စစ်ဘေးရှောင်နှင့် သဘာဝဘေးဒဏ်သင့်ပြည်သူများအတွက် ဆန်မက်ထရစ်တန်ချိန် တစ်ထောင်ကျော် အိန္ဒိယဗဟိုအစိုးရကပေးအပ်

(005MK)

မီဇိုရမ်ပြည်နယ်က စစ်ဘေးရှောင်များနှင့် သဘာဝဘေးဒဏ်သင့်ပြည်သူများအား ကူညီထောက်ပံ့ရန် ဆန် မက်ထရစ် တန်ချိန် တစ်ထောင်ကျော်ကို အိန္ဒိယဗဟိုအစိုးရက ပြည်နယ်အစိုးရထံသို့ ပေးအပ်ခဲ့သည်ဟု သိရသည်။

မီဇိုရမ်ပြည်နယ်အတွင်း သဘာဝဘေးအန္တာရယ်ကြောင့် အသက်အိုးအိမ်ဆုံးရှုံးခဲ့ကြသော ဒေသခံပြည်သူများနှင့် အိမ်နီးချင်းနိုင်ငံများမှ ထွက်ပြေးခိုလုံလာကြသော စစ်ဘေးရှောင် ၄၅၀၀၀ ကျော်အတွက် ရူပီးသိန်း ၅၀၀ ခန့်တန်ဖိုး ရှိသော ဆန်မက်ထရစ်တန်ချိန် ၁၃၇၉.၃၄ အား ပြည်နယ်အစိုးရထံပေးအပ်သည့်အသိပေးစာကို အိန္ဒိယဗဟိုအစိုးရ ပြည်ထဲရေးဝန်ကြီးဌာနမှ ယနေ့ဩဂုတ်လ ၁၄ ရက်နေ့တွင် လက်ခံရရှိကြောင်း လက်ရှိအာဏာရ ZPM ပါတီက ထုတ်ပြန်သည်။

မီဇိုရမ်ပြည်နယ် ဝန်ကြီးချုပ် ပူးလာလ်ဒိုအောမ်မာက မီဇိုရမ်ပြည်နယ်အတွင်း သဘာဝဘေးကြောင့် အသက်အိုးအိမ်ဆုံး ရှုံးမှုနှင့် အိမ်နီးချင်းနိုင်ငံအတွင်း စစ်ရေးပဋိပက္ခကြောင့် ထွက်ပြေးခိုလုံလာကြသော စစ်ဘေးရှောင်ပြည်သူများအတွက် ဆန်လိုအပ်ချက်မြင့်မားလျှက်ရှိပြီး ကူညီထောက်ပံ့ပေးရန် ယခုလဆန်းပိုင်းက ဗဟိုအစိုးရထံတင်ပြခဲ့သည်ဟုသိရသည်။

အဆိုပါတင်ပြချက်ကို မီဇိုရမ်ပြည်နယ် အစားအသောက်နှင့် စားသုံးသူရေးရာ ဝန်ကြီးဌာန ဝန်ကြီး Pu B.Lalchhanzoa က လိုအပ်သောကိစ္စရပ်များအား ဆက်လက်ဆောင်ရွက်ခဲ့ပြီးနောက် အိန္ဒိယဗဟိုအစိုးရပြည်ထဲရေးဝန်ကြီးဌာနက မီဇိုရမ်အတွက် အထူးလိုအပ်ချက်အနေဖြင့် ဆန်ထောက်ပံ့ပေးခဲ့ခြင်းဖြစ်သည်ဟု ZPM ၏ ထုတ်ပြန်ချက်တွင်ဖော်ပြ ထားသည်။

ယင်းထောက်ပံ့ဆန်များကို ဗဟိုအစိုးရထံမှ အသိပေးစာရရှိသည့်နေ့မှစ၍ ရက်ပေါင်း ၆၀ အတွင်း ထောက်ပံ့ရေးဌာန (Supply Department) က ထုတ်ယူနိုင်သည်ဟု သိရသည်။

မြန်မာနိုင်ငံမှာ စစ်အာဏာသိမ်းမှုဖြစ်ပွားသည့် ၂၀၂၁ ခုနှစ်နောက်ပိုင်းကစ၍ စစ်ရေးအခြေအနေကြောင့် မီဇိုရမ်ပြည်သို့ ထွက်ပြေးခိုလုံလာသူ မြန်မာစစ်ဘေးရှောင် ၃၅၀၀၀ ခန့်ရှိသည်ဟု မီဇိုရမ်အစိုးရ၏ စာရင်းအရသိရသည်။

အလားတူ မဏိပူရ်ပြည်နယ်က လူမျိုးရေးပဋိပက္ခကြောင့် ထွက်ပြေးလာသည့် စစ်ဘေးရှောင် တစ်သောင်းခန့်နှင့် ဘဂ်လားဒေရှ့်နိုင်ငံမှ ထွက်ပြေးခိုလုံလာသူ တစ်ထောင်ကျော်ခန့်ရှိသည်ဟု သိရသည်။