(006SV)
လွတ်လပ်သော မြန်မာသတင်းမီဒီယာများ အကျပ်အတည်းကြားမှ ရှင်သန်တည်တံ့ရေးကို မြန်မာနိုင်ငံပြည်ပ တစ်နေရာတွင် ဆွေးနွေးပွဲကျင်းပပြုလုပ်ခဲ့သည်ဟု နိုင်ငံတကာ မြန်မာသတင်း – BNI က မေလ ၁၀ ရက်မှာ ထုတ်ပြန်သည်။
မေလ ၅ ရက်မှ ၇ ရက်အထိ မြန်မာနိုင်ငံ ပြင်ပတစ်နေရာမှာ နိုင်ငံတကာ မြန်မာသတင်း – BNI က ကြီးမှုး၍ နဝမအကြိမ်မြောက် တိုင်ရင်းမီဒီယာညီလာခံကို ကျင်းပပြုလုပ်ရာမှာ ဆွေးနွေးခဲ့ခြင်းဖြစ်သည်ဟု သိရသည်။
ညီလာခံတက်ရောက်လာသူ သတင်းသမားများက လတ်တလော ကြုံတွေ့နေရသည့် ဘဏ္ဍာရေး အပါအဝင် အခြားအခက်အခဲ များကို တင်ပြဆွေးနွေးမှုအပေါ် အလှူရှင်များနှင့် တက်ရောက်လာသော အဖွဲ့အစည်းများကလည်း အကြံပြု ဆွေးနွေးမှုများ ပြုလုပ်ခဲ့သည်ဟု သိရသည်။
လွတ်လပ်သော သတင်းမီဒီယာများ ရေရှည် ရပ်တည်နိုင်ရေးအတွက် နိုင်ငံတကာကူညီထောက်ပံ့မှုများအပြင် သတင်းမီဒီယာ တစ်ခုချင်းစီက နည်းလမ်းများ ရှာဖွေကြိုးစားသင့်ကြောင်း ဆွေးနွေးခဲ့ကြသည်ဟု သိရသည်။
တိုင်းရင်းမီဒီယာညီလာခံမှာ မြန်မာနိုင်ငံအတွင်း ဖြစ်တည်နေသော ကြားကာလ အုပ်ချုပ်ရေးဆိုင်ရာ ရှုပ်ထွေးမှု အခြေအနေများ၊ နိုင်ငံရေး ရှုပ်ထွေးမှုများကြားက သတင်းတင်ဆက် ထုတ်လွှင့်မှု အခြေအနေများနှင့် အနာဂါတ် အုပ်ချုပ်ရေးဆိုင်ရာ အခြေအနေများကိုလည်း ဆွေးနွေးခဲ့ကြသည်ဟု သိရသည်။
ညီလာခံတွင် နိုင်ငံတကာ မြန်မာသတင်း – BNI က စုစည်းနေသော သတင်းမီဒီယာဆိုင်ရာ ဥပဒေများအပေါ် ပြင်ဆင်ဖြည့်စွက် အကြံပြုရန် လိုအပ်ချက်များကို ထပ်မံ ဖြည့်စွက် ဆွေးနွေးခဲ့ကြကြောင်း၊ ဆွေးနွေးချက်များတွင် မီဒီယာ ကောင်စီနှင့် သတင်း မီဒီယာ ဥပဒေ၊ ရုပ်မြင်သံကြား နှင့် အသံထုတ်လွှင်ခြင်းလုပ်ငန်းဆိုင်ရာ ဥပဒေ၊ အများပြည်သူ ဝန်ဆောင်မှု မီဒီယာအခန်းကဏ္ဍတို့ ပါဝင်ကြောင်း သိရသည်။
အနာဂါတ်မှာ ပေါ်ပေါက်လာမည့် သတင်းမီဒီယာဆိုင်ရာ ဥပဒေများ ပြင်ဆင်ရေးဆွဲရာတွင် အောက်ခြေမှ အထက်သို့ (Bottom- Up Federalism) ပုံသဏ္ဍာန်ကို အခြေခံရန်နှင့် မီဒီယာ ကောင်စီ၊ အများပြည်သူ ဝန်ဆောင်မှု မီဒီယာ၏ တာဝန်ရှိသူ အဖွဲ့အစည်းများကို အစိုးရနှင့် ကင်းလွတ်သော အဖွဲ့အစည်းများ ဖြစ်ရန်တို့ ဆွေးနွေးခဲ့သည်ဟု သိရသည်။
ထို့အပြင် တိုင်းရင်းသားလူမျိုးစုများ၊ အခြားစုံလင်ကွဲပြားသော အုပ်စုများ ပါဝင်မှုရှိသည့် ပုံစံဖြင့် ဖွဲ့စည်းသင့်ကြောင်းလည်း ဆွေးနွေးခဲ့သည်ဟု သိရသည်။
ညီလာခံကို လွတ်လပ်သော မြန်မာသတင်းမီဒီယာများမှ သတင်းသမားများ၊ အရပ်ဖက်အဖွဲ့အစည်းများ၊ သံတမန်အချို့နှင့် မီဒီယာပံ့ပိုးသော အဖွဲ့အစည်းများမှ ကိုယ်စားလှယ်များ စုစုပေါင်း ၁၃၀ နီးပါး တက်ရောက်ခဲ့သည်ဟု သိရသည်။
