ရက္ခိုင့်တပ်မတော် (အေအေ) တပ်ဖွဲ့မှ ပြန်လွတ်ပေးသည့် ကင်းတလင်းရွာသား ၃၉ ဦးတို့သည် ယနေ့နံနက်ပိုင်း ၁၁ နာရီခွဲ ခန့်က ချင်းပြည်နယ်၊ ပလက်ဝမြို့နယ်၊ မီးဇာကျေးရွာသို့ ပြန်လည်ရောက်ရှိကြပြီဖြစ်သည်။
အေအေတပ်ဖွဲ့မှ ၅ လကျော်ကြာ ဘင်္ဂလားဒေရှ့်နယ်စပ်ဘက်သို့ ဖမ်းဆီးထားသည့် အဆိုပါကင်းတလင်းရွာသား ၃၉ ဦးတို့ ကို ဇူလိုင်လ ၃၁ ရက်နေ့က ပြန်လွတ်ပေးခဲ့ခြင်းဖြစ်ပြီး ယနေ့တွင် ဒူးချောင်းဝကျေးရွာအုပ်ချူပ်မှူးနှင့်အဖွဲ့က မီးဇာကျေးရွာ အထိ လိုက်ပို့ခဲ့သည်ဟု မီးဇာကျေးရွာရှိဒေသခံတစ်ဦးကပြောသည်။
“ သူတို့မီးဇာကျေးရွာကို ဒီနေ့ဘဲရောက်ရှိလာကြပါတယ်၊ အားလုံး ၃၉ ယောက်ဖြစ်ပါတယ်၊ ကျန်းမာရေးမကောင်းတဲ့သူ တစ်ချိူ့ပါတယ်၊ ခု သူတို့ထဲက အိမ်ထောင်ဦးစီးတွေကိုတော့ ထရွန်အိုင်တပ်စခန်းကခေါ်ပြီး အချက်အလက်တွေမေး မြန်း နေတယ်လို့သိရတယ်’’ ဟု အဆိုပါဒေသခံကပြောသည်။
အဆိုပါ ၃၉ ယောက်တို့သည် အမျိူးသား ၈ ယောက်၊ အမျိူးသမီး ၁၀ ယောက်နှင့် အသက် ၁၈ နှစ်အောက် ယောင်္ကျားလေး ၅ ယောက်၊ မိန်းကလေး ၁၅ ယောက် အိမ်ထောင်စု ၁၀ စုဖြစ်ပြီး ယခုလောလောဆယ်တွင် ၎င်းတို့ကို မီးဇာကျေးရွာရှိ တိုက်နယ်ဆေးရုံခန်းမဆောင်တွင် နေရာချထားပေးသည်ဟု သိရသည်။
ပြီးခဲ့သည့် ဖေဖော်ဝါရီလ ၂ ရက်နေ့က ကင်းတလင်းရွာသား ၅၂ ဦးကို ဘင်္ဂလားဒေရှ့်နယ်စပ်ဘက်သို့ အေအေ တပ်ဖွဲ့က ဖမ်းဆီးခေါ်ဆောင်ခဲ့ခြင်းဖြစ်သည်။ ယင်းတို့အနက် ရွာသား ၁၂ ဦးတို့သည် ဇွန်လ ၂၆ ရက်နေ့က အေအေ တပ်စခန်းမှ ထွက်ပြေးလွတ်မြောက်လာခဲ့ကြသည်။
တပ်စခန်းတွင်ကျန်ရှိနေသေးသည့် ၃၉ ဦးတို့သည် မိုးတွင်းကာလရောက်လာသည့်အတွက် ၎င်းတို့နေထိုင်ရေး အခက်အခဲရှိ၍ နဂိုမူလကျေးရွာသို့ပြန်လည်နေထိုင်လိုကြောင်းတင်ပြတောင်းဆိုလာသောကြောင့် ဇူလိုင်လ (၃၁) ရက်နေ့ နံနက်ပိုင်း (၉) နာရီက အုန်းသီးဝ ကျေးရွာရှိ ရပ်မိရပ်ဖများထံ ကောင်းမွန်စွာအပ်နှံခဲ့သည်ဟု အေအေတပ်ဖွဲ့က ဇူလိုင်လ (၃၁) နေ့က ထုတ်ပြန်ခဲ့သည်။
(ပုံစာ- မီးဇာကျေးရွာရှိ ကင်းတလင်းစစ်ဘေးရှောင်များနေထိုင်ရာတဲအိမ်များ)
