(006SV)
ချင်းပြည်နယ်၊ ချင်းတော်လှန်ရေးအင်အားစုများကြား နိုင်ငံရေးသဘောထားကွဲလွဲမှုများကြောင့် မတူပီမြို့အခြေစိုက် CDF – မတူပီ တပ်ဖွဲ့သည် ချင်းလဲန်းကောင်စီ (CC)နှင့် ကြားကာလချင်းအမျိုးသား အတိုင်ပင်ခံကောင်စီ (ICNCC) တို့တွင် ပူးပေါင်းပါဝင်ရန် သဘောထားကွဲလွဲပြီးနောက် တပ်မဟာ (၂) ခုအဖြစ် ပြင်ဆင်ဖွဲ့စည်းလိုက်ကြောင်း သိရသည်။
ဖေဖော်ဝါရီလ ၂၃ ရက်မှ ၂၅ ရက်အထိ မတူပီမြို့နယ်အတွင်းမှ ဌာနဆိုင်ရာများ၊ အရပ်ဖက် တော်လှန်ရေးအင်အား စုများ အပါအဝင် တပ်ရင်း အသီးသီးမှ တပ်မှူးများဖြင့် ချင်းကာကွယ်ရေးတပ်ဖွဲ့ – မတူပီ၏ တတိယအကြိမ်မြောက် ညီလာခံ အစည်းအဝေးကို ကျင်းပပြီးနောက် CDF- မတူပီကို တပ်မဟာ (၁) နှင့် (၂) အဖြစ် ခွဲခြားကာ ပြင်ဆင်ဖွဲ့စည်းလိုက်ကြခြင်းဖြစ်သည်။
“ဒီချင်းနိုင်ငံရေးမှာ ICNCC တို့ ချင်းလဲန်းကောင်စီတို့ ဖြစ်လာတဲ့အခါ အဓိက တပ်မဟာ – ၂ ကတော့ ချင်းလဲန်း ကောင်စီကို ထောက်ခံတဲ့ အဖွဲ့ဖြစ်တယ်။ တပ်မဟာ – ၁ ကတော့ ချင်းလဲန်းကောင်စီမှာ မပါဝင်ချင်သေးတဲ့ အခြေ အနေဖြစ်တယ်။ ဒါကြောင့်မို့လို့ တပ်မဟာ ၁ နဲ့ ၂ ရယ်လို့ လုပ်ထားတာပါ။ ချင်းလဲန်းကောင်စီကို ထောက်ခံတဲ့ အဖွဲ့ကနေပြီးတော့ ကော်မတီမှာ ပါဝင်ဖို့ ဆိုရင် လုံးဝ အကုန်လုံး ပါဝင်လို့ ရတယ်။ ချင်းလဲန်းကောင်စီရဲ့ လိုအပ်ချက် ကော်မတီပိုင်းဆိုင်ရာမှာလည်း အကုန်လုံး ပါဝင်ခွင့်ရှိမယ်” ဟု CDF – မတူပီ၊ ပြောရေးဆိုခွင့်ရှိသူ ဆလိုင်းနိုင်ဂျွန်က ပြောသည်။
CDF-Matupi တပ်မဟာ – ၁ တွင် တပ်ရင်း – ၁ နှင့် တပ်ရင်း – ၅ တို့ ရှိနေမည်ဖြစ်ပြီး တပ်မဟာ – ၂ တွင် တပ်ရင်း – ၂၊ တပ်ရင်း – ၃၊ တပ်ရင်း – ၄ နှင့် လက်ရှိ ညီလာခံမှ ထပ်မံအတည်ပြုထားသည့် အသစ် တပ်ရင်း – ၆ တို့ ပါဝင်ကြောင်း သိရသည်။
CDF – မတူပီ၏ တပ်မဟာ – ၁ သည် လတ်တလောတွင် ချင်းလဲန်းကောင်စီကို စောင့်ကြည့်နေသော အနေအထားမှာရှိပြီး မပါဝင်ချင်သေးသည့် မတူပီ တော်လှန်ရေးအစုအဖွဲ့ဖြစ်ပြီး ကြားကာလချင်းအမျိုးသား အတိုင်ပင်ခံကောင်စီ (ICNCC) နိုင်ငံရေးအစုအဖွဲ့ဘက်ကို အားသာနေကြောင်း သိရသည်။
“အဓိကက နိုင်ငံရေးပိုင်းဆိုင်ရာမှာပဲ နည်းနည်း အကွဲအပြဲ ရှိတာပါ။ ကျနော်တို့ က နိုင်ငံရေးမှာပဲ ဒီလို ဖြစ်သွားတာပါ၊ ကျန်တဲ့ စစ်ရေးအပိုင်းမှာတော့ ပုံမှန်အတိုင်းပဲ သွားမှာပါ။ ဒီတပ်မဟာ ၂ ခုကို ပြန်ပြီးတော့ ဒီတပ်မဟာ ၂ ခုရဲ့အထက်မှာ ဘယ်လိုမျိုး ဖွဲ့စည်းမလဲ၊ ကျစ်လစ်ခိုင်မာတဲ့ အဖွဲ့အစည်းဖြစ်အောင်တော့ ကြိုးစားသွားမှာပါ” ဟု CDF – မတူပီ ပြောရေးဆိုခွင့်ရှိသူက ပြောသည်။
CDF – မတူပီကို တပ်မဟာ (၁) နှင့် (၂) အဖြစ်ပြင်ဆင်ဖွဲ့စည်းလိုက်သော်လည်း ပူးပေါင်းဆောင်ရွက်မှု အားကောင်း စေရန် ယင်းတပ်မဟာ ၂ ခု၏ အထက်တွင် အစုအဖွဲ့တစ်ခု ထပ်မံဖွဲ့စည်းပြီး ဆောင်ရွက်ရန် အစီအစဉ်ရှိထားကာ လတ်တလောမှာ မဆွေးနွေးရသေးကြောင်း ၎င်းက ပြောသည်။
ချင်းလဲန်းကောင်စီတွင် ပါဝင်မည့် CDF – မတူပီ တပ်မဟာ – ၂ အနေဖြင့်လည်း ယင်းကောင်စီကို ရာနှုန်းပြည့်ထောက်ခံပြီး ဝင်ရောက်ပူးပေါင်းခြင်းမဟုတ်ဘဲ လုံးဝမကြိုက်သော မူဝါဒများဖြစ်လာလျှင် နောက်ပြန်လှည့်နိုင်မည့် အနေအထားမျိုး ဆွေးနွေးမှုများရှိထားကြောင်း ဆလိုင်းနိုင်ဂျွန်က ပြောသည်။
CDF – မတူပီကို ပြိုကွဲပြီဟူ၍ ပြည်သူတချို့ ထင်မြင်နေမှုများသည် လုံးဝ မဟုတ်မှန်ကြောင်း၊ အရင်ကထက် ကျစ်လစ်အောင် ကြိုးစားတည်ဆောက်သွားမည်ဖြစ်ပြီး စစ်ရေအရှိန် မြှင့်တင်နိုင်ရေး ပူးပေါင်းဆောင်ရွက်သွားမည်ဖြစ်ကြောင်း သိရသည်။
