(006SV)
အိန္ဒိယနိုင်ငံ၊ မီဇိုရမ်ပြည်နယ်၊ ဆိုငဟားခရိုင်ထဲမှာ မရာလဲန်းနယ်မြေအုပ်ချုပ်ရေးကောင်စီ/ မရာလဲန်း ကာကွယ်ရေးတပ်ဖွဲ့(MTC/ MDF) ၏ ဒုတိယဥက္ကဌ BN Sila နှင့် ဒေသခံလူငယ် ၂ ဦးကို စစ်အသုံး အဆောင်ပစ္စည်းများနှင့်အတူ အိန္ဒိယအာဏာပိုင်များက ဖမ်းဆီးထားသည်ဟု သိရသည်။
ဇူလိုင်လ ၁၇ ရက်က ဆိုင်ဟားခရိုင် Tipa ကျေးရွာတွင် ချင်းညီနောင်အဖွဲ့ဝင်၊ ချင်းတော်လှန်ရေးတပ်ဖွဲ့ တစ်ခုဖြစ်သည့် MTC/ MDF ထိပ်ပိုင်းခေါင်းဆောင် တစ်ဦးနှင့် မီဇိုရမ်ဒေသခံ လူငယ် ၂ ဦးတို့ကို မီဇိုရမ်ရဲတပ်ဖွဲ့နှင့် အာသံရိုင်ဖယ်တပ်တို့က ပူးပေါင်းဖမ်းဆီးခဲ့ခြင်းဖြစ်တယ်လို့ သတင်းရင်းမြစ်တစ်ဦးထံမှသိရသည်။
ဖမ်းဆီးရမိမှုမှာ ကားပေါ်တွင် ကျည်ကာဦးထုပ်များ၊ ကျည်ကာအင်္ကျီများ၊ ခဲယမ်းနှင့် စစ်အသုံးအဆောင်ပစ္စည်းများ ပါဝင်ကြောင်း သိရသည်။
ပြီးခဲ့တဲ့ ဇွန်လ ၁၆ ရက်နေ့က နေပြည်တော်မှာ စစ်အာဏာသိမ်း ဒုတိယခေါင်းဆောင် စိုးဝင်းနှင့်အတူ အိန္ဒိယတပ်မတော် ကာကွယ်ရေးဆိုင်ရာ ထောက်လှမ်းရေး ညွှန်ကြားရေးမှူး Lieutenant General Shrinjay Pratap Singh, AVSM, YSM ဦးဆောင်သော အဖွဲ့ လာရောက်တွေ့ဆုံခဲ့သည်။
ယင်းတွေ့ဆုံမှုတွင် နှစ်နိုင်ငံစစ်တပ် ပူးပေါင်းဆောင်ရွက်ရေး၊ နယ်စပ်ဒေသ တည်ငြိမ်အေးချမ်းရေး၊ လုံခြုံရေး၊ တရားဥပဒေစိုးမိုးရေး၊ ဖွံ့ဖြိုးရေးတို့ကို ဆွေးနွေးထားသည်ဟု စစ်ကောင်စီက ထုတ်ပြန်ထားသည်။
