(005MK)
မီဇိုရမ်ပြည်နယ် အိုင်ဇောလ်မြို့တွင် မှုခင်းစုံစမ်းစစ်ဆေးရေးအထူးဌာနခွဲ (CID-SB) အဖွဲ့က ယမန်နေ့ညက မြန်မာနိုင်ငံသား ၂ ဦးထံမှ ဘိန်းဖြူနှင့် စိတ်ကြွဆေးအများအပြား ဖမ်းဆီးရမိခဲ့သည်ဟု သိရသည်။
မီဇိုရမ်ရဲတပ်ဖွဲ့၏ ထုတ်ပြန်ချက်အရ CID-SB အဖွဲ့က ကြိုတင်သတင်းရရှိထားချက်အရ စက်တင်ဘာလ ၁၆ ရက်ည ၁၀ နာရီခန့်တွင် အိုင်ဇောလ်မြို့အနီး Hualngohmun နေရာတွင် အိမ်စီးကား ၂ စီးကို ရပ်တန့်စစ်ဆေးရာတွင် ဘိန်းဖြူနှင့် စိတ်ကြွဆေးများကို ဖမ်းဆီးခဲ့ခြင်းဖြစ်သည်ဟု သိရသည်။
အဆိုပါကား ၂ စီးကို ရှာဖွေစစ်ဆေးရာတွင် ကားတံခါးထဲမှာ ဝှက်ထားသော ဘိန်းဖြူ ၈၁၄ ဂရမ် (ဆပ်ပြာဖူး ၆၈ ဖူး) နှင့် စိတ်ကြွဆေးပြား ကီလိုဂရမ် ၄၀ (အထုတ်ပေါင်း ၄၀) ကို ဖမ်းဆီးရမိခဲ့သည်ဟု သိရသည်။
အဆိုပါ မူးယစ်းဆေးဝါးများနှင့်အတူ ယာဉ်မောင်း ၂ ဦးဖြစ်သည့် ချင်းပြည်နယ် ရိခေါဒါရ်မြို့ အမှတ် ၂ ရပ်ကွက် (Tiau-Khawmawi) တွင် နေထိုင်ကြသော အသက် ၂၆ နှစ်အရွယ် Lalthansiama နှင့် အသက် ၂၃ နှစ်အရွယ် Zoremmawia တို့ကိုလည်း ဖမ်းဆီးခဲ့သည်ဟု ဖော်ပြထားသည်။
နောက်ထပ်ကားတစ်စီးကိုလည်း ရပ်တန့်စစ်ဆေးရန်လုပ်နေစဉ်မှာ မောင်းပြေးသွားသည့်အတွက် လိုက်လံရှာဖွေကြရာမှာ ယနေ့မနက်ပိုင်း ၁ နာရီခန့်တွင် Zuangtui ရပ်ကွက်တွင် ဖမ်းမိပြီး ရှာဖွေစစ်ဆေးရာမှာ ဘိန်းဖြူ ၂.၂၈၄ ကီလိုဂရမ် (ဆပ်ပြာဖူး ၁၉၆ ဖူး) ကို ထပ်မံဖမ်းဆီးရမိခဲ့သည်ဟု သိရသည်။
ယာဉ်မောင်းသူမှာ ထွက်ပြေးလွတ်မြောက်သွားသည့်အတွက် ကားပေါ်လိုက်ပါလာသော အသက်မပြည့်သေးသူတစ်ဦးကို စစ်ဆေးမေးမြန်းရန်ခေါ်ဆောင်သွားကြသည်ဟု သိရသည်။
မှုခင်းစုံစမ်းစစ်ဆေးရေးအထူးဌာနခွဲ (CID-SB) အဖွဲ့မှ ကား ၃ စီးထဲကနေ ဖမ်းဆီးရမိသော မူးယစ်ဆေးဝါးစုစုပေါင်းမှာ စိတ်ကြွဆေးပြား ၄၀.၀၃၄ ကီလိုဂရမ် (ကာလတန်ဖိုး ရူပီးသိန်း ၅၀၀ ကျော်) နှင့် ဘိန်းဖြူ ၃.၀၉၈ ကီလိုဂရမ် (ကာလ တန်ဖိုး ရူပီး ၉၂ သိန်းကျော်) ရှိသည်ဟု သိရသည်။
