ဟားခါးကို လေကြောင်းဖြင့် အင်အား ၂၀၀ ခန့်ဖြည့်ပြီး ထန်တလန်ကို စစ်ကူပို့နိုင်ရန် စစ်ကောင်စီ ကြိုးပမ်း
(006SV)
ချင်းပြည်နယ်၊ ဟားခါးမြို့နှင့် ထန်တလန်မြို့ကြားက တိုက်ပွဲများတွင် ပွိုင့် ၃ စခန်းကုန်းကို ချင်းပြည်အစိုးရ ပူးပေါင်းတပ်က သိမ်းပိုက်လိုက်ပြီး နှစ်ဖက်ထိခိုက်ကျဆုံးမှုများ ရှိနေသည်။
ဟားခါး- ထန်တလန်ကြားရှိ စစ်ကောင်စီစခန်းများကို ချင်းပြည်အစိုးရပူးပေါင်းတပ်များက နိုဝင်ဘာလ ၂၂ ရက်မှ စတင်၍ ထိုးစစ်ဆင်တိုက်ခိုက်နေခဲ့ရာ နိုဝင်ဘာလ ၂၅ ရက်တွင် စစ်ရေးအရ အရေးပါသည့် ပွိုင့် – ၃ စခန်းကုန်းကို သိမ်းနိုင်ခဲ့ခြင်းဖြစ်ကြောင်း ချင်းအမျိုးသားတပ်ဦး CNF/ CNA ပြောရေးဆိုခွင့်ရှိသူ ဆလိုင်းထက်နီက ပြောသည်။
“ဟားခါး-ထန်တလန်ကြားမှာ ရှိနေတဲ့ စစ်ကောင်စီစခန်းတွေကို ထိုးစစ်ဆင်နေတာပါ။ အခုလ ၂၂ ရက်ကနေ ဒီနေ့အထိပေါ့နော်။ အဲဒီမှာ စခန်းငယ်တစ်ခုပေါ့နော်။ ၂၅ ရက်နေ့ မှာ ကျနော်တို့ ဝင်စီးနိုင်ခဲ့တယ်။ သူတို့ အဓိက အသုံးချတာက လေကြောင်းကနေ ဗုံးကြဲတာက နေ့စဉ်ဆက်တိုက်ပြန်လုပ်နေတယ်” ဟု ဆလိုင်းထက်နီက ပြောသည်။
စခန်းအတွင်း စစ်ကောင်စီ ရုပ်အလောင်း ၆ လောင်းကို တွေ့ရှိခဲ့ပြီး တပ်ဖွဲ့ဝင် ၂၀ ထက်မနည်း ဒဏ်ရာများ ရရှိနိုင်သည်၊ စစ်ကောင်စီတပ်ဖွဲ့ဝင်များ တိုက်ပွဲတွင် ထွက်ပြေးကြသည်ဟု သိရသည်။
လေကြောင်းတိုက်ခိုက်မှု အပြင်းအထန်ကြားမှ စခန်းသိမ်းနိုင်ခဲ့ခြင်းဖြစ်ပြီး ချင်းပြည်အစိုးရပူးပေါင်းတပ်ဖွဲ့မှ ရဲဘော် ၃ ဦး ကျဆုံးကာ၊ ရဲဘော် ၉ ဦးထက်မနည်း မစိုးရိမ်းရ ထိခိုက်ဒဏ်ရာများရရှိခဲ့သည်ဟု သိရသည်။
တိုက်ပွဲအတွင်း သေနတ် ၂ လက် သိမ်းဆည်းရမိခဲ့ပြီး စခန်းသိမ်းရာတွင် စက်သေနတ် တစ်လက်အပါအဝင် သေနတ် ၇ လက်နှင့် လက်နက်ခဲယမ်းများ ရရှိခဲ့ကြောင်း သိရသည်။
လက်ရှိတွင် ဟားခါး – ထန်တလန်ကြားတွင် တိုက်ပွဲများ ဆက်လက်ဖြစ်ပွားနေပြီး ယနေ့တွင် လေကြောင်းဖြင့် ၃ ကြိမ် လာရောက်ဗုံးကြဲတိုက်ခိုက်သည်ဟု သိရသည်။
ဟားခါး- ထန်တလန်ကြား တိုက်ပွဲများတွင် စစ်ကောင်စီသည် လေကြောင်းတိုက်ခိုက်မှု နေ့စဉ်နီးပါး ပြုလုပ်နေပြီး ဟားခါးမြို့ မှလည်း လက်နက်ကြီးပစ်ကူများပေးနေသည်ဟု သိရသည်။
နိုဝင်ဘာလ ၂၆ ရက် နေ့လည်ပိုင်းက ဟားခါးမြို့ ခလရ – ၂၆၆ တပ်ရင်းထဲကို လေကြောင်းမှ အင်အား ၁၈၀ ကျော်မှ ၂၀၀ နီးပါးအထိ ဖြည့်တင်းခဲ့ပြီး ထန်တလန်မြို့ကို တပ်အင်အားဖြည့်ရန် ကြိုးပမ်းမှုကို ဖြတ်တောက်နိုင်ခဲ့ သည်ဟု သိရသည်။
“အင်အားက ၁၈၀ ကျော် ၊ ၂၀၀ နီးပါးလောက် လာဖြည့်တယ်။ လေယာဉ်နဲ့ လာချတာ။ သူတို့က အဲဒီဖြည့်တဲ့ တပ်တွေကို ထန်တလန်ဘက်ကို ပို့ဖို့ သူတို့က လုပ်နေတာဖြစ်တယ်။ အဲဒါကို ကျနော်တို့ ဟားခါးမြို့အထွက်မှာ ဖြတ်တောက်နိုင်ခဲ့တယ်။ အဲဒီဘက်ကတော့ အင်အားထပ်ဖြည့်နိုင်တာပေါ့ မရှိသေးဘူး” ဟု ချင်းအမျိုးသားတပ်ဦး CNF/ CNA ပြောရေးဆိုခွင့်ရှိသူ ဆလိုင်းထက်နီက ပြောသည်။
နိုဝင်ဘာလအတွင်း စစ်ကောင်စီသည် ဟားခါးမြို့ ခလရ – ၂၆၆ တပ်ရင်းကို စစ်အင်အားများ၊ လက်နက်ခဲယမ်းနှင့် ရိက္ခာများ မကြာခဏ ဖြည့်တင်းလျက်ရှိသည်။
ချင်းညီနောင်စစ်ဆင်ရေးအဖြစ် မြို့သိမ်းတိုက်ပွဲဖော်ဆောင်နေသည့် မင်းတပ်မြို့နှင့် ဖလမ်းမြို့တို့တွင်လည်း စစ်ကောင်စီနှင့် ချင်းညီနောင်၊ မဟာမိတ်တို့ကြား တိုက်ပွဲများ ဖြစ်ပွားနေသည်။
