(004SS)
အိန္ဒိယနိုင်ငံ၊ နယူးဒေလီရောက် မြန်မာနိုင်ငံသား ဒုက္ခသည်များ၏ လုံခြုံရေးလိုအပ်ချက်ကြောင့် ဒုက္ခသည် အသိအမှတ် ပြုကဒ်(UN card)ကို အမြန်ဆုံးထုတ်ပေးနိုင်ရန် UNHCR – protection unit ထံ CRC-New Delhi က တင်ပြတောင်းဆို ထားကြောင်းသိရသည်။
ချင်းဒုက္ခသည် ကော်မတီ CRC ဥက္ကဌ ဦးဆောင်သော ကွန်မြူနတီ အသီးသီးမှ ဥက္ကဌများသည် ဧပြီလ ၁၅ ရက်နေ့ မွန်းလွဲပိုင်းတွင် UNHCR – protection unit မှ တာဝန်ရှိသူများထံ ဒုက္ခသည်များ၏ အရေးကိစ္စများကို ၃ နာရီကြာ တင်ပြဆွေးနွေးခဲ့ကြသည်ဟု CRC က ထုတ်ပြန်သည်။
နယူဒေလီရှိ မြန်မာနိုင်ငံသား ဒုက္ခသည်များ၏ ၉၀ရာခိုင်နှုန်းသည် ယာယီကဒ်ကိုင်ဆောင်သူ များဖြစ်ပြီး ၎င်းတို့အတွက် လုံခြုံရေး ၊ ကျန်းမာရေး စသည့် ရုပ်ပိုင်းဆိုင်ရာ စိတ်ပိုင်းဆိုင်ရာ ကာကွယ်စောင့်ရှောက်မှုများ အထူးလိုအပ်နေသောကြောင့် ဒုက္ခသည် အသိအမှတ်ပြု ကဒ်များ အမြန်ဆုံးထုတ်ပေးနိုင်ရန် တောင်းဆိုခဲ့ခြင်းဟု သိရသည်။
“အထူးသဖြင့် လုံခြုံရေးပိုင်းမှာ အခက်အခဲ အများကြီးရှိတာပေါ့နော်။ လုပ်ငန်းခွင်မှာဆိုလို့ရှိရင် job securityမရှိဘူး၊ သူတို့ကြိုက်တဲ့ချိန် အလုပ်ထုတ်တာ၊ ပြန်ခိုင်းတာမျိုး၊ နောက် ပညာရေးဆိုရင်လဲပဲ ကျောင်းတော့ တက်ကြပါရဲ့ ရှေ့ဆက် ပညာရေး အာမခံချက်မရှိဘူး၊ ကျောင်းမှာ ခွဲခြားဆက်ဆံမှုတွေ၊ ယဉ်ကျေးမှု ဓလေ့မတူညီလို့ ဘာသာစကား အခက်အခဲ ရှိလို့၊ ငွေကြေးအခက်အခဲရှိလို့ ပညာဆက်မသင်ရတော့ဘဲ ငယ်ငယ်ရွယ်ရွယ်နဲ့ အိမ်ထောင်ပြုဖို့ ဆုံးဖြတ်ကြရတာတွေ၊ ဆိုတော့ ပညာရေး၊ ကျန်းမာရေး၊ ရုပ်ပိုင်းဆိုင်ရာ စိတ်ပိုင်းဆိုင်ရာ လုံခြုံမှု၊ အသက်မွေးဝမ်းကျောင်း ( livelihood) စတဲ့ ကဏ္ဍအသီးသီးမှာ ဘာ Security မှ မရှိဘူး။ ဒါကြောင့် UN အနေနဲ့ ကျွန်တော်တို့ကို ဘာကြောင့် လစ်လျူရှုတာလဲ။ ကျွန်တော်တို့ရဲ့ အသံကို နားမစွန့်တော့ဘူးလား။ စသဖြင့် ဆွေးနွေးတင်ပြဖြစ်တယ်။” ဟု CRC-New Delhi မှ တာဝန်ရှိသူတစ်ဦးက ပြောသည်။
ထို့အပြင် ကျန်းမာရေးမကောင်းသူများ၊ နှစ်ရှည်နေထိုင်သူများ၊ ရပ်တည်နေထိုင်ရန် ခက်ခဲသူများနှင့် နှစ်ရှည်လများစွာ ကြာအောင် ဒုက္ခသည်များကို တတိယနိုင်ငံသို့ ပို့ဆောင်ပေးရန်လည်း တောင်းဆိုခဲ့ကြောင်း သိရသည်။
လတ်တလော အိန္ဒိယနိုင်ငံ၌ အတည်ပြုထားသည့် နိုင်ငံခြားသားများနှင့် ရွှေ့ပြောင်းနေထိုင်သူများကို ဥပဒေအရ စစ်ဆေး မှုများကြောင့် ဘုရားကျောင်းအချို့ကို ဘုရားဝတ်ပြုကိုးကွယ်နေစဉ်တွင်ပင် စစ်ဆေးခံရခြင်း၊ ယာယီကဒ်ကိုင် ဆောင် သူများကို နေရပ်ရင်းပြန်လည်ပို့ဆောင်မည်ဟု ပြောဆိုခြင်းများရှိကြောင်း CRC-New Dehli က ဆိုသည်။
နယူးဒေလီရောက် ချင်းဒုက္ခသည် ကော်မတီ CRC ၏ တင်ပြတောင်းဆိုချက်များကို UNHCR – protection unit မှ တာဝန်ရှိသူများက အထက်သို့ ဆက်လက်တင်ပြပေးမည်ဟု တုန့်ပြန်ခဲ့ကြောင်း သိရသည်။
ထို့နောက် ဒုက္ခသည်များနှင့် ဒုက္ခသည်များဆိုင်ရာ မဟာမင်းကြီး အပါအဝင်တာဝန်ရှိသူများသည် လာမည့် မေလ တွင် (Open House) အစည်းအဝေးပြုလုပ်သွားမည်ဟုလည်း တုန့်ပြန်ပြောဆိုခဲ့သည်။
CRC အနေဖြင့် ၎င်းတို့ တောင်းဆိုမှုများအပေါ် UNHCR ၏ ဖြည့်ဆည်းလုပ်ဆောင်ပေးခြင်းရှိမရှိ စောင့်ကြည့်ကာ ထူးခြားတိုးတက်ပြောင်းလဲမှုများမရှိပါက လိုအပ်ချက်များ ရရှိနိုင်ရန် အခြားသောနည်းလမ်းများဖြင့် ဆက်လက်ဆောင်ရွက်သွားမည်ဟု အသိပေးထားသည်။
