ကလေးမြို့နယ်တောင်ပိုင်း ကလေး-ဂန့်ဂေါ ကားလမ်းမပေါ်ရှိ မှန်တောကျေးရွာမှ စစ်ဘေးရှောင်ချင်းလူငယ် ၃ ဦးသည် ရွာထဲသို့ ရိက္ခာသွားယူနေစဉ် စစ်ကောင်စီတပ်ဖွဲ့က ဖမ်းဆီးသတ်ဖြတ်ခဲ့သည်ဟု ဒေသခံများထံမှ သိရသည်။
“သူတို့က တောထဲကနေ ရွာထဲကို ရိက္ခာပြန်ယူတာ စကစတွေလာတာ တယောက်နဲ့တယောက် အချိတ်အ ဆက်မမိကြတာထင်တယ်သူတို့ကိုဖမ်းတာ၊ ရွာထိပ်မှာပဲ သူတို့ ၃ ယောက်စလုံးအသတ်ခံရတာ၊ နှစ်ယောက်က ညီကိုအရင်းတွေ” ဟု မှန်တောဒေသခံတစ်ဦးက ပြောသည်။
အသတ်ခံရသည့် ချင်းလူငယ် ၃ ဦးမှာ Salai Ni Dun Sang (၁၉ နှစ်) Pu Thang Bik (၂၉ နှစ်)နှင့် Pa Lian Thio (၃၁ နှစ်) တို့ ဖြစ်ကြသည်။
၎င်းတို့ ၃ ဦးသည် ရွာထဲသို့ ရိက္ခာပြန်သွားယူသည့်အချိန် ဧပြီလ ၈ ရက်နေ့က စစ်ကောင်စီတပ်ဖွဲ့စစ်ကြောင်းနှင့် တိုးမိကာ အဖမ်းခံရခြင်းဖြစ်ပြီး ဧပြီလ ၉ ရက်နေ့တွင် ရွာထိပ်သို့ သတ်ဖြတ်ခံထားရသည့် ရုပ်အလောင်းကို တွေ့ရှိခဲ့ကြခြင်းဖြစ်သည်။
မှန်တောကျေးရွာသည် ကလေးမြို့မှ ၃၅ မိုင်ခန့်ကွာဝေးပြီး စစ်ကောင်စီတပ်ဖွဲ့နှင့် ပြည်သူ့ကာကွယ်ရေးတပ်ဖွဲ့တို့အကြား တိုက်ပွဲဖြစ်ပွားမှုကြောင့် ဒေသခံအားလုံးသည် ရွာကိုစွန့်ခွါ၍ တောထဲသို့ ထွက်ပြေးတိမ်းရှောင်နေသည်မှာ ၂ လခန့်ရှိပြီဟု သိရသည်။
