လိုက်နာမှုမရှိပါက စစ်ပြေးအဖြစ် ကြေညာမည်
(004SS)
ချင်းအမျိုးသားကာကွယ်ရေးတပ်ဖွဲ့ (CNO/CNDF) တွင် ခွင့်ယူထားသူများ၊ ခွင့်လွန်နေသူများနှင့် ခွင့်မဲ့ပျက်ကွက်နေသော ရဲဘော်များအနေဖြင့် လာမည့် စက်တင်ဘာလ ၂၀ ရက်နေ့ နောက်ဆုံးထား၍ စစ်ဌာနချုပ်ရုံးသို့ ပြန်လည်သတင်းပို့ကြရန် CNO/CNDF စစ်ဦးစီးချုပ် ဗိုလ်မှူးကြီး Jason Lian က စက်တင်ဘာလ ၁ ရက်နေ့ရက်စွဲဖြင့် အမိန့်ထုတ်ပြန်လိုက်သည်။
သတ်မှတ်ထားသည့် ရက်ထက် ကျော်လွန်သည်အထိ ပြန်လည်သတင်းပို့ခြင်း မရှိပါက စစ်ပြေး အဖြစ် ကြေညာသွားမည် ဖြစ်ပြီး ပြည်တွင်း/ပြည်ပတွင် ရှိနေပါစေ ထိရောက်စွာ အရေးယူ ဆောင်ရွက်သွားမည်ဟု ဖော်ပြထားသည်။
CNO/CNDF အနေဖြင့် တပ်ဖွဲ့ဝင် ရဲဘော်အချို့၏ ကိုယ်ရေး၊ ကိုယ်တာနှင့် လူမှုရေး အခက်အခဲများကို စာနာထောက် ထားသောအားဖြင့် ခွင့်ပြုပေးခဲ့သော်လည်း အချိန်မီ ပြန်လည်သတင်းပို့ခြင်းမရှိဘဲ ခွင့်မဲ့ ပျက်ကွက်မှုများ ရှိနေသည်ကို စစ်ဆေးတွေ့ရှိရသည်ဟုဆိုသည်။
တပ်ဖွဲ့၏ လိုအပ်ချက်အရ အရေးကြီးတာဝန်များ ထမ်းဆောင်ရန် ပြန်လည်ခေါ်ယူသည့်အခါတွင် အချိန်မီ ပြန်လည် သတင်းပို့ရန်မှာ ရဲဘော်တိုင်း၏ တာဝန်ဖြစ်ကြောင်း CNO/CNDF က ဆိုသည်။
အကြောင်းအမျိုးမျိုးကြောင့် ခွင့်မဲ့ပျက်ကွက်နေသည့် ရဲဘော်များ၊ ခွင့်လွန်နေသူများနှင့် ခွင့်ခံစားနေသူများအားလုံး မိမိတို့ရောက်ရှိနေသည့် ပြည်တွင်း/ပြည်ပရှိ ရပ်ကွက်/ကျေးရွာကနေ စစ်ဌာနချုပ်ရုံးသို့ စက်တင်ဘာလ ၂၀ ရက်နေ့ နောက်ဆုံးထား၍ ပြန်လည်သတင်းပို့ရမည်ဟုဖော်ပြထားသည်။
ထို့အပြင် ပြည်သူ့စစ် (CR) သို့ ပြောင်းလဲလိုသည့် ရဲဘော်များနှင့် အငြိမ်းစား/အနားယူလိုသူများအနေဖြင့်လည်း သတ်မှတ်ရက်အတွင်း စစ်ဌာနချုပ်ရုံးသို့ ရောက်ရှိသတင်းပို့ကာ စည်းမျဉ်းများနှင့်အညီ ဆက်လက်ဆောင်ရွက်ရမည်ဖြစ်ကြောင်း CNO/CNDF က ထုတ်ပြန်ထားသည်။
