အမျိုးသားညီညွတ်ရေးအစိုးရ (NUG)၊ ဖက်ဒရယ် ပြည်ထောင်စုရေးရာဝန်ကြီးဌာန၏ ပြည်ထောင်စုဝန်ကြီး ဒေါက်တာလျန်မှုန်းဆာခေါင်းနှင့် တောင်ကိုရီးယားသမ္မတနိုင်ငံ၊ ဂွမ်ဂျူးမြို့၏ မြို့တော်ဝန် Mr Kang Gi Jung တို့ ယနေ့ ကိုရီးယားဒေသစံတော်ချိန် နေ့လယ် ၃ နာရီ ၁၀ မိနစ်အချိန်တွင် မြို့တော်ဝန်ရုံး ခန်းမဆောင်၌ တွေ့ဆုံခဲ့ကြောင်း NUG ၏ ကိုရီးယားသမ္မတနိုင်ငံဆိုင်ရာ ကိုယ်စားလှယ်ရုံးက သတင်းထုတ်ပြန်သည်။
ဒေါက်တာလျန်မှုန်းဆာခေါင်းသည် ကိုရီးယားသမ္မတနိုင်ငံတွင် ကျင်းပပြုလုပ်မည့် နိုင်ငံတကာနှင့် မြန်မာ့ဖက်ဒရယ် ဒီမိုကရေစီရေးရာ ဆွေးနွေးပွဲသို့ တက်ရောက်ရန် ရောက်ရှိနေခြင်းဖြစ်သည်။
ထိုသို့တွေ့ဆုံရာတွင် ဂွမ်ဂျူးမြို့တော်ဝန်က ကိုရီးယားအစိုးရသာမက ကိုရီးယား ပြည်သူပြည်သားများအနေဖြင့် လက်ရှိ မြန်မာ့နိုင်ငံရေး အခြေအနေအရပ်ရပ်ကို သိရှိထားကြောင်း၊ စစ်အာဏာရှင်လက်အောက် မြန်မာနိုင်ငံသားများ၏ ခံစားချက်များကို စာနာနားလည်ကြောင်း၊ NUG အစိုးရကိုလည်း တသီးပုဂ္ဂလအနေဖြင့် အသိအမှတ်ပြု ထောက်ခံနေပါကြောင်း ပြောကြားခဲ့သည်ဟု ဆိုသည်။
ထို့ပြင် ကိုရီးယားအစိုးရအနေဖြင့်လည်း နွေဦးတော်လှန်ရေးကို ဆင်နွှဲနေကြသည့် မြန်မာပြည်သူပြည်သားများအား အစဉ်အားပေးနေမည် ဖြစ်ကြောင်းနှင့် မြန်မာနိုင်ငံ ဒီမိုကရေစီလမ်းကြောင်းပေါ် ပြန်လည်ရောက်ရှိနိုင်စေရေး ၎င်းတို့အနေဖြင့် အစွမ်းကုန် ကူညီပံ့ပိုးပေးသွားမည် ဖြစ်ကြောင်း စသည့် ကတိစကားများ ပြောကြားခဲ့ကြောင်းလည်း သိရသည်။
ဒေါက်တာလျန်မှုန်းဆာခေါင်းကလည်း ကိုရီးယားနိုင်ငံ၏ စစ်အာဏာရှင် ဂျွန်ဒူးဝမ်ကို တွန်းလှန်ခဲ့သည့် ၁၉၈၀ ပြည့် ဂွမ်ဂျူး ဒီမိုကရေစီ တော်လှန်ရေးလှုပ်ရှားမှုသမိုင်းကို ကောင်းစွာသိရှိပြီး စံနမူနာယူကာ အတုယူလေ့လာမိကြောင်း၊ မြန်မာ့ဒီမိုကရေစီတော်လှန်ရေးကို အစဉ်ထောက်ခံအားပေးမှုတွက် ကိုရီးယားအစိုးရနှင့် ပြည်သူပြည်သားများကို အထူးကျေးဇူးတင်ကြောင်း ပြောကြားခဲ့သည်ဟု ထုတ်ပြန်ချက်တွင် ဖော်ပြထားသည်။
ယင်းတွေ့ဆုံပွဲတွင် NUG ၏ ပြည်ထောင်စုဝန်ကြီးက ကိုရီးယားအစိုးရနှင့် NUG အစိုးရကြား အတူတကွ ပူးပေါင်းဆောင်ရွက်လိုသည့် ကိစ္စရပ်များနှင့် အဓိကလိုအပ်သည့် အကူအညီများကို မြို့တော်ဝန်အား တောင်းဆိုခဲ့ကြောင်းလည်း သိရသည်။
ထို့နောက် ဒေါက်တာလျန်မှုန်းဆာခေါင်းနှင့် NUG အစိုးရ၏ ကိုရီးယားနိုင်ငံဆိုင်ရာ ကိုယ်စားလှယ်နှင့်အဖွဲ့သည် ဂွမ်ဂျူး မေ ၁၈ အောက်မေ့ဖွယ် ဖောင်ဒေးရှင်းရုံး ပြတိုက်ကို သွားရောက်ခဲ့သလို ဂွမ်ဂျူး သူရဲကောင်း ဗိမ္မာန်သို့ သွားရောက်ကာ ၁၉၈၀ ပြည့် မေ ၁၈ ဂွမ်ဂျူး အရေးတော်ပုံအတွင်း ကျဆုံးခဲ့သည့် အာဇာနည်သူရဲကောင်းများအား အမှတ်တရ ရည်စူးအလေးပြုပြီး မေတ္တာပို့ဆုတောင်းခဲ့ကြောင်း ထုတ်ပြန်ချက်တွင် ပါရှိသည်။
ပြည်ထောင်စုဝန်ကြီး ဒေါက်တာလျန်မှုန်းဆာခေါင်းသည် အမျိုးသားညီညွတ်ရေးအစိုးရ (NUG) ဖွဲ့စည်းပြီးနောက် ကိုရီးယားသမ္မတနိုင်ငံသို့ ပထမဆုံး ရောက်ရှိလာသည့် NUG အစိုးရ၏ ပြည်ထောင်စုဝန်ကြီးဖြစ်ကြောင်း သိရသည်။
#ဧရာဝတီ မြန်မာပိုင်းသတင်းဌာနမှ ကူးယူဖော်ပြသည်။
