ထန်တလန်မြို့ တိုက်ပွဲပြင်းထန် နှစ်ဖက်ထိခိုက်ကျဆုံးမှုများနိုင် 

(06SV)

ချင်းပြည်နယ်၊ ထန်တလန်မြို့တွင် စစ်ကောင်စီတပ်နှင့် ချင်းအမျိုးသားတပ်ဦး CNF/ CNA ဦးဆောင်သော ချင်းပူးပေါင်းတပ်များ ယနေ့ဩဂုတ် ၂၈ ရက်မှာ တိုက်ပွဲအပြင်းအထန် ဖြစ်ပွားခဲ့ရာ နှစ်ဖက်ထိခိုက်ကျဆုံးမှုများနိုင်ကြောင်း ချင်းပူးပေါင်း တပ်နှင့် နီးစပ်သူများထံမှသိရသည်။ 

ယနေ့မနက်ပိုင်းကတည်းကဖြစ်ပွားသော အဆိုပါတိုက်ပွဲတွင် ချင်းကာကွယ် ရေးပူးပေါင်းတပ်ဖွဲ့ဘက်မှ ၁၁ ဦးကျဆုံးကြောင်း သတင်းများ ထွက်ပေါ်လာခဲ့သော်လည်း သီးခြားအတည်ပြုနိုင်ခြင်း မရှိသေးပေ။ 

ချင်းသတင်းဌာနတစ်ခုဖြစ်သော The Chin Post ကတော့ ချင်းအမျိုးသားတပ်မတော် CNA မှ ၅ ဦး၊ CDF – Zophei မှ ၄ ဦး၊ CDF – ထန်တလန်မှ ၁ ဦးနှင့် CDF – ဟားခါးမှ ၁ ဦး စုစုပေါင်း ၁၁ ဦး ယနေ့တိုက်ပွဲတွင် ကျဆုံးခဲ့သည်ဟု ဖော်ပြသည်။ 

နှစ်ဖက်တိုက်ပွဲအပြင်းအထန်ဖြစ်ပွားနေသည့်အချိန်တွင် စစ်ကောင်စီသည် လေကြောင်းပစ်ကူများ ပေးခဲ့သည့်အပြင် ဟားခါး အခြေစိုက်တပ်မှလည်း လက်နက်ကြီးပစ်ကူ အများအပြားပေးခဲ့သည်ဟု ချင်းပူးပေါင်းတပ်နှင့် နီးစပ်သူများက ပြောသည်။ 

ထို့အပြင် ယနေ့မနက်ပိုင်းကလည်း စစ်ကောင်စီတပ်ဖွဲ့သည် ဟားခါးမြို့မှ ကား ၃ စီးဖြင့် ထန်တလန်မြို့သို့ စစ်ကူစေလွှတ်ခဲ့သည်ဟု သိရသည်။ 

ယနေ့ တိုက်ပွဲနှင့်ပတ်သက်၍ စစ်ကောင်စီဘက်မှ ထိခိုက်သေဆုံးမှုကို မသိရသေးသည့်အပြင် အသေးစိတ်အချက်အလက်များကို ဆက်လက်အတည်ပြုနိုင်ရေး ချင်းအမျိုးသားတပ်မတော် CNA မှ ပြောရေးဆိုခွင့်ရှိသူ ဆလိုင်းထက်နီကို ဆက်သွယ်မေးမြန်းနေဆဲဖြစ်ပါသည်။