နှင့် အခြားအရေးကြီး သော လိုအပ်ချက်များကိုလည်း ထည့်သွင်းတောင်းဆိုခဲ့ကြောင်း သိရသည်။
ထို့ကြောင့် နယူးဒေလီရောက် မြန်မာဒုက္ခသည်များအနေဖြင့် မိမိတို့အား အဆိုပါ ငွေကြေးပမာဏကို တောင်းခံရသည့် သက်သေအထောက်အထားများ ရှိပါက CRC ရုံးသို့ အမြန်ဆုံး အကြောင်းကြားပေးရန် ကော်မတီက မေတ္တာရပ်ခံထား သည်။
ရှေ့နေကြီး Dr. Ashok Agarwal သည် နယူးဒေလီရောက် မြန်မာဒုက္ခသည်များအတွက် လူသားချင်းစာနာထောက်ထား မှုဆိုင်ရာ အကူအညီများနှင့် ဥပဒေကြောင်းအရ အကာအကွယ်ပေးမှုများတွင် အဓိကကျသော ပုဂ္ဂိုလ်တစ်ဦးဖြစ်ကြောင်း CRC ထုတိပြန်ချက်အရ သိရသည်။
၎င်းသည် ဒုက္ခသည်မိသားစုများ၏ အခြေခံအခွင့်အရေးများဖြစ်သော ပညာရေးနှင့် ကျန်းမာရေးကဏ္ဍများတွင် အခမဲ့ရရှိ နိုင်ရန် တစိုက်မတ်မတ် ဆောင်ရွက်ပေးခဲ့ကြောင်းလည်း ဆိုသည်။
Dr. Ashok Agarwal ၏ ကြိုးပမ်းမှုကြောင့် မြန်မာဒုက္ခသည်ကလေးငယ်များသည် အစိုးရကျောင်းများတွင် အခမဲ့ပညာ သင်ကြားခွင့် (Government School Admission) ရရှိခဲ့သည့်အပြင်၊ Mata Chanan Devi (MCDH) ဆေးရုံကြီးတွင် လည်း ဆင်းရဲနွမ်းပါးသူများအတွက် သတ်မှတ်ထားသော (EWS – Economically Weaker Section) အစီအစဉ်ဖြင့် အခမဲ့ဆေးကုသခွင့် ရရှိစေရန် စီစဉ်ပေးကြောင်း သိရသည်။
ယခုကဲ့သို့ ဒုက္ခသည်များအရေး စဉ်ဆက်မပြတ် ကူညီပေးနေသော ရှေ့နေကြီး Dr. Ashok Agarwal အား CRC က အထူးကျေးဇူးတင်စကား ပြောကြားခဲ့ပြီး အမှတ်တရလက်ဆောင်များအဖြစ် ချင်းရိုးရာ အင်ကျီတစ်ထည်၊ စားစရာ သစ်သီးဝလံမျိုးစုံ၊ ကျေးဇူးတင်ဂုဏ်ပြုလွှာ (Appreciation Certificate) တို့အား ပေးအပ်ခဲ့ကြကြောင်း သိရသည်။
