(004SS)
ချင်းပြည်နယ်၊ တီးတိန်နှင့် တွန်ဇံမြို့နယ် (ဇိုဂမ်ဒေသ) အတွင်းရှိ လက်နက်ကိုင်အဖွဲ့အစည်းများအနေဖြင့် အမျိုးသားရေးနှင့် ပြည်သူ့တာဝန် ထမ်းဆောင်ခြင်းဆိုင်ရာ ကိစ္စရပ်များတွင် လူ့ဂုဏ်သိက္ခာ၊ လွတ်လပ်စွာ ရွေးချယ်ပိုင်ခွင့်နှင့် တစ်ဦးချင်းစီ၏ ရပ်တည်ချက်များကို အလေးထားလိုက်နာကြရန် Zomi Innkuan USA က အလေးအနက် တောင်းဆိုကြောင်း ထုတ်ပြန်သည်။
အမေရိကန်ပြည်ထောင်စု၊ အိုကလာဟိုးမားပြည်နယ်၊ တူလ်ဆာမြို့အခြေစိုက် Zomi Innkuan USA, Inc. က ဇိုဂမ်ဒေသအတွင်းရှိ ဇိုမီးလူမျိုးများအား မဖြစ်မနေ စစ်မှုထမ်းရန် ဖိအားပေး ဆောင်ရွက်နေမှုများနှင့် ပတ်သက်၍ မတ်လ ၃၁ ရက်နေ့က တောင်းဆိုလိုက်ခြင်း ဖြစ်သည်။
အဆိုပါ ထုတ်ပြန်ချက်တွင် ယခုရက်ပိုင်းအတွင်း ဇိုဂမ်ဒေသရှိ မိဘပြည်သူများအား စစ်မှုထမ်းရန် ဖိအားပေးနေ မှုများအပေါ် အထူးစိုးရိမ်မကင်း ဖြစ်ရကြောင်း ဖော်ပြထားသည်။
တော်လှန်ရေး အဖွဲ့အစည်းများအနေဖြင့် ဇိုမီးလူမျိုးတို့၏ အနာဂတ်အတွက် ပေးဆပ်နေမှုများကို အသိအမှတ် ပြုသော်လည်း ပါဝင်ကူညီ အမှုထမ်းရာတွင် ကာယကံရှင်တစ်ဦးချင်းစီ၏ သဘောဆန္ဒ၊ လူသားဂုဏ်သိက္ခာနှင့် ကိုယ်ပိုင်ဆုံးဖြတ်ပိုင်ခွင့် စသည့် အခြေခံမူများအပေါ် လေးစားမှုကို အခြေခံသင့်ကြောင်း ဆိုသည်။
အထူးသဖြင့် စစ်မှုထမ်းရန်အတွက် အတင်းအဓမ္မ ဖမ်းဆီးခြင်းနှင့် လူ့အခွင့်အရေး ချိုးဖောက်ခြင်းများကို ချက်ချင်းရပ်တန့်ပေးရန် တိုက်တွန်းထားသည်။
ထို့အပြင် ခိုင်မာစည်းလုံးသော အနာဂတ်ကို တည်ဆောက်ရာတွင် အင်အားသုံး နိုင်ထက်စီးနင်းပြုခြင်းမျိုး မဟုတ်ဘဲ အပြန်အလှန် ယုံကြည်မှု၊ ပူးပေါင်းတာဝန်ယူမှုနှင့် တစ်ဦးချင်းစီ၏ အခွင့်အရေးကို လေးစားမှုတို့ အပေါ်တွင်သာ အခြေခံသင့်ကြောင်း Zomi Innkuan USA က ထောက်ပြထားသည်။
