အိန္ဒိယ-မြန်မာနယ်စပ် စစ်ကိုင်းတိုင်း တမူးမြို့အဝင်တွင် ယနေ့မနက်ပိင်း ၈ နာရီခန့်က စစ်ကောင်စီတပ် နှင့် ပြည်သူ့ကာကွယ်ရေးပူးပေါင်းတပ်ဖွဲ့တို့ တိုက်ပွဲဖြစ်ပွားခဲ့ပြီးနောက် စစ်ကောင်စီတပ်ဖွဲ့က အနီးနားပတ်ဝန်း ကျင်တွင်ရှိသော လူနေအိမ်များကို မီးရှို့ခဲ့သည်ဟု သိရသည်။ တမူးမြို့ခံတစ်ဦးက “ဒီနေ့မနက် မြို့ပြင်မှာ တိုက်ပွဲဖြစ်ကြတာ မိနစ် ၂၀ ဆယ်လောက်ကြာတယ်၊ အဲ့နောက် တော့ စစ်သားတွေက GL. ထန်ဘွဲ့အိမ်နဲ့ သူ့အိမ်ရှေ့က ဈေးရောင်းတဲ့အမျိုးုသမီးအိမ်လည်း မီးရှို့သွားကြတယ်” ဟု ပြောသည်။ စစ်ကောင်စီတပ်ဖွဲ့မှ အင်အားအလုံးအရင်းဖြင့် နန်မြင်ဟန်တံတားမှ သုံးမိုင်ဂိတ်အထိ တပ်အင်အားဖြန့်ထားမှုများရှိသည့်အပြင် ထိတွေ့တိုက်ပွဲများဖြစ်ပွားချိန်ဖြတ်သန်းသွားလာမှုများ မြင်တွေ့ရသောကြောင့် စစ်ကောင်စီတပ်ဖွဲ့မှ ပြည်သူများအား လူသားဒိုင်းကာအဖြစ် အသုံးချလာနိုင်၍ လတ်တလော တမူး-ကလေး ကားလမ်းများကို ဖြတ်သန်းသွားလာခြင်း မပြုလုပ်ကြရန် ကာကွယ်ရေးတပ်ဖွဲ့ဘက်က မေတ္တာရပ်ခံထားကြောင်းသိရသည်။ ပြီးခဲ့သည့် စက်တင်ဘာလ ၂၄ ရက်နေ့ကလည်း တမူးမြို့ မြို့သစ်ခရိုင်၊ အောင်ဇေယျကျေးရွာဖက်မှ စစ်ကြောင်းထိုး လာသော စစ်ကောင်စီတပ်ဖွဲ့ကို ပြည်သူ့ကာကွယ်ရေးပူးပေါင်းတပ်ဖွဲ့များက နှစ်ကြိမ်တိုင်တိုင်ခြုံခိုတိုက်ခိုက်ခဲ့ပြီး စစ်ကောင်စီတပ်သား ၃၀ ဦးနှင့်အထက် သေဆုံးခဲ့သည့်အပြင် အများအပြားဒဏ်ရာရရှိမှုများရှိခဲ့ကြောင်း PDF-CEU Tamu မှ ထုတ်ပြန်ထားသည်။ စက်တင်ဘာလ ၁၉ ရက်နေ့တွင်လည်း တမူးမြို့ဖက်သို့ စစ်ကြောင်းထိုးလာသော စစ်ကောင်စီတပ်ဖွဲ့များသည် တမူးမြို့နယ်၊ ရန်လင်းဖိုင်ကျေးရွာရှိ လူနေအိမ် ၄ အိမ်၊ နန်မွမ်းတားရွာ ၃ အိမ်၊ ခွမ်းမွမ်းနွမ်း ၂ အိမ်တို့ကို မီးရှို့ခဲ့သည်။
Author: Editor
ကလေးမြို့အနောက်ဘက်ရပ်ကွက်၊ မြို့ရှောင်လမ်းတွင် စက်တင်ဘာလ ၂၅ ရက်နေ့က စစ်ကောင်စီမော်တော်ယဉ်ကို PDF (Kalay) က မိုင်းခွဲတိုက်ခိုက်ခံရကြောင်း သိရသည်။ ယမန်နေ့ ညနေ ၄ နာရီခွဲခန့်တွင် မြို့လှရပ်ကွက် မြို့ရှောင်လမ်းမကြီးအတိုင်း အရှေ့မှ အနောက်သို့ မောင်းနှင်လာသော စစ်ကောင်စီကား ၅ စီးအား မင်းသားကြီး ကာအိုကေဆိုင်အနီးတွင် PDF (Kalay) တပ်ဖွဲ့ဝင်များက မိုင်းဆွဲတိုက်ခိုက်ခဲ့ခြင်းဖြစ်သည်။ အဆိုပါတိုက်ခိုက်မှုကြောင့် စစ်ကောင်စီမော်တော်ယဉ် ၁ စီး မိုင်းထိမှန်ကာ ထိုးရပ်သွားခဲ့ကြောင်း၊ ယင်းနောက် မိနစ်အနည်းငယ်ခန့် အပြန်အလှတ်ပစ်ခတ်မှုဖြစ်ပွားခဲ့ပြီး PDF (Kalay) တပ်ဖွဲ့ဝင်များ အထိခိုက်မရှိ ဆုတ်ခွာခဲ့ကြောင်းနှင့် တိုက်ခိုက်မှုအတွင်း စစ်ကောင်စီတပ်ဖွဲ့ဝင်များ ထိခိုက်သေဆုံးမှုရှိနိုင်သော်လည်း အတည်ပြုနိုင်ခြင်းမရှိကြောင်း PDF (Kalay) ထုတ်ပြန်ချက်တွင် ဖော်ပြထားသည်။
အိန္ဒိယ-မြန်မာနယ်စပ် မီဇိုရမ်ပြည်နယ် ကျန်းဖိုင်းခရိုင် မဲလ်ဘုတ်ကျေးရွာတွင် စိတ်ကြွဆေးပြား (methamphetamine) အလုံး ၅ သိန်းကျော်ကို မီဇိုရမ်ရဲတပ်ဖွဲ့နှင့် အာသံရိုင်ဖယ်ပူးပေါင်းတပ်ဖွဲ့တို့က ဖမ်းဆီးရမိခဲ့သည်ဟု သိရသည်။ Zokhawthar ကျေးရွာအခြေစိုက် မီဇိုရမ်ရဲတပ်ဖွဲ့နှင့် အာသံရိုင်ဖယ်တပ်ဖွဲ့တို့သည် ကြိုတင်သတင်းရရှိထားချက်အရ စက်တင်ဘာလ ၂၃ ရက်နေ့က နယ်စပ်ဘက်မှတက်လာသော ယာဉ်လိုင်းများကို မဲလ်ဘုတ်ကျေးရွာတွင် စစ်ဆေးခဲ့ရာမှ စိတ်ကြွဆေးပြား အလုံး ၅ သိန်း ၅ ထောင်နှင့် ပိုင်ရှင်ဟုယူဆရသော အမျိုးသမီးတစ်ဦးကို ဖမ်းဆီးခဲ့သည်ဟု မီဇိုရမ်သ တင်းစာတွင်ဖော်ပြသည်။ ဖမ်းဆီးရမိသည့် စိတ်ကြွဆေးပြား၏ ကာလတန်းကြေးမှာ(နိုင်ငံတကာပေါက်ဈေး) ရူပီးငွေ သိန်းတစ်ထောင့်ခြောက်ရာ ကျော်ခန့်ရှိသည်ဟု ဖော်ပြထားသည်။ ယခုဖမ်းဆီးရမိသည့်ပမာဏသည် မီဇိုရမ်ပြည်နယ်တွင် စိတ်ကြွဆေးပြားအများဆုံး ဖမ်းဆီးရမိသည့်ပမာဏဖြစ်သည်ဟုသိရသည်။ ယင်းစိတ်ကြွဆေးပြားနှင့်အတူ အဖမ်းခံရသောအမျိုးသမီးကို Zokhawthar ရဲစခန်း သို့ စက်တင်ဘာလ ၂၄ ရက်နေ့က အပ်နှံပြီး အမှုဖွင့်အရေးယူထားကြောင်းသိရသည်။ အလားတူ စက်တင်ဘာလ ၂၂ ရက်နေ့ကလည်း ကျန်ဖိုင်းခရိုင် Tuipui ကျေးရွာတွင် မီဇိုရမ်ရဲတပ်ဖွဲ့က ကုန်တင်ကားတစီး အား စစ်ဆေးရာတွင် စိတ်ကြွဆေးပြားအလုံးတစ်သိန်းကျော်နှင့်အတူ အိန္ဒိယအမျိုးသား ၃ ဦးကို ဖမ်းဆီးခဲ့ကြောင်း သိရသည်။
CDM လှုပ်ရှားမှုမှာ ပူးပေါင်းပါဝင်လာသော တက္ကသိုလ်ကထိက ဒေါက်တာမေရီနှင့် ဆက်သွယ်မေးမြန်းချက် ခိုနူမ်းသုန်သတင်း၊ ၂၆ စက်တင်ဘာ ၂၀၂၂ ၂၀၂၁ ခုနှစ် ဖေဖော်ဝါရီလ ၁ ရက်နေ့မှာ စစ်တပ်က နိုင်ငံတော်အာဏာကို ရွေးကောက်ခံအစိုးရဆီကနေ မတရားသိမ်းယူခဲ့ပြီးနောက်ပိုင်း ဒီမိုကရေစီ လမ်းကြောင်းပေါ် ရောက်ရှိစပြုနေတဲ့ ပြည်ထောင်စုသမ္မတမြန်မာနိုင်ငံတော်ဟာ အမှောင်ထုကို တဖန် ပြန်လည်ကျရောက်ခဲ့ရပါတယ်။ ဒီလိုနိုင်ငံတော် အာဏာသိမ်းယူမှုကို ဆန့်ကျင်ကန့်ကွက်ပြီး အာဏာရှင်စနစ်ဖြုတ်ချရေးအတွက် နိုင်ငံတစ်ဝှမ်းမှာ ပြည်သူ လူထုနဲ့အတူ အစိုးရဝန်ထမ်းတွေဟာလည်း အကြမ်းမဖက် အာဏာဖီဆန်ရေးလှုပ်ရှားမှု Civil Disobedience Movement (CDM) မှာ ပူးပေါင်းပါဝင်လာခဲ့ကြပါတယ်။ သူတို့တွေဟာ စစ်တပ်ရဲ့ အာဏာသိမ်းမှုကို လက်မခံကြတဲ့အပြင် အာဏာရှင်ရဲ့ လက်အောက်မှာ အလုပ်ဆက်လက် မလုပ်ချင်တော့တဲ့အတွက်ကြောင့် ဖြစ်ပါတယ်။ အဲဒီလို အကြမ်းမဖက် အာဏာဖီဆန် ရေးလှုပ်ရှားမှုမှာ ဥပဒေပညာနဲ့ Ph.D ဘွဲရရှိထားသူ ချင်းအမျိုးသမီး တက္ကသိုလ်ကထိက ဒေါက်တာမေရီလည်း ပူးပေါင်းပါဝင်ခဲ့ပါတယ်။ ဒေါက်တာမေရီဟာ မုံရွာတက္ကသိုလ်မှာ (LLB) ဥပဒေဘွဲ့ ရရှိပြီးနောက် မန္တလေးမြို့ ရတနာပုံတက္ကသိုလ်ကနေ ဥပဒေ မဟာဘွဲ့ကို ထပ်မံရရှိခဲ့ပါတယ်။ အဲဒီနောက် Ph.D ဘွဲ့ကို မန္တလေးတက္ကသိုလ်ကနေ ထပ်မံရရှိခဲ့ပြီး မြစ်ကြီးနား၊ မုံရွာနဲ့ မန္တလေး အဝေးသင်တက္ကသိုလ်တွေမှာ ဥပဒေဘာသာရပ်ကို သင်ကြားပေးနေတဲ့ ကထိကဆရာမတစ်ဦးလည်း ဖြစ်ပါတယ်။ စစ်အာဏာသိမ်းမှု ဖြစ်ပွားတဲ့နောက်မှာတော့ အကြမ်းမဖက်စစ်အာဏာရှင်စနစ် ဆန့်ကျင်ဖီဆန်ရေးလှုပ်ရှားမှု (CDM) မှာ ပါဝင်လာပြီး အိန္ဒိယနိုင်ငံ မီဇိုရမ်ပြည်နယ်မှာ ခိုလှုံခဲ့ပါတယ်။ ဒေါက်တာမေရီကို ခိုနူမ်းသုန်သတင်းဌာနက အခုလို ဆက်သွယ်မေးမြန်းထားပါတယ်။ မေး။…
ချင်းပြည်နယ် မတူပီမြို့ ခရိုင်ရုံးနှင့် ငလိုင်ရွာအကြားတွင် စက်တင်ဘာလ ၂၅ ရက် ယနေ့တွင် စစ်ကောင်စီတပ်ဖွဲ့နှင့် CDF-Matupi တပ်ဖွဲ့တို့ တိုက်ပွဲဖြစ်ပွားခဲ့ကြပြီး စစ်ကောင်စီဘက်က ၄ ဦးဆုံးသေဆုံးခဲ့ကြောင်း CDF-Matupi က ထုတ်ပြန်သည်။ စစ်ကောင်စီတပ်ဖွဲ့သည် စက်တင်ဘာ ၂၄ ရက်နေ့က မတူပီ-ဟားခါးလမ်းဘက်သို့ ခြေလျင်စစ်ကြောင်းဖြင့် နယ်မြေရှင်းလင်းရေးပြုလုပ်လာရာတွင် ခရိုင်ရုံးနှင့် ငလိုင်ရွာကြားတွင် ယနေ့မနက်ပိုင်း ၈ နာရီမှ ၁၁ နာရီခန့်အထိ CDF-Matupi တပ်ဖွဲ့နှင့် တိုက်ပွဲဖြစ်ပွားခြင်းဖြစ်သည်။ ယင်းတိုက်ပွဲတွင် စစ်ကောင်စီဘက်က တပ်သား ၄ ဦးသေဆုံးကာ ၈ ဦးထက်မနည်း ဒဏ်ရာရရှိခဲ့သည်ဟု CDF-Matupi က ထုတ်ပြန်သည်။ CDF-Matupi တပ်ဖွဲ့ဘက်ကလည်း ရဲဘော်တစ်ဦး ပြင်းထန်ဒဏ်ရာရရှိခဲ့သည်ဟု သိရသည်။
မတူပီအခြေစိုက် ခလရ (၁၄၀) တပ်ရင်းမှ မတူပီ-ဟားခါးလမ်းဖက်ကို နယ်မြေရှင်းလင်းရေးပြုလုပ်လာသော စစ်ကောင်စီတပ်နှင့် CDF-Matupi တို့ ယနေ့ မနက် (၇:ဝ၀) နာရီခန့်တွင် ထိပ်တိုက်တိုက်ပွဲဖြစ်ပွားခဲ့ပြီး စကစဖက်မှ (၃) ဦးသေဆုံးကာ အများအပြား ဒဏ်ရာရရှိခဲ့ကြောင်း CDF-Matupi သတင်းနှင့်ပြန်ကြားရေးက သတင်းထုတ်ပြန်သည်။ ယင်းတိုက်ပွဲတွင် CDF- Matupi ဖက်မှ အထိအခိုက်မရှိ ဆုတ်ခွါနိုင်ခဲ့ပြီး တိုက်ပွဲများ ဆက်လက်ဖြစ်ပွားနိုင်ပြီး မိဘပြည်သူများအနေဖြင့် မတူပီ-ဟားခါးလမ်းကို ဖြတ်သန်းသွားလာခြင်းမပြုလုပ်ကြရန် အသိပေးအပ်သည်ဟု CDF-Matupi က ထုတ်ပြန်ထားသည်။
အိန္ဒိယနိုင်ငံ မီဇိုရမ်ပြည်နယ် အိုင်ဇောလ်မြို့တွင် ကျင်းပပြုလုပ်သော နိုင်ငံတကာပန်းချီပြပွဲ (International Art Exhibition) တွင် ဒေါ်အောင်ဆန်းစုကြည်၏ ပုံတူပန်းချီကားလည်း ပါဝင်ပြသထားသည်ဟု သိရသည်။ “Love Revolution” ဟု အမည်ပေးထားသော ယင်းနိုင်ငံတကာပန်းချီပြပွဲကို အိုင်ဇောလ်မြို့ မီလီနီယမ်ကုန်တိုက်တွင် စက်တင်ဘာလ ၂၁ ရက်နေ့က စတင်ဖွင့်လှစ်ခဲ့ကြပြီး စက်တင်ဘာလ ၂၄ ရက်နေ့အထိ ဖွင့်လှစ်ပြသထားမည်ဟု သိရသည်။ ယင်းပန်းချီပြပွဲတွင် ချင်းအမျိုးသားတစ်ဦး C. Puia မှ ရေးဆွဲထားသော မြန်မာ့ဒီမိုကရေစီခေါင်းဆောင် ဒေါ်အောင်ဆန်းစုကြည်၏ ရုပ်ပုံပန်းချီကားအပါအဝင် နိုင်ငံပေါင်း ၃၆ နိုင်ငံက ပန်းချီကားများ ပါဝင်ပြသထားကြသည်။ နိုင်ငံတကာပန်းချီပြပွဲကို Lalhmingmawii (Amoii) မှ စီစဉ်ဆောင်ရွက်ခြင်းဖြစ်ပြီး မီဇိုရမ်ပြည်နယ်က နာမည်ကြီး ပန်းချီအနုပညာရှင်များဖြစ်ကြသော Tlangrokhuma, Buta, Lalbiaklara, Rohnuna တို့အပါအဝင် အိန္ဒိယနိုင်ငံမှ ပန်းချီဆရာ ၇၂ ဦးနှင့် နိုင်ငံတကာမှ ပန်းချီဆရာ ၅၀ ဦးတို့၏ အနုပညာလက်ရာများကို ခင်းကျင်းပြသခဲ့ကြသည်ဟု သိရသည်။
မီဇိုရမ်ပြည်နယ်တောင်ပိုင်း ဆိုင်ဟား (Siaha) ခရိုင်တွင် မြန်မာနိုင်ငံသား ၅ ဦးပါအဝင် လူ ၇ ဦးထံမှ စစ်သုံးပစ္စည်များနှင့် စပ်ဆိုင်သော ပစ္စည်းအမြောက်အများကို စက်တင်ဘာလ ၂၁ ရက်နေ့က အာသံရိုင်ဖယ်တပ်ဖွဲ့က ဖမ်းဆီးရမိခဲ့သည်ဟု သိရသည်။ သိမ်းဆည်းရမိသည့် ပစ္စည်းများမှာ လေသေနတ်၊ လေသေနတ် ကျည်ဆန်များ၊ တိုက်ခိုက်ရေး ယူနီဖောင်းများ၊ ရေဒီယို ဝတ်စုံများ၊ နည်းဗျူဟာ အင်္ကျီများ၊ နည်းဗျူဟာ လက်အိတ်များနှင့် ဖိနပ်များ အပါအဝင် ရူပီး ၁၆ သိန်းဝန်းကျင် တန်ဖိုးရှိကြောင်း ကာကွယ်ရေးဝန်ကြီးဌာန ပြောရေးဆိုခွင့်ရှိသူ ဒု-ဗိုလ်မှူးကြီး Mahendra Rawat က ပြောဆိုကြောင်း အိန္ဒိယအခြေစိုက် Indo-Asian News Service (IANS) သတင်းဌာနကဖော်ပြသည်။ အဆိုပါပစ္စည်းများနှင့်အတူ မြန်မာနိုင်ငံသား ငါးဦးနှင့် အိန္ဒိယနိုင်ငံသား ၂ ဦးကိုလည်း ဖမ်းဆီးထားသည်ဟုဆိုသည်။ အာသံရိုင်ဖယ်တပ်နှင့် မီဇိုရမ်ပြည်နယ်ရဲတပ်ဖွဲ့တို့ ပူးပေါင်းပြီး ဆိုင်ဟားခရိုင်အတွင်း နယ်မြေရှင်းလင်းရေးဆောင်ရွက်စဉ် Niawtlang အနီးတွင် ယာဉ်နှစ်စီးကို စစ်ဆေးရာတွင် အဆိုပါပစ္စည်းများကို ဖမ်းဆီးရမိခဲ့ခြင်းဖြစ်သည်ဟု သတင်းစာတွင် ဖော်ပြထားသည်။ သိမ်းဆည်းရမိသော ပစ္စည်းများနှင့် ဆက်စပ်ပစ္စည်းများအား ဆက်လက်စုံစမ်းစစ်ဆေးရန်နှင့် တရားဥပဒေအရ အရေးယူရန် ဆိုင်ဟားရဲစခန်းသို့ လွှဲပြောင်းပေးအပ်ခဲ့ကြောင်း သိရသည်။ မီဇိုရမ်ပြည်နယ်သည် မြန်မာနိုင်ငံနှင့် ၅၁၀ ကီလိုမီတာအကွာဝေးရှိသော ခြံစည်းရိုးခတ်ထားခြင်းမရှိသည့် နယ်စပ်လမ်း ကြောင်းမှမဆင့် မူးယစ်ဆေးဝါး၊ လက်နက်ခဲယမ်းများ၊ ရွှေများ၊ ထူးခြားဆန်းပြားသော တိရစ္ဆာန်များ၊ ဆေးရွက်ကြီးထွက်ပစ္စည်းမျိုးစုံနှင့် အခြား မှောင်ခိုကုန်ကူးမှုများစွာကို မကြာခဏဖြစ်ပွားလေ့ရှိသည်ဟု IANS သတင်းစာတွင် ဖော်ပြထားသည်။
မီဇိုရမ်ပြည်နယ် အိုင်ဇောလ်မြို့နယ်တွင် ၂ ရက်အတွင်း မြန်မာနိုင်ငံသား ၃ ဦးထံမှ ဘိန်းဖြူများ ဖမ်းဆီးရမိခဲ့သည်ဟု မီဇိုရမ်ရဲတပ်ဖွဲ့က ထုတ်ပြန်သည်။ အိုင်ဇောလ်မြို့နယ် Tuirial ကျေးရွာတွင် စက်တင်ဘာလ ၂၀ ရက်နေ့က အသက် ၃၂ နှစ်အရွယ် Van Cung Bia ထံမှ ဘိန်းဖြူ ၂၀၂ ဂရမ်ဖမ်းဆီးခဲ့သည်ဟု သိရသည်။ ၎င်းသည် စစ်ကိုင်းတိုင်း ကလေးမြို့နယ် Haikhawl-Tuingo ကျေးရွာ တွင်နေထိုင်သူ ဖြစ်သည်ဟု မီဇိုရမ်ရဲတပ်ဖွဲ့က ထုတ်ပြန်သည်။ အလားတူ စက်တင်ဘာလ ၂၁ ရက်နေ့ကလည်း Tuirial ကျေးရွာတွင် အသက် ၃၂ အရွယ် Thasui နှင့် အသက် ၂၅ နှစ်အရွယ် Duhneimawi ထံမှ ဘိန်းဖြူ ၁၄၇ ဂရမ်ကို ဖမ်းဆီးရမိသည်ဟု သိရသည်။ ၎င်းတို့နှစ်ဦးသည် ကလေးမြို့ တာဟန်း (C, B) ရပ်ကွက်တွင် နေထိုင်သူများဟုသိရသည်။ Thasui နှင့် Duhneimawi တို့နှစ်ဦးသည် မိမိကိုယ်ကိုယ် စစ်ဘေးရှောင်များဟု ပြောဆိုကြကြောင်း သိရသည်။ မီဇိုရမ်ပြည်နယ်တွင် မူူးယစ်ဆေးဝါးတိုက်ဖျက်ရေးဌာနနှင့် မီဇိုးလူငယ်အသင်းမှဖွဲ့စည်းထားသော Central Anti-Drugs Squad (CADS) တို့ ပူးပေါင်းဆောင်ရွက်မှုဖြင့် မူးယစ်ဆေးဝါးတိုက်ဖျက်ရေး အရှိန်မြင့်တင်လျှက်ရှိရာတွင် စက်တင်ဘာလ ၁၀ ရက်မှ ၂၁ ရက်နေ့အတွင်း ဘိန်းဖြူ တစ်ကီလိုကျော် ဖမ်းဆီးရမိသည်ဟု သိရသည်။
ချင်းပြည်နယ်တောင်ပိုင်း ကန်ပက်လက်မြို့တွင် စက်တင်ဘာလ ၂၀ ရက်နေ့က စစ်ကောင်စီတပ်ဖွဲ့နှင့် CDF-Kanpetlet တပ်ဖွဲ့တို့အကြား တိုက်ပွဲဖြစ်ပွားပြီး စစ်ကောင်စီဘက်က ၅ ဦးထက်မနည်း သေဆုံးခဲ့သည်ဟု CDF-Kanpetlet တပ်ဖွဲ့က ထုတ်ပြန်သည်။ Chinland Defense Force-Kanpetlet တပ်ဖွဲ့ဝင်များသည် စက်တင်ဘာလ ၁၁ ရက်နေ့ကစ၍ ၎င်း၏ ထိန်းချုပ်နယ်မြေ နယ်စပ်နေရာများသို့ နယ်မြေရှင်းလင်းရေးပြုလုပ်ခဲ့ကြရာတွင် စစ်ကောင်စီတပ်ဖွဲ့နှင့် စက်တင်ဘာလ ၂၀ ရက်နေ့ ညနေပိုင်း ၃ နာရီမှ ၄ နာရီအကြားတွင် တိုက်ပွဲဖြစ်ပွားခဲ့ကြခြင်းဖြစ်သည်။ ယင်းတိုက်ပွဲတွင် စစ်ကောင်စီဘက်မှ ၅ ဦးထက်မနည်းသေဆုံးနိုင်ပြီး အလောင်း ၃ လောင်းကို ပြန်တမ်းဖြင့် သင်္ဂြိုဟ်ပေးခဲ့သည်ဟု CDF-Kanpetlet တပ်ဖွဲ့ကဆိုသည်။ တိုက်ပွဲအပြီး နယ်မြေရှင်းလင်းမှုပြုလုပ်စဉ် MA ကျည် – ၂၀၁ တောင့်၊ 40mm – ၃လုံး၊ ကျည်ကာ-တစ်ခုတို့ကို သိမ်းဆည်းရမိခဲ့ပြီး ရဲဘော်များ အထိခိုက်မရှိ ပြန်လည်ဆုတ်ခွာနိုင်ခဲ့သည်ဟု CDF-Kanpetlet က ထုတ်ပြန်ထားသည်။ အလားတူ မင်းတပ်မြို့တွင်လည်း စက်တင်ဘာလ ၂၁ ရက်နေ့က မင်းတပ်မြို့နယ်မြေခံတပ်ရင်း ခလရ ၂၇၄ တပ်ရင်းထဲကို လက်နက်ကြီးများဖြင့် ပစ်ခတ်တိုက်ခိုက်ခဲ့ပြီး စစ်ကောင်စီဘက်က ထိခိုက်သေဆုံးမှု ရှိ/မရှိကိုမူ မသိရသေးကြောင်း CDF-Mindat က ထုတ်ပြန်သည်။