(004SS)
ချင်းပြည်နယ် မြောက်ပိုင်း၊ ထန်တလန်မြို့နယ်တွင် အခြေစိုက်ပြီး စစ်ရေးလှုပ်ရှားနေသော CDF-Zophei က MA စက်သေနတ်များအပါအဝင် အမျိုးအစား ၄ မျိုးပါဝင်သော လက်နက်အမြောက်အများ လက်ခံရရှိကြောင်း ယနေ့ အောက်တိုဘာလ ၂ ရက်နေ့တွင် ထုတ်ပြန်သည်။
MA 1 အပါအဝင် MA 2, MA 3 သေနတ် ၄၅ လက်၊ ခဲယမ်းအမြောက်အများနှင့် စစ်ဝတ်စုံများကို Zopheiram Council Supporting of Global မှ တပ်ဆင်ပေးခြင်းဖြစ်ပြီး ယမန်နေ့အောက်တိုဘာလ ၁ ရက်က CDF-Zophei ဌာနချုပ်မှာ ဆုတောင်းဆက်ကပ်ခြင်းအခမ်းအနား ကျင်းပခဲ့ကြသည်ဟု သိရသည်။
“ကျွန်တော်တို့ကို လက်နက်တပ်ဆင်ပေးတာ ဒီတစ်ခါပဲမဟုတ်ဘူးပေါ့နော်။ ဒီမတိုင်ခင်တုန်းကလဲ တော်လှန်ရေးကာလ လည်းဖြစ်တဲ့ခါကျတော့ လက်နက်ကို အလုံးလိုက်အရင်းလိုက်ရမှဆိုရင် ကြာသွားမှာစိုးလို့ တစ်ခါတလေ ၁ လက်ရရင် ၁ လက်၊ ၅ လက်ရရင် ၅ လက်နဲ့ တောက်လျှောက် ဝယ်ဖြစ်ခဲ့တယ်။ အခုလို လက်နက်အလုံးအရင်းနဲ့ရပြီးတော့ အခမ်းအနားလုပ်ဖြစ်တာတော့ ဒါပထမအကြိမ်ပဲ” ဟု CDF- Zophei ပြောရေးဆိုခွင့်ရှိသူကပြောသည်။
အလှူရှင်များ၏ ကြိုးစားအားထုတ်မှုကြောင့် စစ်ရေးအသုံးအဆောင်ပစ္စည်းအချို့များ ထပ်မံရောက်ရှိရန် ကျန်သေးကြောင်းလည်း ၎င်းက ဆက်ပြောသည်။
CDF-Zophei အနေဖြင့် ယခုကဲ့သို့ စစ်လက်နက်ပစ္စည်းများ အလုံးရင်းလိုက်ရရှိနိုင်ရန် တစ်နှစ်နီးပါးနည်း လမ်းရှာဖွေအား ထုတ်ခဲ့ရကြောင်း သိရသည်။
“ကျွန်တော်တို့ပြင်ဆင်တာတော့ကြာပြီ လက်နက်လမ်းကြောင်းတွေ၊ ရရှိနိုင်မဲ့ဈေးနှုန်းတွေ စုံစမ်းတယ်၊ ဒီဟာက ဘယ်လောက် ဘယ်လောက်ပေါ့ နိုင်ငံခြားက တာဝန်ရှိသူတွေဆီတင်ပြ၊ သူတို့နဲ့ဆွေးနွေးပြီးတော့ ကျွန်တော်တို့ စပြီးအကောင်အထည်ဖော်လာတာ တစ်နှစ်လောက်ကြာတယ်ပေါ့။ အခု ဒီနှစ်ထဲမှာ ရောက်လာနိုင်တာပေါ့နော်“ ဟု CDF- Zophei ပြောရေးဆိုခွင့်ရှိသူက ပြောသည်။
ယခုကဲ့သို့ လက်နက်တပ်ဆင်နိုင်ရန် ရံပုံငွေရှာဖွေပေးသော Zopheiram Council Supporting of Global ကိုသော်လည်း ကောင်း၊ ပါဝင်လှူဒါန်းကြသော ပြည်တွင်းပြည်ပမှ အလှူရှင်များနှင့် အထူးသဖြင့် ဇိုဖေမိဘပြည်သူများအပေါ် ကျေးဇူး အထူးတင်ရှိကြောင်းနှင့် တော်လှန်ရေးအောင်မြင်သည်အထိ အားမလျှော့ဘဲ ဆက်လက်တိုက်ပွဲဝင်သွားမည်ဖြစ်ကြောင်း CDF- Zophei ပြောရေးဆိုခွင့်ရှိသူက ပြောသည်။
CDF-Zophei သည် ချင်းလဲန်းကောင်စီအဖွဲ့ဝင်ဖြစ်ပြီး ချင်းပြည်နယ်မြောက်ပိုင်းနှင့်တောင်ပိုင်းတိုက်ပွဲများတွင် ပါဝင် တိုက်ခိုက်ကာ လက်ရှိတွင် ထန်တလန်မြို့သိမ်းတိုက်ပွဲတွင် ပါဝင်တိုက်ခိုက်နေကြောင်း သိရသည်။
