(006SV)
စစ်ကိုင်းတိုင်း၊ အနောက်မြောက်တိုင်း စစ်ဌာနချုပ် (မုံရွာ) မှ ထောက်ပံ့နှင့် ပို့ဆောင်ရေးတပ်ရင်းက ဒု-တပ်ကြပ်တစ်ဦးသည် ချင်းကာကွယ်ရေးတပ်ဖွဲ့ – CDM- စီယင်းသို့ ယခုလပိုင်းတွင် ဆက်သွယ်၍ အလင်းဝင်ရောက်လာသည်ဟု သိရသည်။
အနောက်မြောက်တိုင်းစစ်ဌာနချုပ် (မုံရွာ) ၊ အမှတ် (၉၃၀)၊ ထောက်ပံ့နှင့် ပို့ဆောင်ရေးတပ်ရင်းမှ ဒုတိယတပ်ကြပ် ဦးငိုလျန်ကျင်သည် ၂၀၂၃ ခုနှစ် ဇန်နဝါရီလပိုင်းကတည်းက စစ်တပ်မှ ထွက်ပြေးလာခဲ့သည်ဟု သိရသည်။
စစ်ကောင်စီတပ်မှ ထွက်ပြေးလာပြီးနောက် အသိဆွေမျိုးတချို့ထံတွင် ရှောင်တိမ်းနေခဲ့ပြီး ယခုနှစ် ၆ လပိုင်းတွင် ဖမ်းဝရမ်း ထုတ်ခံခဲ့ရပြီးနောက် နောက်ပိုင်းလများတွင် လုံခြုံမှုမရှိစွာ နေထိုင်ခဲ့ရသည်ဟု သိရသည်။
“သူတို့လုပ်ရပ်တွေ မကြိုက်လို့ ထွက်ပြေးလာတာပါ။ ၂၀၂၃ တစ်လပိုင်းကနေ ထွက်ပြေးလာခဲ့တာ၊ ဝရမ်းထုတ်ခံရတာက ၆ လပိုင်းဖြစ်ပါတယ်။ လမ်းတစ်လျှောက်မှာ ဒုက္ခရောက်တယ်။ စစ်ဆေးတွေများတယ်။ အရင်ကတော့ တခြားနေရာမှာ ရှောင်တိမ်းနေခဲ့တာပါ” ဟု အလင်းဝင်ရောက်လာသူ ဒု-တပ်ကြပ် ဦးငိုလျန်ကျင်က ပြောသည်။
ထို့ကြောင့် ယခုလပိုင်းတွင် ချင်းကာကွယ်ရေးတပ်ဖွဲ့ – CDM – စီယင်းသို့ ဆက်သွယ်၍ အလင်းဝင်လာခဲ့ခြင်းဖြစ်ပြီး CDM – စီယင်းတပ်ဖွဲ့သို့ ယမန်နေ့က ရောက်ရှိခဲ့သည်ဟု ချင်းကာကွယ်ရေးတပ်ဖွဲ့ – CDM – စီယင်းမှ စစ်ဦးစီချုပ်က ပြောသည်။
“သူက နောက်ဆုံးဝင်လာတာပါ။ ဖမ်းဝရမ်းထုတ်တော့ သူက ဆက်သွယ်လာတယ်။ လုံခြုံမှုရှိတဲ့နေရာမှာ ခိုလှုံချင်တယ်ဆိုလို့ ခေါ်လိုက်တယ်။ အကုန်လုံးက တာဝန်ယူပြီးမှ ခေါ်ပြီးတော့ ပို့ပေးပါတယ်” ဟု သူက ပြောသည်။
စစ်ကောင်စီတပ်ဖွဲ့မှ ပုံစံအမျိုးမျိုးဖြင့် ချင်းကာကွယ်ရေးတပ်ဖွဲ့ – CDM – စီယင်းသို့ အလင်းဝင်လာပြီး လွတ်မြောက်နယ်မြေသို့ ပို့ဆောင်ထားသည့် စစ်ကောင်စီတပ်သား ၁၀ ဦးထက်မနည်း ရှိသည်ဟု သိရသည်။
စစ်ကောင်စီတပ်သားများအနေဖြင့် ပြည်သူ့ရင်ခွင်ဆီသို့ အချိန်မှီအလင်းဝင်လာသူများကို ဘေးကင်းလုံခြုံသောနေရာသို့ ရောက်သည့်တိုင်အောင် တာဝန်ယူပေးမည်ဖြစ်၍ အလင်းဝင်လာကြရန် CDF- CDM စီယင်တပ်ဖွဲ့က ဖိတ်ခေါ်ထားသည်။
